اقتباس:
|
شوف ياعيوني انت وقت استخدمت كلمة "حضرتك" عرفت فورا انا انو الحديث دايئك وبغض النظر اذا كنت سمعان فيه انت او مو سمعان.
|
1) يا ريت هاي "يا عيوني" توفريها لأنو لا في موانة بيني و بينك لحتى تحكي معي بهالطريقة, اذا عاطية حالك الحق بالتقرير اذا عم احكي باستخفاف أو لأ فكمان معناتا الي الحق اعتبر انك عم تحكي معي باستخفاف
2) كلمة "حضرتك" بستخدمها و بكثرة عند حديثي مع ناس ما بعرفهون, صيغة احترام يعني... لذلك التكهنات هاي اللي من عندك بلاها لأنو مانك براسي لحتى تعرفيها و لا يحقلك تتهميني بشي ما عملتو الا بمخيلتك
اقتباس:
|
يعني صحيح انا مو دارسة لغة عربية بس يعني مو لهلدرجة حتى ما اعرف شو مضمون ردك بعبارتك , كان فيك تسأل بطريقة تانية مثلا: فيكي تخبريني عن الموضوع , ياريت تعطينا تفاصيل اكتر , شو مدى صدق هالمعلومة والخ........
|
طيب سؤال هلأ بدك تصيغي سؤالي انتي؟ تعي ردي عني فرد مرة و خلص اكتبي براحتك
اقتباس:
|
على كل حال انا مافيني قول شو بدك تحكي او ماتحكي انت او غيرك بس انا من حقي اني رد عليك بطريقتي وقت بشوف رد فيه قلة احترام ولاتنسى كلمة "بالله" وخاصة حرب الباء وموقع الكلمة في الجملة .
|
بلهجتي.. بلغتي.. بطريقة حكي أهل منطقتي.. بنقول "بالله" بشكل اوتوماتيكي لما نطلب شي من حدا... بمثابة لوسمحت... طبعا حكيي ما يجدي طالما في سبق افتراض بسوء النية
اقتباس:
|
وبرجع بذكرك انا لو مو مفتوح هيك موضوع انا ماكنت كتبت ولا حطيت هالتساؤل بس وقت شفت هالموضوع وهالظاهرة يلي حكا عنها صاحب الموضوع طلبت منو يحكلينا عن الظاهرة التانية يلي بسوريا منتشرة وخاصة انو صاحب الموضوع على ما اظن له خلفيات من فتح هيك موضوع .
|
صاحب الموضوع فاتح موضوع عن أمر معين و انتي (كون ما خرج نستعمل حضرتك) جبتي سيرة شي تاني تماما.. و قلنا نستفسر...
اقتباس:
وبما انك ابن المنطقة الشرقية ففعلا مومحتاج حدا يقلك شو عم يصير وانا بكلامي قلت انو هي الظاهرة بكل سوريا وخاصة المنطقة الشرقيةو وبلشت هنيك وانا بكلامي ما عم ذم لا اهل المنطقة الشرقية ولا الجنوبية ولا اي منطقة نحنا كلنا اهل .
فوقت عم تقول اكل هوا يا عزيزي هالشي انا مو جايبتو من بيت ابي وبغض النظر حتى "لو" انا عم افتري عليكن انت ببساطة بحكم اولا عندك معلومات عن الموضوع وثانيا ابن المنطقة الشرقية ان اولى من غيرك ترد على هالشي بكل وضوح وشفافية وتبيلنا الصح من الخطأ
|
1) لما قلت أكل هوا عم اعني الحكي اللي عم ينحكى بمواقع انترنيتية (و فيكي ترجعي تقري ردي)و ما قصدت كلامك بأي لحظة.
في الي موضوع عن هالشي بالذات.. و هاد رابطو:
http://www.akhawia.net/showthread.php?t=100648
و في موقع آخر ... تحديدا منتدى مصري لقيتو من فترة .. حاطين فيه موضوع طويل عريض بذم رؤوس التشيّع بمنطقة الجزيرة السورية ( واللي حاط الموضوع يفهم من سياق كلامو انو منتمي للاخوان المسلمين) و من ضمن الاسماء اللي حاطها حاط اسم عمي أخو أبوي.. و السبب بسيط.. عمي خريج تاريخ و عامل دكتوراه بالتاريخ الفارسي و زاير ايران بسبب دراستو و تعاونو مع جامعة طهران بهالمجال من قبل الثورة حتى... عملوه متشيع رغم انو من أقدم أعضاء الحزب الشيوعي السوري بالمحافظة و مازال (يبدو في التباس عند الأخ صاحب الموضوع بين شيعي و شيوعي).
2) يكفي, متل ما قلت سابقا, معرفة نذر يسير من التوزيع الديمغرافي لمنطقة الجزيرة لمعرفة انو أغلب المقالات عبارة عن هراء ... و المضحك انو ماسكينها عالجزيرة بسبب المسجد اللي عملوه الايرانيين بالرقة عند قبر اويس القرني و عمار بن ياسر , هالمسجد بلشو عمل فيه بالاشتراك مع الاسكان العسكري بالـ 85 و مشانو دمرو مقبرة الرقة القديمة و ما حدا ضاج.. أهل البلد قلنا بالكي بكرا يجو سياح و يحركلنا البلد, و هلأ من كتر التخويف و التهويل من حملة التشييع صار الواحد ما يسترجي يمر من قدامو أو يدخلو اذا خايف ع سمعتو يقولو عنو متشيع... مزبوط عملوه الايرانيين بس هالشي لا يعني انو عاملين حملة تشيع.. و المضحك انو عبد الحليم خدام صارع ربنا بقصة حملة التشيع لما كل المشاريع بلشو فيها لما كان هو نائب رئيس سوريا.. وين كان صوتو؟ بعدين بس الايرانيين عم يفتو مصاري ع دور عبادة؟؟؟ هو هالجامع بالرقة عاملينو الايرانيين مقابل فوق العشر جوامع مولوهون ناس من السعودية و جابو عليهون شيوخ سوريين مهاجرين بالسعودية و حطوهون يعلمو الناس المذهب الوهابي و عينك عينك .. ليش الاخوان ما يحكو عن هالشي؟
سمعنا من المقالات و سمعنا حكي عالم ... أنا ما شفت شي.. ما شفت هالايرانيين بالشوارع عم يوزعو مصاري عالرايح و الجاي متل ما العالم تحكي.. ذاتا 80% من زوار الأضرحة السابقة الذكر لبنانيين .. و ما بنكر انو بمنطقتنا في ظل النزعة الدينية الوهابية المستوردة من كثرة المهاجرين بالسعودية صار اذا بدك تقضي ع سمعة واحد تقول عنو متشيع و خلصنا.. ما بيهمني ازا عاملين حملة أو ما عاملين حملة.. اللي شايفها حملة بشكل واضح هيي حملة الاخوان ضد حملة التشيع الافتراضية اللي عم تكرّه الناس ببعضها و عم تزرع طائفية شوي شوي... كل يوم نقرا مقالات قال انصرو اخوانكم السنة في ديار الشام و حاربو الرافضة الصفويين و من هالحكي... شو من وراها رح يجي؟ تفجيرات بالست زينب؟ يصير اللي ما فيو يفجر حالو بالعراق يجي ع سوريا؟ الله يستر...
انو مافي شيوخ يدعوون لعقيدتهون؟ بالتلفزيون و عالراديو و بالكتب و محاضرات و كل شي؟؟ يعني حتى لو في شيوخ شيعة شو المشكلة؟ كل واحد يعتقد اللي بدو ياه و كل واحد ع دينو الله يعينو
اقتباس:
|
, فما كان بدا هالضوجان كلو وتطلعني وكأني انا شي وحدة عم تفتري على الناس , فروق وطول بالك وهدي اعصابك لأنو نحنا بحاجت
|
و الله انا ما ضجت.. حضرتك يبدو حللتي نفسيتي و قررتي من عندك كيف احكي و كيف لازم احكي ...
و شكرا