بقصد بالديكور القوائم والصور واللينكات اللي تنحط على القوائم الجانبية للمدونات
المدونة مش بس نشر الاشيا اللي عم اكتبها
المدونة فيها شي احلى من هيك بكتير .. المدونة تماما متل الغرفة الخاصة فيك
كل واحد حر باختيار الديكور المناسب لمدونته لتصير مطابقة لذوقه الشخصي
وقت عم نحكي على الديكور ما منكون عم نحكي على قالب المدونة ابدا
كل حكينا هون على القائمة الجانبية ( أو القوائم الجانبية اذا كان القالب بالأصل فيه أكتر من عمود )
وقت منحكي على القوائم الجانبية بيطلع قدامنا أكتر من سؤال
شو بدي حط فيها ؟
شو بالاصل الخيارات اللي فيني حطها ؟
كيف بقدر ضيف أشياء عليها ؟
شو بدك تحط فيها ... هممممممم ظريف هلسؤال
الديكور ما بعبر بس على ذوق الشخص ... الديكور بكتير من الأوقات بعبر عن توجهات الشخص وافكاره وآراءه
يعني وقت بتفوت انت على مدونة وبتشوف واحد حاطط صورة وكاتب تحتها ( اوقفوا جرائم الشرف )
بكون صار عندك صورة واضحة تماما عن راي صاحب المدونة بقضية جرائم الشرف
هلق يمكن شوي انا عقدتها للقصص ..مو شرط يكون كلشي عم تحطه اله دلالات خطيرة ومعاني دفينة
بتقدر تحط صورة بتحبها او صورة رسمتا
هلشي بفوتنا بالسؤال التاني تبع
شو الخيارات اللي فينك تحطها
حكمة بالحياة بتحبها او سطور وكلمات بتعنيلك بصفة فردية
كمثال عشوائي على الاشياء اللي شباب* الاخوية حاطينا
ياسين حاطط مقتطفات من رسالة لوالده
ذا مورنينغ حاطة موقع برنامج التعليم للصم والبكم
مرسيل حاطة لينك موقع بسمة لدعم الاطفال المصابين بالسرطان
قرصان الادرياتيك حاطط ألبوم صور
زين حاطط صورة لحمامة السلام وصورة تانية لغيفارا
حضرتنا حاطط صورة رسمتا بزمناتي
المهم انك تكون مقتنع بالشي اللي عم تحطه وما عم تنشره بس مشان العالم تقول : واو صاحب المدونة كتير عميق ومفكر
يعني على سبيل المثال لا الحصر
Nay اذا فكرت تعمل مدونة فشي كتير طبيعي تحط صورة موقع نساء سوريا أو تحط فعالية من فعاليات الموقع متل عريضة ايقاف جرائم الشرف أو حملة جنسيتي لي ولأولادي .
سوا ربينا ممكن يخصص كل فترة والتانية مربع يحط فيها "كاريكاتير الاسبوع " او هيك شي بما أنه بحب عالم الكاريكاتير وبتابع اخباره
عم اعطي امثلة على التوجهات وكيف ممكن المدونة تعبر عن الشخص بالديكور تبعها وقبل ما يقرا الزائر أيا حرف بصير عنده طابع مسبق عن الشخص اللي عم يقراله وهلشي بريح القارئ لدرجة كتير كبيرة وقت بيعرف شو نوع الافكار اللي بيحملها هلشخص اللي عم ينشر هون .
كيف بقدر ضيف الادوات والصناديق على القائمة:
هون جينا على الحكي العملي واللي بيجي منه بالفحص .
منفوت على موقع البلوغر blogger منسجل دخول على المدونة
من الصفحة الرئيسية منختار التخطيط
اتوتوماتيكيا مننتقل لصفحة "عناصر الصفحة "
بالشكل التالي
طبعا طريقة توزيع القوائم بتختلف من مدونة لتانية بحسب القالب
منفقش على "اضافة اداة " بيطلع بالعادة 20 أداة بصنفها الموقع على انها ( أدوات اساسية )
بدي اشرح أهم الشغلات اللي ممكن واحدنا يستعملها بمدونته :
مربع بحث :: هي جديد ضايفها الغوغل لخدمة المدونات تبع البلوغ سبوت
نص :: متل حكمة أو قول شهير أو تنبيه حابب اتحطه للقارئ اللي عم يتصفح مدونتك
صورة :: بتقدر تحط صورة مع لينك ( انك وقت تفقش عليها ينتقل المستخدم لصفحة انت بتحددها ) هي كتير بتستعمل مشان اذا بدك مثلا تحط موقع الاخوية .. بتحط الصورة تبع الموقع ( الموجودة بأعلى الصفحة ) وبتعمل انه وقت بينقر الواحد على الصورة ينتقل لصفحة الاخوية الرئيسية
عرض شرائح :: هي في طريقة خاصة مشان تحدد انت الصور اللي بدك تنعرض .. في الها علاقة بموقع فليكر منحكي عليها في حال حدا حابب يستعملها منقله شو يعمل
شريط فيديو :: بتحمّل الفيديو على صفحتك فورا بحيث المستخدم ينقر على صورة الفيديو ويشوف الفيلم مباشرة من صفحتك بلا ما ينتقل على موقع تاني
استطلاع رأي :: متل الاستفتاء اللي عنا بالاخوية ، بتقدر تحدد تاريخ اغلاق الاستفتاء وهيك اشياء
قائمة المدونات الالكترونية :: هي القائمة حكى عنها حج ياسين بشكل مفصل تحت عنوان التشبيك
شوية نصائح و أخطاء لازم نتفاداها اذا ناويين نكون مدونين ناجحين (1)
الفرق بين هي الاداة وبين
قائمة الروابط
هوي انه قائمة الروابط بتقدر تحط فيها رابط أي موقع بدك وبشكل ثابت
بينما التانية خاصة بالمدونات .. مو ضروري تعرف كيف عم تشتغل .. المهم تعرف انه شغلتها اتجيب آخر تدوينة كتبها الشخص اللي عم اتابع مدونته وحاطط الرابط تبعها بالقائمة عندك وتحطه تحت اسمه
بتفيدك هلأشياء لتعرف شو آخر التدوينات اللي حطها الشخص اللي مشبك مدونته عندك .
التسميات :: وقت بالمحل اللي بتنشر فيه التدوينات بتلاقي موجود من تحت مربع صغير جنب كلمة النشر .. هاد المربع بفيدك بالتصنيف والتسميات
يعني ولنفرض انا كتبت تدوينة وحطيت الها التسميات التالية من تحت ( تحشيش ، سنافر ، أدب ساخر ، مجتمع ) (ضروري نفصل بين الوحدة والتانية بفاصلة مشان يعرف انه كل وحدة تصنيف منفصل عن التاني )
ومع الأيام كتبت تدوينة تانية تحت بند وحيد ( مجتمع )
القائمة هي اللي بدي ضيفها لحالها بتطالع التسميات اللي انت مستخدمها وجنبها عدد التدوينات المدرجة تحتا
بحيث انه وقت بينقر الزائر اللي جاية على مدونتك على كلمة (مجتمع ) يطلعله كل التدوينات اللي ضفت عليها تسمية المجتمع من تحت
ان شاء الله تكون وصلت الفكرة .. اذا ما وصلت خبروني لحطلكن صور وضح فيها شو القصد .
ارتباطات اشتراكات :: هي بتسمح للمتصفحين يتابعوا مدونتك عن طريق برامج قراءة الـ Rss
بتكون عم تقدم خدمة للزائر اللي حب صفحتك وحابب يتابع كل اخبارها بانك اتضيف هي الاداة على صفحتك .
أرشيف المدونة الإلكترونية :: بيعمل متل شجرة للتدوينات اللي انت حاطها وبصنفها زمنيا
بحيث يسهل عليك تقدر ترجعلها مع الايام
فينك تحطط طريقة الارشفة وطريقة عرض الارشيف بحسب الشي اللي بريحك
كمان بتكون عم تقدم خدمة للزائر اذا ضفتله هي الاداة .
أخيرا في صندوق اسمه
HTML/JavaScript
هاد ما جبنا سيرته فوق ابدا ، مو لأنه ما منستعمل
بالعكس هاد أهم شي تقريبا بين الادوات كلها
والحكي عنه لحاله بده مشاركة لتنشرح فكرته وطريقة استخدامه بطريقة كافية .
بعد ما نزلت الاداة اللي بدك ياها وظبتطها على مراقك
وقبل ما تعمل حفظ للتغيرات اللي عملتها بالصفحة تبعك بتعمل ترتيب للاشياء اللي ضفتا بحسب الشي اللي بريحك
عملية ترتيب طريقة عرض الادوات من اسهل ما يكون
بالنقر والسحب برتب الاشياء بحسب ما بدي ياها تظهر .. تماما متل وقت برتب تسلسل الفايلات داخل شي فولدر عندي على الكومبيوتر
سحب وافلات يعني للصندوق بكون تغير محله على الصفحة تبع مدونتك
شباب* : قبل ما ينتفضوا فتيات الاخوية ويبلشوا يشدولي شعري الشباب بقصد فيها الفئة العمرية ذكورا واناثا