طريقة التفكير هي الغلط هية اللي بتخلي العالم ما تعمل مدونة
طبعا قصدي على ( طلع منك فايدة )
بدك تستغرب مني وقت بدي قلك انه مو مطلوب منك تكون بتعرف تكتب شي لحتى تعمل مدونة
صدقني لا عم جامل ولا عم بيعك حكي
الفكرة انك مانك فايتة على مهنة او على مصلحة يفترض تكون مبدع فيها
انت ما عم تأنشأ موقع دولي أو موقع رسمي لشي منظمة عالمية ، انت عم تعمل صفحة
الك
وبالتالي الكتابات لازم تكون الك وهاد هوي الشرط الوحيد
بدك تقلي ما يا ابو طوني قلتلك ما بحياتي كتبت شي كيف عم تقلي كتاباتك ؟
بالنسبة الي عم احكي مع شخص مسجل بمنتدى حواري لمدة بتقارب السنتين
عايش ( بيتنفس وبياكل وبيشرب وبنام وبيطلع من البيت وبيرجع بفوت عليه )
وهي لحالها شروط كافية ليكون عند هاد الشخص طريقة تفكير خاصة فيه وقيم بآمن فيها ووبيحترمها
الباقي بس انك تحول هلكلمات اللي براسك .. هلحوارات اللي استفدت منها والقيم اللي استنتجتا لكلمات خاصة فيك لتحطا بالصفحة الخاصة فيك .. مو شرط ابدا يكون الحكي سرمدي وتحط صور بيانية ومدري شو
توصيل الفكرة هية الغاية وانتهى الموضوع
وطبعا بتقدر بمدونتك اتضيف جوانب ترفيهية بشكل متوافق مع شخصيتك
تنقل كاريكاتورات وتحط تعليقات عليها .. تحط مواقف صارت معك بحياتك .. تحط أحداث مريت فيها وحسيتا غريبة من نوعا .. بالأخير نوعية التدوينة ما بتتعين بقوة اللغة اللي فيها وباسلوب الكتابة ..شخصيا أكتر المدونات اللي بحب فوت عليها هية المدونات اللي بتحمل طابع شخصي وأفكار طالعة من الشخصية وكتابات شخصية ..
بصراحة الرد المكتوب فوق هلسطر هوي الشي اللي عم يخليني راهن عليه لأدخل على الأخوية وحط موضوع فيها لدعوة الشعب الاخوي الصامد للتدوين ..
بانتظار انك تشلفلنا رابط مدونتك بأقرب فرصة
