الكرة السورية مسخرة
 

فهمنا في دعم لفرق بالدوري على حساب فرق
بس اللي صار بملعب حمص بمباراة سوريا وطاجكستان ابدا ما هو مقبول وهو مهزلة في حد ذاتها ، هل يعقل في دولة تفاوض على الانضمام للاتحاد الاوروبي ان تنقطع الكهرباء عن الملعب مرتين وفي المرة الثانية لاكثر من 45 دقيقة ولا يعرفون كيف يأتون بخط كهرباء في هذه المدة في مدينة حمص التي فيها مصفاة حمص للبترول والتي تعتمد عليها سوريا هل يعقل يا وزير الطاقة ويا من مسؤول عن الكهرباء في حمص الذي حدث والله يجب ان تعاقبوا بعقوبة الرجم لانكم تستحقونها ، هل يعقل ان هذا الذي حدث كان معروض على القناة الفضائية السورية والتي الله يكسروا لايدي من مسؤول عن القناة لانه ذكي الى درجة انه قطع المبارة قبل نهاية الشوط الاول بربع ساعة عن البث لكي تعرض نشرة الأخبار .( للعلم كانت سوريا متقدمة على طاجكستان بثلاث اهداف مقابل لا شيء دمشق)
اريد ممن في هذا القسم والذي يدخل الى هذا الموضوع ان يبدي رأيه بهذا الامر سواء أكان سوريا ام غير سوري.




وهذا هو التعليق على الذي حدث كما اورده موقع الكرة السورية بقلم رئيس تحرير الموقع تحت عنوان ( المهزلة الكبرى!!! ) :
حاولت كثيرا منع قلمي من الكتابة ولم افلح ..
حاولت منع دموعي من الإنهمار من عيني واناأشاهد دموع هؤلاء الشبان تنهار كالشلالات فلم استطع ..
حاولت منع نفسي من الدعاء على جميع من استهتروا بسمعة الوطن واجهضوا جهود منتخب بذل الغالي والرخيص ليمتع الملايين من عشاقه ولكنني فشلت ..
ماذا اقول لكم؟ فكرت في تحويل واجهة الموقع الى شاشة سوداء تحمل عبارة واحدة ( مهزلة ملعب حمص .. وصمة عار على جبين سوريا)!! وبعد تفكير طويل توصلت الى ان خير تعبير عن ماحصل هو الصمت .. لأن الكلام في غير اوانه لن يفيد .
لقد عبر الموقع امس عن عدم قدرته على استيعاب محبتكم الكبيرة فتوقف لساعات نتيجة دخول كثيف قدر بخمسة آلاف شخص في آن واحد .. والملعب البلدي في حمص فشل كذلك في استيعاب محبة الآلاف المؤلفة من عشاق الوطن ومنتخب الوطن اللذين بحت حناجرهم وهم يهتفون بصوت واحد (سوريا .. سوريا ياحبيبتي ) ، ماذا اقول لكم ؟ لقد رسم هذا الجمهور العظيم احلى اللوحات وسطر في المدرجات اروع الملاحم الوطنية فامتزجت الألوان الحمراء والصفراء والخضراء والبرتقالية والبيضاء والزرقاء واصبحت جماهيرانديتناجميعها قلبا واحدا يخفق لمنتخب الوطن وكأنه عرس حقيقي .. ولكن للأسف !!!
أنا مع المنتخب منذ عصر يوم أمس .. تابعت لقاءهم وتابعت تصميمهم على الفوز ولكن أبت مهزلة الكهرباء إلا أن تسرق فرحتهم وتصادر حقهم الطبيعي في أن يفوزوا وبفارق الأهداف ،الوجوه العائدة إلى الفندق كلها كانت واجمة والدموع تفيض أنهارا حتى مدرب المنتخب بكى بحرقة قائلاً : ارحمونا .. حرام ما يحصل الصحافة تهاجمنا .. وبعض المغرضين يشتموننا .. والان يسرقون فرحتنا بالفوز .. والله حرام .
لم تنم الأعين حتى طلوع الفجر والصاعد إلى الطابق الأول في فندق سفير حمص كان سيفاجأ بأكثر من عشرين لاعباً سورياً يصطفون لصلاة الفجر في الممر الطويل ويأّمهم ( الكركر ) وهم يدعون بصوتٍ واحد ومن قلب محروق ياااا رب .
عند التاسعة من صباح هذا اليوم جاءنا الخبر المفرح من الفيفا .. ستعاد المباراة عند الخامسة والنصف من مساء اليوم على نفس الملعب، وقد أعيدت المباراة وأثبت اللاعب السوري قدراته رغم العقبات التي تكاد تحس بأنها مقصودة وربحنا طاجكستان وعمت شوارع حمص (من الملعب البلدي إلى الساعة العتيقة مروراً بالحمرا والدبلان) مسيرات لحشود فرحة وكأنها تستهزئ بالذي كان السبب في القطع.

المهم اّخر شي ربحنا

والله يا ماجد سبقتني عل الموضوع لاني ملؤم اكتر منك :x

يلا شو بدنا نعمل :cry:

كم كانت النتيجة النهائية؟؟؟ :?: :?: :?:

انا سمعت انو تم تعديل النتيجة و خسرنا تنين صفر! انا هيك سمعت و الله

كش برا وبعيد.......

مع أنني لا أتوقع إن تأهلنا للدور الثاني من التصفيات إلا أننا رح نتشرشح، بس يعني هادا منتخبنا الوطني ما هيك؟؟؟ يعني رح نضل نحبه.....

شباب انعادت المبارة واربحنا اتني واحد نحنا الافضل دائما

و الله يا شباب أنا كنت بالملعب وقت المبارة نهار الأربعاء 9/6/2004 و كان الملعب متل ما بقولوا مالك أجر دوس جد مليان كتييير
و الحلو أنك تشوف جماهير الكرامة و الوثبة مع بعض و هادا غير جماهير الاتحاد و الوحدة و كلو جايب هالطبل و محضر حالو
و طبعاً بلشت المبارة بداية مرتبة لفريقنا و انهى الشوط الأول بتلت أهداف ألنا مقابل لا شيء لطاجكستان و طبعاً بالوقت نفسو الجمهور ماهدا بالتشجيع و الرقص و عالم أعدا عم تدبك و هيك .... يعني تحولت مدرجات الملعب لعرس بين الشوطين (بالاستراحة ) بس المشكلة و التي أصابة الجماهير بالصدمة الكبرى أنو بعد مضي ربع ساعة عن بداية الشوط الثاني فجأة وقت اللاعب الطاجكستاني بدو ينفز ضربة حرة ما منشوف غير حل الظلام على الملعب و الإضاءة كلها انطفت بس يا حزركن وين المنظر الحلو وقت الجمهور الغانم يشعل قداحتو أم صار منظر كتييير حلو على داير الملعب و صار الجمهور بصوت واحد يغنو( هابي بيرتي تويو) و بعد شي 20 دقيقة عاد التيار استأنف اللعب بس للأسف أنو منكتر الاهتمام و الفهم عنا و لجنة الإصلاح المرتبة يعني رجعت انقطع التيار مرة تانية بالملعب بعد هدف طاجكستان و مو هون النهفة النهفة أنو أبراج الإضاءة أعدت تأدح يعني احترقت و صار الجمهور يعيط بهدلتونا و من هالنداءات المعارضة غير المسبات و ما شابه ذلك .... و بعد مضي 25 دقيقة و هادا الوقت المحدد بالفيفا لتصليح الملعب جمع الحكم الفريقين
و اعلن انهاء المبارات و رفع القرار للفيفا ليقرر مصير المبارة و طبعاً طلعنا من الملعب حزينين و خاصةً بعد ما شفنا منظر اللاعبين و خاص الحارس محمود كركر الذي انهار على الأرض و حملو حمل لبرات الملعب يعني فعلا يا شباب منظر فريقنا مع الإدارين كان بأثر لدرجة :cry: :cry: لأن الذنب مو ذنبن ابداً و الله بعدين طلع الجمهور من الملعب بمظاهرة مرتبة يعني معارضين على الأحداث لصارت بعدين و تاني نهار اسمعت الخبر الحلو الذي اعاد الأمل لي و أكيد لجميع الجماهير السوريا بأنو الفيفا الله يكترلنا خيرا تعاطفت علينا و قررت إعادة المبارة و طبعاً ما رح أقدر أوصفلكن فرحتي ابداً
و هيك رحت على الملعب صحي كان الجمهور كتييير بس مو متل أول مبارة و اكيد كانت مبارة حلوى بالرغم من التفعيسات الكتييرة لفريقنا بس برجع بقول انو الذنب مو ذنبن يا أخي منيح ربحو لأنو دخلو بالشوط الأول مالن نفس يلعبوا بس بالشوط التاني اشتغلوا منيح و بعدين انتهت الأزمنة بانتصارنا الحمد لله و طلع الجمهور من الملعب هالمرة مكيف و فرحان كتيير و دارو الشوارع حاملين علم سوريا الكبير مع التشجيع ......
بس يلي صار ما لازم ينسكت علي أبداً و لازم يتحاسب كل شخص مسؤول عن هالعمل يعني حسب ما قرأت في صحيفة تشرين
أنو الانقطاع تكرر مع الفريق اثناء التدريب أكثر من مرة و تم إصلاحه حسب تقريرإدارة الملعب لفيفا و على اساس الملعب صار جاهز
يعني إهامال كتييير كبير
ماشي أكيد طولتا عليكن و مللتكن بحكي و هلء رح تقولوا لعمى شو بيحكي كتييير بس انا كتبت هالطفاصيل لأنو كنت كتييير
محروق و معصب :evil: :evil: :evil: لدرجة كبيرة من الذي صار بس الخفف شوي أنو ربحنا أخيراً

والله الحقيقة هي أول مرة بكون الحق مو عالمنتخب لأنو كان أداؤا منيح بالمبارتين، ومع أنو كان بالمباراة الثانية المستوى أقل بس ماحدا بلومن لأنو كانوا عم يعانوا من الضغط وخيبة الامل.
وضلوا طول الليل سهرانين بفندق السفير وفعلاً كانوا زعلانين.

والله أبطال هالشباب لأنو موسهل بنوب الي صار معن .
أنا أول مباراة كنت بالملعب وكنت حاسس حالي بعرس حقيقي لأنو هاي أول مرة بحضر مباراة للمنتخب وكمان أول مباراة عالأضواء الكاشفة يعني ( كنت عم حقق حلمي) وحطينا تلات غوال . وقلت للشباب رح يصيروا سبعة وكنت متفائل لأنو الفريق كان بأفضل حالاتو وعم يلعب متير منيح بس لما انقطعت الكهرباء أول شغلي قلتها :( يا شباب خسرنا 2-صفر) لأنو هيك القانون بيقول.
وتاني شغلة قلتا:(اليوم عيد ميلاد مهندس الصيانة) ومين بيعرف بجوز عيد ميلاد الحكم ماحدا بيعرف!!
ومتل ما قال رواف امتلأ الملعب بالقداحات والمثير للضحك أن القداحات ممنوعة بالملعب والشرطة هنيك عمبتفتش آل وبدون تهويل كان في فوق العشر الآف قداحة على مدار الملعب . وبالفعل قالوا هابي بيرزداي تو يو بس ماحدا كان عرفان لمين :? ولما رجعت الكهرباء أول مرة قال اللي قدامي ( لا تواخذونا يا شباب أماني) وذود عالضحك .
وعينك تشوف وتسمع الجمهور لما انقطعت تاني مرة. ما كانوا معصبين ومقهورين بنوب :!:
عكل الأحوال الله يعطين العافية مو سهلة أبدا أنو يلعبوا أكتر من 180 رقيقة بظرف 21 ساعة .
والله كبير.

أنا كنت بحلب نهار المباراة، وكان فلبي محروق لأنو ما رح أقدر كون بالملعب وخصوصا مع تسجيل الأهداف الثلاثة في الشوط الأول.. بس بصراحة وقت شفت هالمهزلة شكرت ربي أنو ما كنت بالملعب لأنو أكيد كان رح تجيني شي جلطة!!!!
بس الشي المنيح بالموضوع أنو الاتحاد الدولي قرر يعيد المباراة وما يعتبرنا خسرانين..
والشيء الحلو كمان أنو رئيس الوزراء كان موجود بالملعب وحمل حالو وراح أول ما انقطعت الكهرباء (بصراحة ظنيت أنو ضو ساجته هو يلي كان عم يضوي الملعب!)..

بس فس شغلي تاني بتزعج أكتر هي أن الحالة تكررت في النهار الذي سبق المباراة أثناء تدريب الفريق، بس المسؤولين عن الملعب قرروا أنو المهزلة والشرشحة والخيبة لازم تكفي ولازم إذا ظبطت شي مرة معنا بأداء حلو يجي حدا يخربها علينا..

أنا عم أتصور شو موقف البحرين (منافسنا بالتصفيات) وقت سمعو الخبر!!!!! لك الله يلعن الذل يا جماعة...

و الله و أنا كانت أول مرة بحضر مبارة لفريقنا بالملعب و بيني و بينك هي اول مبارة بتسير عنا على الأضواء الكاشفة منهيك انقطع التيار
بس أنا اليوم كنت عم اقرأ الصحافة و تم إقالة مدير الكهرباء طلع السبب من شركة الكهرباء عنا بحمص
:wink: :wink:

هاد بدو إقالة... اي هاد بدو رجم هوي و أمثالو :evil:

شو هل مسخرة و الذل يا ناس
:x :cry: :x :cry:

يعني تخيلوا أعضاء الاتحاد الدولي لما سمعوا الخبر... هيك عم بتخيلون قاعدين بغرفة الاجتماعات و عم يضحكوا علينا.. و يقولوا.. اي يالله حرام خلينا نعطيون فرصة تاني... بس ما تنحرق اللمبات عاد :roll:
:cry:

يا شباب سكرو على المضوع تشرشحنا بما فيه الكفاية و بتكون طلعت هلأ علينا شي مليون نكتي :cry: :cry:
يعني والله نحنا الحماصنة ما منستاهل :cry:

عاد يا زلمي نحنا الحماصنة ما ناقص نكت علينا.
أصداء نهفاتنا ونكتنا واصلة لكل العالم وهاي وحدة منهم

أولتك أخي ماجد هاي وحدي من نهفاتنا
وعفكرة أنا حكيت شو صار لأستاذ التاريخ هون عندي بأميركا بس المشكلة أنو مافهم شو يعني أنقطعت الكهرباء
لأنو طول حياتو مانو شايف ولا سمعان بأنو الكهرباء بتنقطع :o :cry:

شمستنا الله يسامحك :lol:
:D

هادا أستاذك بكون عم يقول بينو وبين نفسو: (عيش كتير بتشوف كتير وبتسمع كتير) طبعاً بالانكليزي الحكي