[Abu ToNi]

بالعربي

فلان ( بعد صمت طويل وطويل جدا ..) : بالعربي ...
علتان ( متأملا بكاسة الشاي اللي بايده ): شو بالعربي ؟
فلان : برنامج تلفزيوني ...
علتان : أني منهم ...
فلان : بالعربي ...
علتان : لك اي فهمت .. بس أي واحد منهم .. ؟!
فلان : هيك اسمه .. بالعربي ..
علتان : ما عرفته ..
فلان : لك هاد اللي بساوا فيه مقابلات مع شخصيات مهمة
علتان : ها... اي اي اي .. عرفته .
فلان : مُغرق بالصراحة .. اكتر برنامج صريح بالمحطات العربية قاطبةً ..
علتان : اي يمكن لأنك ما بتشوف غيره .. في برامج صريحه متله
فلان : شق .. ما في
علتان : إلا لا في .. بعدين حسب الشخص اللي مستضيفينه .. شو عرفتك انه عبيحكي بصراحة .. شو عرفك اذا ما كان عبفنّس علينا على كيفه
فلان : انا ما عمّا احكي عن اجوبة الناس اللي عبيعملوا معهم مقابلات .. مو هون الصراحة بالبرنامج
علتان : لكن وين .. ؟! باسئلة المذيعة ..
فلان : شق السؤال سؤال .. ما فيه صراحة وغير صراحة ..
علتان : لكن وين الصراحة ؟!
فلان : الصراحة بعد البرنامج ..
علتان : والله كانك عبتحكي الغاز ولا انا غلطان !!
فلان : لا مافي الغاز انا عما احكي واقع ..
علتان : يا اخي .. شي بتقول لي البرنامج صريح .. شي بتقول لي الصراحة بعد البرنامج .. بعد البرنامج شلون صراحة ؟!
فلان (مجيبا ): بعد ما يخلص البرنامج بيطلع لك واحد ..بدج لك ياها دج بين عيونك وما حدا منتبه
علتان : شو هية ؟
فلان : بقول لك ياها هيك بلهجة خطابية .. بالعربي ..
علتان : وين الصراحة فيها ؟!
فلان : مو فيها .. بعد المنها
علتان : وشو بعد المنها ؟!
فلان : بعد ما يقول بالعربي .. بقول برعاية .. فورد ( ضحكة مكتومة )
علتان : لك اي عادي .. لك اي كل برنامج واله راعي
فلان : مزبوط ما عمقول لك لا .. بس مو فورد ...
علتان : يعني شو فرقت معك اذا كان فورد ولا غيره
فلان : كتيير ... لأن بين كل الرعيان .. فورد بالتحديد ها .. مستحيل يرعى بالعربي ..
علتان : ها .. اي
فلان : ان شاء الله بدهم يتضحكوا علينا ..قال بالعربي ( ضحكه محششة ) .. مصخرة

ما رح تزبط معك

الفيديو