أخوية

أخوية (http://www.akhawia.net/forum.php)
-   موسيقى (http://www.akhawia.net/forumdisplay.php?f=40)
-   -   درس سلم موسيقى و جيتار (http://www.akhawia.net/showthread.php?t=61353)

مايكل المصرى 22/10/2006 00:15

درس سلم موسيقى و جيتار
 
إزيكم يا جماعة

انا عضو جديد و بصراحة انا حبيت المنتدى ده و حبيت اشترك و هابدأ بحاجة بسيطة يارب تعجبكم

هاحاول اشرح جيتار ( ميلودى و كوردات لو ربنا ادالى عمر ) و كمان شوية سلالم موسيقية

و قبل السلالم أقول نصايح للى عاوز يتعلم جيتار
1- الصبر و عدم اليأس و خصوصا فى البداية
2- حب الجيتار
3- إذا اردت ان تكون سريع فعليك بأن تتمكن من العزف ببطء
4- الجدية مع الجيتار أى انه ليس ملئ لوقت الفراغ فقط

اوك ؟
نسيب الجيتار دلوقت و نرجعله بعدين و نقول كلام عام عن السلالم الموسيقية فى جميع الآلات

ياريت إللى يحب يفهم الكلام ده يجيب ورق و قلم لان القرائة وحدها لن تكفى

* مافائدة السلم الموسيقى ؟
كل واحد بيسأل السؤال ده و يقول المهم انى اعزف و خلاص يبقى لازمة السلم الموسيقى إيه ؟
الاجابة : أى اغنية لازم تكون ماشية على سلم موحد ولا تخرج عنه
و إذا خرجت عن السلم فإن النغمات الخارجة تسمى نشاز

لو انا سألت واحد عادى عن السلم الموسيقى يرد و يقول
دو رى مى فا صول لا سى دو

و هو واثق ان دى هى الإجابة , لكن فى الحقيقة ان ده إحدى السلالم الموسيقية و ليس كل السلالم

معنى ان فى سلالم تانية يبقى لازم يكون لكل سلم اسم
و بالتالى السلم المشهور ده اسمه دو ماجور Major

و نلاحظ انه بدأ بـ ( دو ) و انتهى بـ (دو )

مع ملاحظة ان دو فى البداية لها تردد اقل من دو الاخيرة و كمان نقدر نقول بعد الدو الاخيرة يوجد رى ترددها اعلى من رى الاولى و هكذا

بالمثل يوجد رى ماجور يبتدى و ينتهى بالرى و هكذا


* ماهى القاعدة لتلك السلالم ؟
الفرق بين كل نغمة و نغمة حسب التردد بيسموه وحدة و تساوى 1
و لنأخذ الدو ماجور كمثال


دو --(+1)-->رى--(+1)-->مى--(+1/2)-->فا--(+1)-->صول--(+1)-->لا--(+1)-->سى--(+1/2)-->دو

قاعدة الماجور فى الجمع كما هو واضح من سلم الدو ماجور هى
1 1 1/2 111 1/2
واحدين , نص , 3 وحايد , نص :p


و من السطر السابق نفهم ان
دو +1 = رى
رى +1=مى
...............
و هكذا

أهم ملاحظة ان :
مى + 1/2 = فا
سى +1/2=دو

يعنى دول نغمتين الفرق بينهم 1/2 فقط

سؤال : لو مثلا قلنا
دو + 1/2 = ؟؟؟؟؟؟؟؟؟؟؟

إحنا عرفنا ان دو +1 =رى

أما دو + 1/2 = دو دييز
و نرمز له بالرمز ( دو # )

طبعا لا ينفع ان نقول مى + 1/2 = مى#
لان مى +1/2 = فا
ولو قلنا مى +1=؟؟؟؟؟؟:lol:
طبعا من خلال ماسبق نقول ان مى +1=فا# ( يعنى فا + 1/2 )

لو اخدنا مثال آخر لسلم ماجور
طبعا لا ننسى قاعدة الجمع 11 1/2 111 1/2
مثلا ناخد سلم الرى ماجور

رى--(+1)-->مى--(+1)-->فا#--(+1/2)-->صول--(+1)-->لا--(+1)-->سى--(+1)-->دو#--(+1)-->رى


طبعا نلاحظ ان وجود (دو # )و ( فا#) فى سلم الرى ماجور
و عشان نتأكد ان السلم صح لازم ينتهى بنفس النغمة
يعنى ابدأ بالرى و انتهى بالرى


و ياريت لو حد يحب يعمل سلم و يكتبه كتدريب و نشوف ان كان صح و لا فى مشاكل و لو فى مشكلة فى كلامى ممكن اعيد شرحه

شوفوا تحبوا اكمل شرح سلم الماينر miner ولا تحبوا نشوف شوية جيتار و بعد كدة نرجع للسلام :larg:

اشوفكم على خير ياناس ياعسل :clap:

HashtNasht 22/10/2006 07:32

:gem:

استاذ ايمت الدرس الجاي ;-)

marioma alghzayala 22/10/2006 13:36

:? :shock: :?
اقتباس:

استاذ ايمت الدرس الجاي
:lol: :o :lol:

مايكل المصرى 22/10/2006 17:42

اتمنى ان الموضوع يلقى اهتمام :)

طبعا مريم استاذة و عارفة كل الكلام ده :clap:
و مشكور جدا عزيزى hashtnasht على المساعدة و تفاعله :D

و بصراحة مافيش حد قال عاوزين ندخل فى شرح الجيتار ثم نرجع للسلم ولا نكمل السلم اولا ؟

عموما انا هاقول كلام بسيط عن الجيتار

طبعا انت كعازف جيتار لازم تحفظ نغمات الاوتار - 6 اوتار - من فوق لتحت بالترتيب


مى أو E
لا أو B
رى أو G
صول أو D
سى أو A
مى أو e

و طبعا هانقول شوية ملحوظات
1- عندنا أول وتر و آخر وتر نفس النغمة ( مى )

يبقى إيه الفرق بينهم ؟؟؟
طبعا إحنا سبق و قلنا ان النغمة ممكن تتكرر بتردد مختلف

بالتالى فإن المى الاولى ترددها أقل من المى الاخيرة

2- الترددات تبدأ من الاوتار العليا بالترددات المنخفضة ( صوت غليظ ) و تتدرج إلى اسفل فى الترددات إلى ان تصل إلى المى ذات التردد العالى ( صوت رفيع )

3- نلاحظ عدم وجود بعض النغمات على تلك الاوتار ( دو - فا - لا )
و كمان الدييز مش موجود ( دو# - رى# ...................) إوعوا حد يقول ( مي# ) هازعل :p


و أهم مصطلح فى الجيتار هو الفريت fret ( انظر الرسم )
و هى عبارة عن خطوط من النحاس عمودية على الاوتار

و عن طريقها نستطيع استنتاج نغمة من النغمات الغير موجودة ( بمجرد الضغط عند الفريت فإن التردد يزداد )

مثلا نقدر نعزف نغمة الـ (دو) أو (دو#) بالضغط على الفريت عند الوتر (لا)

السؤال الآن كيف يحدث هذا ؟؟؟؟؟؟؟؟؟؟؟؟؟؟؟؟

الإجابة : إننا بمجرد الضغط على الفريت الاولى فإننا نزيد النغمة بمقدار ( 1/2 ) و لو ضغطنا على الفريت الثانية فإننا نزيد بمقدرا (1) .............و هكذا يصبح كل فريت تزيد 1/2


كمثال :
مى +1/2 = فا
اول وتر ( مى) فلو ضغطنا على اول فريت ( نزيد 1/2) سنحصل على الفا
مع ملاحظة ان تردد تلك الـ(فا) ستكون منخضفة جدا ( صوت غليظ ) و آخر وتر ( مى أيضا :p ) لو علمنا نفس الشئ سنحصل أيضا على (فا) عالية جدا ( صوت مسرسع :frown: )

طبعا نقدر نحصل على اكتر من فا ( على سبيل المثال ) بترددات مختلفة كما هو واضح

****************************************
إيه رأيكم نبتدى التدريب على سلم الدو ماجور ؟
دو = ( وتر الـ(لا) الفريت رقم 3 ) .......... طبعا رقم 3 يعنى نزيد 3 انصاف = لا +3(1/2) = دو
رى = وتر الرى دون ضغط على أى فريت
مى = وتر الرى الفريت رقم 2........... طبعا لا نأخذ وتر المى العلوى ( لانه تردده أقل من النغمة السابقة (رى)) و لا نأخذ الـ(مى) السفلى ( لان التردد اعلى بكثير من النغمة التالية (فا)) وإحنا عاوزين ترددات تزداد تدريجيا حتى يكون تناسق فى سماع السلم
.......................

و هكذا كملوا انتم بقى فا صول لا سى دو
و عاوز اشوف تفاعل شوية لو حد يكمل ياريت :frown:
و لو حد مش فاهم أى جزء من هذا الدرس أو الدرس السابق انا تحت أمره

yamen_h 23/10/2006 23:53

الله يعطيك العافية انا عم دور على هيك موضوع من زمان ....
وانا ناطر الدرس الجاي على احر من الجمر ...:D

ذاكرة الحاضر 23/10/2006 23:56

موضوع حلوو..
بس ازا بتقدروا كمان تعلمونا على الدربكة(طبلة)..
انا بعرف شوي بس بدي كمان اتعلم..

مايكل المصرى 24/10/2006 08:59

عزيزى yamen_h انا سعيد جدا لانى بقدم حاجة تفيد ولو بـ 1% بس المهم انك تذاكر الدروس + التدريب العملى لان من الممكن اكون فاهم كل حاجة عن الجيتار بس مش سريع أو مش متقن العزف و ده سببه انى مش بذاكر عملى

عزيزى ذاكرة الحاضر انا اعرف ان الطبلة اساسها إحساس اصابعك و لكن للاسف مش هاقدر افيدك فيها كتير رغم ان بها بعض الرتمات القريبة من الجيتار

و لنرجع إلى استكمال الشرح
نسيت ان اقول ان تمرن نفسك على وضع اصابع يدك اليسرى على الفريتات بالترتيب ( الاربع اصابع على 4 فريتات بالترتيب )

النهاردة راح اقول معلومات و مشاكل فى الجيتار كان المفترض انى اقولها فى البداية

- زن فى النغمة
و الزن ده سببه ان اصابعك غير قوى و يجب عليك عندما تضغط ان تضغط نحو الفريت fret ( انظر الرسمة فى المداخلة السابقة ) و لا تضغط فى منتصف الفريت بورد fretboard ( انظر الرسمة )

- كتمة فى النغمة
و يرجع هذا العيب لسببين إما انك لا تضغط بقوى كافية أو انك عن طريق الخطأ تكتمها باصابعك

- و معظم المبتدئين تقابلهم مشكلة و هى ان يضغط بيده اليسرى على وتر و يعزف بيده اليمنى وتر آخر


و كنصائح للمبتدئين بعيدا عن الدروس السابقة عليك ان تتمرن على الضغط الجيد على الوتر
ثم بعد ذلك حاول ان تمرن نفسك بحيث تعزف دون ان تنظر للاوتار

لان بعد تلك التمارين سوف تتمرن على الكوردات ... و الكوردات ستضغط على اكتر من فريت فى وقت واحد و تعزف اكتر من نغمة فى آن واحد

ماحدش عمل الواجب المرة إللى فاتت !!! عاوز اتأكد انكم استوعبتوا :oops:

ان شاء الله المرة الجاية نستكمل السلالم و سنأخذ سلم الماينر و علاقته بالماجور

ياريت الاقى تفاعل اكتر :gem:

مايكل المصرى 25/10/2006 22:54

بعد شرح الماينر احضرت لكم نغمات (وماله) لعمرو دياب

سبق و درسنا الماجور 11 (1/2) 111 (1/2)
أما الماينر 1 (1/2) 11 (1/2) 11



مثال (لا) ماينر
لا --(+1)--> سى --(+1/2)--> دو --(+1)--> رى --(+1)--> مى --(+1/2)--> فا --(+1)--> صول --(+1)--> لا

نلاحظ ان (لا) ماينر نفس نغمات دو ماجور , لذا يقال أن (لا) ماينر قرين دو ماجور . و لتجد ان الفرق =1.5


مقارنة بين الماجور و الماينر
1- من خلال المثال السابق
القرين الماجور = الماينر + 1.5
القرين الماينر = الماجور - 1.5

2- أما الاختلاف فعند الرجوع بالسلم ( من النهاية للبداية ) مش مشكلة فى الماجور
دو سى لا صول فا مى رى دو

أما الماينر فإننا نزيد 1/2 على النغمة قبل الاخيرة (صول ) لتصبح صول #
و يصبح السلم
لا صول# فا مى رى دو سى لا

مايكل المصرى 25/10/2006 23:22

آن الاوان لكى نرى ثمرة التعب البسيط و لنرى شئ بسيط جميل
لحن ميلودى (وماله) لعمرو دياب

طبعا لازم نعرف السلم بتاعها (رى ماينر) و انتم تطلعوا السلم فى البيت

النغمات التى تحتها خط نغمات ذات تردد عالى( مسرسع :lol: ) , أما التى ليس تحتها خط فترددها متوسط
و لن نستخدم الترددات المنخفضة

وماله لو ليلة تهنا بعيد
لالا صول فامى رى فامى رى

و سبنا كل الناس
رى لا صول لالا# صول

انا يا حبيبى حاسس بحب جديد
فافاصول لاصول فامى رى

مالينى بالإحساس
لالا رى دو# رى مى دو

ما انا هنا جنبى اغلى الناس
لالا دو لا دو رى لا#

جنبى أحلى الناس
لالا لا# لالا# دولا

:clap: قشطة يابا

yamen_h 25/10/2006 23:41

الله يعطيك العافية ...وانا متابع معك ...:D :clap:

Eh@Ab 25/10/2006 23:45

مشكور على الموضوع او الدرس

وبدنا درس عن البيانو :o

smumin 25/10/2006 23:53

bravoo 3leek
 
really thanks alot..you are doing something great..and usefull :)

مايكل المصرى 25/10/2006 23:53

1 ملف مرفق .
نسخة مبسطة لحن الاغنية
عزيزى yamen_h :D

انا احضرت الآن نسخة صوتية ( ميلودى) لحن و ماله
و لكن ربما يكون الصوت ردئ لان المايك عندى جودته رديئة , و كمان عاملين فرح فى الشارع يعنى ربنا يستر :yahoo: لكن ماتخافش هاتقدر تميز النغمات

عزيزى إيهاب أعتقد ان الاخت مريوما اعطت فكرة عن الكيبورد عموما , و كمان الاهم من معرفة البيانو هو معرفة السلم لانه اساس أى آلة :D

مايكل المصرى 25/10/2006 23:59

عزيزى smumin

أنا سعيد جدا بكلامك و رد فعلك , و يارب تفيدك و تفيد باقى الزملاء :) :D

yamen_h 26/10/2006 00:13

عفوا يا مايكل ...بس بلا معلمية عليك ...
كأنو في بهالقطعة شي غلط ..يعني قصدي لما سمعتها بالتسجيل ..

مالينى بالإحساس
لالا رى دو# رى مى دو

ما انا هنا جنبى اغلى الناس
لالا دو لا دو رى لا#

:D

مايكل المصرى 26/10/2006 01:01

yamen_h

سمعتها لتانى مرة و مش عارف تقصد غلط فين ؟ يعنى مكانه اول الجملة و لا نصهاف ولا آخرها ؟



يمكن قصدك عشان ( لالا ) فى بداية ( مالينى بالاحساس ؟)

ربما يكون ده قصدك

لو هو قصدك ممكن تتعمل (لا ) واحدة فقط بس تطول زمانها , عادى تبقى صح بردو

أما لو قصدك حاجة تانية ياريت توضح مكان الغلط بالظبط و نبحث فين المشكلة , انا شفت ان كان لازم إطالة فى ( انا يا حبيبى حاسس بحب جديد) حيث كان يلزم زيادة (فا مى رى) انا اكتشف كدة لما حبيت اغنى مع المقطع لكن العزف الصامت لا تلاحظ

SchwarzerTeufel 26/10/2006 02:25

الله يعطيك العافية على هالموضوع
عم نستنى الكمالة يابي

مايكل المصرى 26/10/2006 10:53

لمن عزف الميلودى فقط
 
عزيزى SchwarzerTeufel
فات الكتير ولا يبقى سوى القليل
تم شرح الميلودى بسلالمه , و يبقى الآن شرح الكوردات و تنفيذها على الجيتار

وبالنسبة للميلودى كل ماعليك هو ان تسمع اغانى و تحاول ان تعرف ما هو السلم لتلك الاغنية و ان تعزفها دون الخروج عن السلم

ركزوا جدا لان الدرس هذه المرة كبير شوية و صعب و هو يناسب فقط الذين عزفوا ميلودى فقط

الآن مع الكوردات
الكوردات هى العزف على أكثر من نغمة فى وقت واحد
لن تستطيع عزف الكوردات إلا لو كنت تعزف ميلودى لسببين مهمين
  1. انك تتمرن على ضغط الفريت فى نغمة مفردة ثم تتمرن فى الضغط لاكثر من نغمة باكثر من اصبع
  2. انك تتمرن على نقل صباع مفرد من نغمة لنغمة ثم تتمرن على نقل اكثر من اصبع لاكثر من نغمة
قوانين الكوردات
- لكل سلم (ماجور/ماينر)3 كوردات
- لكل كورد 3 نغمات
- يمكن فى اغنية واحدة نستخدم كوردات ماجور + قرينه الماينر

مثال كورد دو ماجور + (لا)ماينر

الخطوة الاولى :- معرفة اسماء الـ3 كوردات للسلم الواحد
سواء ماجور أو ماينر
الكورد الاول (اسم السلم) --(+2.5)--> الكورد الثانى --(+1)--> الكورد الثالث

ملحوظة هامة :- سلم الماجور كل كورداته ماجور
أما سلم الماينر ستجد اول كوردين ماينر و الثالث ماجور

مثال (1) دو ماجور
لدينا 3 كوردات دو , فا , صول ( كلها ماجور)
ولا ننسى ان كل كورد 3 نغمات

مثال (2) (لا)ماينر
لدينا 3 كوردات لا (ماينر ) , رى (ماينر ) , مى ماجور

بالتالى فان أى اغنية لها سلم دو ماجور أو (لا) ماينر فإننا نستخدم أى من الـ6 كوردات السابقة لكليهما


الخطوة الثانية :- معرفة نغمات كل كورد
الكورد الماجور له 3 نغمات
النغمة الاولى (اسم الكورد) --(+2)--> النغمة الثانية --(+1.5)--> النغمة الثالثة

و كورد الماينر نعمل عكس الماجور
النغمة الاولى (اسم الكورد) --(+1.5)--> النغمة الثانية --(+2)النغمة الثالثة

و لننظر إلى كوردات دو ماجور و (لا)ماينر كمثال :-
أولا : كوردات دو ماجور
كورد دو ماجور = دو , مى , صول
كورد فا ماجور = فا , لا , دو
كورد صول ماجور = صول , سى , رى

ثانيا : كوردات (لا)ماينر
كورد (لا)ماينر = لا , دو , مى
كورد رى ماينر = رى , فا , لا
كورد مى ماجور = مى , صول# , سى

و لاحظ ان الكوردات + نغمات الكوردات لا تخرج عن سلم دو ماجور أو (لا)ماينر و هذا يؤكد ان حساباتك صحيحة

ساحاول المرة القادمة شرح كيفية تطبيقه على الجيتار مع الصور


الساعة بإيدك هلق يا سيدي 20:36 (بحسب عمك غرينتش الكبير +3)

Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون

Page generated in 0.05979 seconds with 10 queries