حياك الله أبو طوني...
كنت رح رد عليك هنيك بس جينا و جينا منرد هون..
هون في إشكاليتين, إشكالية عامة للمجتمع "الإسلامي" (و نعني فيه دولة ذات غالبية مسلمة) و إشكالية خاصة بالمسلمين بأوربا
الإشكالية العامة جاية من انو تصادف انو أغلب المجتمعات الإسلامية واقعة تحت ظروف و عوامل ذاتية و خارجية أدت إلى انو تكون متخلفة, و هالتخلف بيعطي عقدة نقص تجاه الآخرين يجعلهم يدخلون بمنافسات أحياناً حتى غير موجودة لتحقيق حبكة ملتوية للوصول إلى انتصارات وهمية تعطيهون مثل بلسم لذاتهم الجريحة, منيح؟
تلاقي أخبار تافهة مثل خبر سيريانيوز مبارح عن انو اسم فيروس الانفلونز من أصل عربي (أنف العنزة
) و انو فلان أصلو عربي, و فلان جد أبو تيتة أم أبوه مرق بالبلد الفلاني فصار الهون حق فيه (لاحظ انو كل كبار التاريخ حسب العرب هم إما من أصل عربي أو مسلم "ع أساس" و بالتالي محبوبين.. و إما أصلهم يهودي و بالتالي مكروهين.. بيطلع مافي مسيحيين بهالعالم).
لاحظلي أوباما... اللي لسى ما قررنا إذا نحبو أو لأ... هو مبدئياً نكرهو بس لو شفناه عمل شغلة منيحة رح نصرع الدنيا بانو هو نصف مسلم (أبوه اللي ما رباه و لا عاش معو قال مسلم) و تلاقي بأكبر الجرايد أخبار عن قال جماعة تبشيرية كان بدها تعمّد جدة أوباما (المسلمة, و انت حطلي خطين تحت مسلمة لأنو هيك بتجي بالجرايد) و نعمل نظرية مؤامرة من هالحكي لأنو هدول الغرب المسيحي اللي هو عالّة على حضارتنا بدو ينصّر هالمرة و بالتالي يسرقوها من المسلمين.
لاحظ هالنوع من الأخبار و نظريات المؤامرة و هالحكي الفاضي ما بتلاقيه بدولة مسلمة متطورة مثل ماليزيا... لأنو مانون بحاجة لمحاولة إثبات ذاتهم لذاتهم بهالطريقة... بس نحنا محتاجين لأنو ما عم ننجز شي, و بتلاحظ انو الماليزي رغم انو ممكن يكون مسلم و متديّن جداً لكن ما يدخل حالو و ثقافتو بصراعات تناطحية مع غيرو.. لأنو تعلّم اللي بعمرنا ما رح نتعلمو... انو مش نحنا شعب الله المختار و باقي البشرية "خطأ من الطبيعة"..
نحنا فوقيين ضد غيرنا, ما منعتبر حالنا ثقافة من الثقافات انما نحنا "ألثقافة", ما بنفكّر بانو ديننا هو دين من بين عشرات الأديان و إنما هو "ألدين" ... و رغم انو طبيعي انو الواحد يعتبر دينو هو الصح و لكن قمة عدم الاحترام و ضيق الأفق عندنا هي انو نحنا نعتبر انو شي مش طبيعي انو مسيحي ما يجي يعترف و يقلك انو الاسلام أحسن من دينو... بالعكس هاد عنصري و حاقد على الإسلام لأنو ما عم يعترف بمكانتو رغم انو نحنا سامحيلو يعيش بهالعالم اللي هو إلنا و فقط إلنا...
هالعقلية ساهمت بخروجنا من التاريخ.. و ساهمت بانغلاق عقولنا بشكل عام و بإغلاق عقل كل من يتجرأ على محاولة فتحو من بيننا... و على اعتبار هالعقلية ما تتناسب مع الواقع اللي عم يفرض انو نحنا متخلفين, و بالتالي عم نضحك على حالنا و مستغربين ليش باقي العالم مو مصدقنا..
لاحظ ما حكيت عن خصوصيات عقائدية للمسلمين تميزهم عن غيرهم... ممكن مسيحي يكون هيك.. و اليهودي هو هيك بشكل عام
كل هالحكي المطوّل لأوصل انو نسبة كبيرة من المهاجرين المسلمين إلى أوربا (و نعم هم نسبة كبيرة لكن ليسو الأغلبية, بس المشكلة انو صوتهم عالي و زعبرتهم مستمرة) عم تهاجر على دول متطورة بعقلية عم تقول "أنا احسن منهم بس الزمن عاطل"... و بالتالي هو بدو يثبت كيانو هنيك و ما بدو يتأقلم مع الوضع هنيك و لا حتى بدو مثلاً يوقف ع طرف و يعيش حياتو ع كيفو... لك توصل معو انو يفكر انو هو مفضّل ع أوربا بإنو تنازل و عاش هنيك .... و هالشخص في حالة بحث مستمر عن نقاط صراع ليدخلها و يدخل معها إجباراً بقية المسلمين.. و مثل ما تكرّمت بمثال فرنسا و أمثلة كتيرة مثل كمان مثال قضية البنت الموريتانية اللي كتبت عنها موضوع من فترة .. أو قضية إمام فوينخيرولا (مدينة صغيرة بكاتالونيا فيها نسبة منيحة من المسلمين من المغرب خصوصاً لأنو حواليها معامل كتيرة) اللي لليوم ما سكت و لساتو يزعبر, و قصتو هي التالية: من كم سنة و جاي في حساسية شديدة من قبل الحكومة الاسبانية و الشعب بشكل عام تجاه قضية العنف المنزلي.. و حملات توعية رهيبة و مساعدات و جمعيات حماية و تعديل قوانين و الخ الخ الخ... فراح التافه هاد (اللي الزمن خلاه إمام جامع) بعز الحساسية و بعز الالتزام الشعبي تجاه قضية العنف المنزلي.. راح و نشر كتاب بيهاجم انتقاد العنف المنزلي و يشرح فيه كيف فيك تضرب إمرأة بدون ما تترك آثار و بالتالي ما فيها المرأة تروح عالطبيب الشرعي تثبت هالشي... فطلبت الحكومة من المجلس الإسلامي يشيلو من منصب الإمامة و ادعت عليه كوم جمعيات حقوق مرأة و تحاكم... إي صار ينط و ما يحط على اسبانيا الكافرة اللي تتجرأ و تحاكم إمام على كتاب مانو خاطئ بحسب الشريعة الإسلامية (حسب رأيو) و شو عليه لو فيو جناية بقوانين الدولة لأنو تحريض على العنف؟ طز بالدولة شو يعني دولة... أصلاً الدين عند الله الإسلام و لازم شريعة الله تكون بكل الأرض و هدول كفرة صليبيين الخ الخ (دوّر بالمواقع و المنتديات تلاقي شي تسالي كتير عن هالقضية
).. و صارلو مريدين و أنصار و صار بطل قومي هالإمام..
هون بتصير, مثل كل الحالات... انو مريدين هالشيخ يعملو ضجة كبيرة و يحولو القضية من قضية واحد متخلف عم يسيء استخدام مكانتو الدينية (اللي ما بعرف كيف وصلها) و عم يسيء لدينو خارج أرضو... لقضية عنصرية ضد الإسلام.. و في كتير مهاجرين بسطاء ممكن يتغرر فيهون بهالحكي بسبب فرط حساسية المهاجر و خصوصاً إذا جديد, و لأنو من السهل يكون صار عندو خيبة أمل من هالغرب اللي فكر انو رح يوصلو و يلاقي جوقة استقبال و يعملوه وزير.. و إذ به لازم يشتغل 10 أو 12 ساعة ليعيش حياة عادي.. فيتولد عندو شعور بالحقد أحياناً...
و هيك من ناس فاضية ممكن تصير قضايا تكبر.. بس لا شك انو أغلب المهاجرين عايشين حياتون بشغلون و مالون بهالقصص.. الفاضيين أشغال لاحقين هالقضايا و يثيروها...
هففففففففف طال الحديث.. و ممكن يطول أكثر بس خلينا نسكت هون
