[Ms. J.A]

اهلا لموش وكل الاحترام الك
بس انتي كانو شوي متعصبة برايك
بالنسبة للمعالم يلي هو اكثر اشي لفتني بردك
انتي ما قلتي اشي غلط .. فعلا بتمشي بالشارع او بتفوتي على محل بتحسي حالك غريبة ببلدك.. يعني العادات مش العادات يلي بتعرفيها وتربيتي عليها الملابس التصرفات حتى القوانين .. بس الهوية العريية بعدها موجودة فينا .. صعب الانسان يصدق شو في بقلب الواحد لانو الاشي الموجود بالقلب ما بينشاف والناس الها الظاهر ..

هلا فيك خيتو واسفة هلأ لانتبهت للرد.. وانا هاد اللي بحكي عنو اسرائيل بتحاول (تهوّد) كل شي تطمس كل معلم من المعالم العربية في كل محل.. حتى الموسيقى والأغاني وكل اللي بتحكي عنو ما بتتأثر فيه بتنسخو ليصير جزء من ثقافتها هي.. والموضوع مش واقف عالمحلات والشوارع والاغاني الموضووع وصل للبني ادمين.. حتى اللي مش عايشين ضمن الاراضي المحتلة واراضي ال 48 في محاولات انو يطمسو هويتهم بس الضغ علينا اقل، الاحتكاك المباشر معهم، سيطرتهم الكاملة على التعليم اللي بتتلقوا، وأشياء تانية كتير غيّرت فيكم كتير، تعاملت مع ناس من عرب ال 48 بيستخدموا المصطلحات العبرية اكتر من العربية، بسمعو عبري اكتر ما بيسمعو عربي وفي نسبة منهم ما بتعرفش شو اللي بيصير بالبلد، ومرة تانية ما بقصد التعميم بس بطرح فكرة موجودة

يعني انا ما قصدت بكلمتي انو بدعم التعايش يعني اني مش وطنية وانو نسيت عروبتي وعاداتي واحاكم ديني الاسلامي وعاداتي العربية..

في يهود مغاربة ويهود مصريين ويهود عراقيين ويهود سوريين ويهود يمنين ويهود من كل محل في الوطن العربي كانو عايشين كمواطنين يحملون جنسية البلد اللي هم منها، في يهود سامريين كمان في فلسطين وهدول مش مع اسرائيل هدول مواطنين فلسطينيين الهم اللي النا وعليهم اللي علينا وعايشين معهم بتعايش كامل..التعايش مع اليهودي اشي ومع اليهودي الاسرائيلي اشي .. فكرة التعايش يعني حل دولتين، والحل هاد اسرائيل مش قبلانة فيه ومن ناحية انصاف فهو مجحف بحقنا لأن كل ارضنا راحت ما عنا سيطرة ع موادر ولا حدود برية ولا جوية ولا حتى عالبحر ما اتهمتك بعدم الوطنية بس فكرة حل دولتين فكرة ضد المقاومة..والتعايش يعني سلام يعني بدنا نبيع كل اللي عملنا ونرجع لنقطة الصفر..

بالنسبة لنط اللبس انتي بتعرفي اليهود كيف بيلبسو فش داعي نحكي بس مش معناها انو الشخص العربي يلي بيلبس مثلهن او بيتصرف مثلهن انو هو قاصد يكون هيك .. لانو بكل مجتمع في الملتزم وفي لي مش ملتزم
يعني عندكو بالضفة مش الكل ملتزم وبي بلد بالعالم مش الكل ملتزم .. فيه ملتزمين وفيه بيلبسو اقطع من اليهود
مثل ما في عرب48 مش ملتزمين في منهن ملتزمين بالدين وبالحجاب.. ومثل ما في يهود بيلبسو قصير وممزع في يهود متدينين وما ببينو جسمهن ( انتي بتعرفي كيف اليهوديات المتدينات بيلبسو صح؟؟؟)

العرب بكل مكان بالدنيا مش صعب ابدا يستجيبو لأي تيار بيحفزهم يصيرو عايشين عالنمط الغربي، انا ما بحكي عن حجاب بس بحكي عن شوية التزام بالقيم اللي عنا اياها، القيم العربية اللي بتخص المسلمين والمسيحين واليهود العرب واي انسان عربي، بيجوز في تقليد للغرب بمناطق منفتحة بس زي ما قلتلك قبل الضغط اللي علينا مش زي الضغط اللي عليكو لهيك صعب تقارني الوضع بالضفة بالوضع بالمناطق المحتلة عام 48

التعايش دايما بابو مفتوح .. وهو باب صغير وعالهامش الاغلبية بترفضو وما بيرضوه لانو اليهود محتلين
هني صح محتلين .. بس الاساس بالدين.. اذا غدرت تقنع اليهودي انو دينو غلط ويلي من معتقدات دينو انو فلسطين هي ارض الميعاد راح يختلف الوضع
سبق وذكرت انو في يهود بيعترفو انو فلسطين هيي ارض من حق الشعبين الفلسطيني واليهودي .. ومش من حق شعب منهن يوخذها لألو.. ومن هادا المنطلق بحكي على التعايش يلي راح يقرب الافكار والعقول من بعضها واكيد الاديان..

طيب بدي اسألك سؤال شو بدو يصير لو صار في تعايش بين العرب واليهود وكيف بدو يصير الوضع؟
ممكن تبطلو تعاملو كطبقة دنيا تأتي بعد اليهود الشرقيين ؟؟ ممكن ما تنتقص حقوقكو ؟؟؟
بعد التعايش حتصيروا مواطنين تحملون الولاء لمين ؟!
وشو متوقعة التعايش يحققلكو؟
احترامي الك