[اممي]

بعد فترة من لما بتبلش بتبحلق بالعالم الي رايحة والي جاية قدامك بالشارع راح تنتبه ان معظمن الهن شي كتير مشترك ,يعني ملامحن ,ممارسات الحياتية احاسيسن وكتير شغلات تانية
كلن بيفيقوا وبينامو وبياكلوا بيسمعوا وبيحكوا وبيروحو للتواليت
الشب ناطر شي بنت لينام معها والصبايا ناطرين عريس الغفلة حتى الفلومة الي بتصير معنا تقريبا ذاتها
هلق صحيح ان كل واحد عند اسلوب بس المعدن واحد ,شي بيشبه هاللعب الي علي كيس الخيش الي قدامي والفرق بين اللعبة والتانية شي فرق صغير بالتصنيع بيعطيها شكلها المميز
مابعرف بس مرات بفكر ان كلنا عايشين نفس الحياة مع مراعات الفوارق الزمنية لنكباتنا ونجاحاتنا وان كلنا ماشين بنفس الدويرة الي عم تدور من لما خلق هالكون لدرجة ان صار عندي ثقة ان اذا جمعت 10 اشخاص وقاطعت بين ذواكرهن واحلامهن فيك تلاقي شبه بنسبة 90%
ومن هالاستنتاج الخطير يمكن انا وبو سومر عايشين نفس الشي
بو سومر:ر(مدير عام كان جارنا لماكان موضف وحاليا بيملك نص احدا المحافظات عنا من خلال راتب الي بيساوي 15 الف ليرة )
طيب اذا كانت كل اللعب فيه الطفل بينبسط فيها وكلها بالنهاية رايحة للكسر فليش لتنباع لعبة ب5 ليرات علي بسطا والتانية ب5000 ليرة بواجهة محل بابو رمانة....بتعرفوا يعني رغم اني برفض قانون القناعة بس عندي ركبة السرفيس عالواقف فيها بتحسسني بانسانيتي اكتر بكتير من طلعتي بشبوحة الرفيق بوسومر...ولو روحت علي حالي شرف ان يكون بوسومر شوفيري