[jano.]

فلم اسباني اسمو Mar Adentro
أو بالانكليزي The Sea Inside
أقل ما يقال عنو انو رائع!موضوع الفلم هو عن "الموت الرحيم"


بطل الفلم "رامون" بحار سابقاً، صار معو حادث أثناء السباحة وانكسرت رقبتو وصرلو من 26 سنة مشلول شلل كلي، فيه بس يحرك راسو... ورغبتو انو يموت لكن كل افراد اسرتو عارضوه وبشدة. بعدين اتعرف على تنظيم ينشط في سبيل جعل "الموت الرحيم" أمر قانوني في اسبانيا.
رامون يرغب وبشدة ان يموت لانو عم يعيش عيشة ذل وعم يتعب اقاربو معو، انسان مرح وشخيتو قوية، طبعا بيشتغلو بعدين المحاكم والمعاملات القانونية ورح تصير قصة حب بينو وبين محاميتو ورح يكون صداقات كتيرة، مع هيك ما حدا بيقدر يقنعو انو يتراجع عن قرارو..
اكتر شي عجبني بالفلم هني حوارات رامون مع الاشخاص التانيين ولما بيحكي بتحسو لابس الدور عالمزبوط وكأنو شخص حقيقي عم يحكي قدامك... كمان حبيت بالفلم الشخصيات الريفية كيف اتقنو أدوارن الي صورت بساطتن وخاصةً مرت أخوه وابن أخوه (في مشاهد فكاهية حلوة بين رامون وابن اخوه) وكمان صديقتو "روزا"..

الفلم بشكل عام مؤثر وخاصة كيف الناس بتحكي عن الموت وتتعامل مع الموت وكيف رامون بيحلم بالبحر و و و
ما رح احكي اكتر.... بس الفلم خرج انو ينحضر ويحتفظ بنسخة منو كمان...