[التقرير الجوال]

ليك لقللك شغلة! الدين و العقيدة من صلب محور نقاشنا .. أوكي! لو ماكان في معتقد ديني و شرائع- آخدينها الناس كدَيدَن إلهن من وقت ما انزلت هالشرائع-لما كان في لا قانون أحوال شخصية مستمدة أفكاره و ركائزة من الشرع .. هي بسيطة و ما بدها فكر نجيب ليعرفها.
إذاً الديانة سبب أساسي من أسباب وضع القانون يللي نحن بصدد الحديث عنّو!
بعدين نصيحة لوجه الكريم .. إذا ما بدّك تحترم البابا يوحنا التاني و هاد شأنك الخاص, فجد من المستحسن بأنك تحترم علمه و المسيرة يللي مشيها بقطع النظر عن ماهيتها .. ببساطة الشخص كان عَلَم و مابظن كلامك رح يكون مسموع لما بتشتمو جُزافاً.

صدقا عم احكي معك وبتمنى ما تفسرها على انها موقف شخصي منك
بس صدقا قرفت حياتي وأنا عم عم اقرا هلفقرة المقرفة هي
يا اخي طلاع من دائرة أنا مسلم وحاول تفكر بمنطق انا سوري
تعا لئلك انا انسان لا ديني
ما بشتريه لبابا الفاتيكان ولكل الطوايف المسيحية بقشرة بصلة .. الك عندي شي ؟
شو الأفضلية اللي حضرتك عم تقدمها لهلوطن عني حتى تتفضل وتتفلسف على ربي وتقلي انت أكثرية وانا أقلية ؟
انا مواطن سوري بقلع عين كل واحد بشككل بمواطنتي ومحبتي لهلأرض
لا أنت ولا أكبر راس بأيا طائفة دينية بحقله يشكك بوطنيتي وانتمائي لهلأرض .
يا زلمة بأوروبا العرب بكونوا مغتربين .. الجيل التاني (اولادن يعني ) يعاملوا معاملة المواطن الأوروبي بنسبة 100% ( هي اذا ما تعامل المغترب نفسه كمواطن ) وانت جاية تنطلي على السكان الاصليين لهلبلد .. متلك متلن يعني .. جاية تقلي ذمي وبتدفع مصاري وما بتدفع ؟ مو عيب عليك ؟ بشرفك ما بتخجل من حالك وقت بتحكي بهلمستوى التخويني هاد ؟

هّي المرّه أنا مضطر جاوبك و لقللك ليش! اللغة يللي عم تحكيها و تكتب فيها زاخرة و فيها ينابيع من المرادفات يللي إذا استخدمتن رح تجمَل كلامك و تصيغو بشكل لائق بيخللي الغير بيسمعك بجدية و كمان بيجاوب بجدية أكتر, فيا ريت المرّة التانية تختار ألفاظ بتناسب و بتليق بالحديث.
أي حبيبي مافي شك بانك بتحب بلدك و بتعتز في .. و بدّي قللك شي شغلة بسيطة منشان ما تتعمق أكتر باوربا أو بأميركا بما يخص دساتيرهن و طرق فرزهن للبشر .. بدّك تعرف بأنو الأميركان أو الدستور الأميركاني ما بيسمحلك ترشّح لمنص الرئاسة إذا ما كنت ولدان بأميركا .. يعني إذا أهلك اجو فيك عاأميركا و انت عمرك يومين فهيك ما بيحقللك ترشح لتصير رئيس أميركا " برأيك شو بتسمي هالقانون "؟ هلأ بسبب هالقانون فيك تسمي اميركا دولة طائفية مثلاً؟
منرجع للذمة انتو ليش ماسكين فيها كل ما دق الكوز بالجرة .. يعني انا سبق و مازلت احكي عن هالموضوع بأنو لك ياعمي المسيحية ما بيدفعوا هلأ .. "و إلا فينا نفكر بأحقاد متوارثة"؟ خلونا نحكي فيها بجدية مرة وحدة و بتكون آخر مرّة .. هالنظام كان قديم .. فشو القصة كل شوي بينطلو واحد و بيقللي لأ يا عمي مين انت لتدافع عنّي .

بدنا ننسى موضوع الذمة و لو مؤقتاً لأنها مش حاصلة حالياً على أرض الواقع .. بس للأمانة ما رح تنمحي من قاموس الاسلام.

أما عن السفربرلك فهي ما بدنا نحكي فيها من أصله لأنها ببساطة لما العصمللي ببدايات 1914 صار بيللقط الشباب و الأطفال و يدفعهن لاتون حرب و بالغصب بظن الروحة للحرب ما كانت خيار أي انسان و لا سيما المسيحي.

المسلم بحط عقيدته وافكاره الدينية الخاصة على طاولة النقاش وبيمنع كل الجالسن من نقدها مشان احترام عقيدته !!

سكت دهراً و نطق شذراً .. ما صار و لا رح يصير بأنو مجمع اسلامي بيحط سننه و شرائعه لنقاشها مع علماني او مسيحي أو شي غير ديانة .. و منشان نرجع لموضوعنا بدّي قللك بأنو المسلم ما عم يحط عقيدته عالطاولة .. الحال عم يفرض هالشي .. منرجع نقول 80% من الشعب مسلم!! الأحرى و الأجدر بأنو نظّم حياتهن من خلال شرعهن .. صح و إلا لأ .. لا الاسلام و لا العقيدة عم يفرضو حالهن عالغير و خصوصاً بمجتمع متل المجتمع السوري
يعني لما بيذكر قانون الأحوال بأنو المراة مش من حقها تزوج نفسها هاد شرع و بظن بسوريا في كتير ناس تجاوزو الشرع و عم يعملو على هواهن " ما هيك " بس كلمة للحقيقة " هاد الشرع و بدو ينتقل كما هو و مافي انسان مسلم عاقل راشد رح يتطاول عالشرع ليغيرو .. بدي منك تفهم هالنقطة ... في مُسَلّمات بالشريعة الاسلامية يللي مافي مخلوق من حقو بأنو يعمل عليها تعديل أو تطوير .. يعني مثلاً زواج المسلمة من غير ديانة باحكام الشريعة صارت زانية ليش؟ لأنو أصلاً زواجها باطل .

إذا بدنا ناقش مسألة بأنو انتو يا أخي المسلمين حاملين السلم بالعرض و مسكرين عيونكن على شرع صرلو 1400 سنة ... إذا بدكن تطرحو هيك موضوع هاتو لنشو شو في عندكن, بس برجع قللك بأنو صارت فطرة عند كل مسلم يعني بدي اوصفلكياها بأنها صارت متل التركيبة المخية يللي مستحيل تتجزّأ و ما بتفاوض على حلول تانية و اذا برأيك مأخودة على أساس خاطئ ففي كتير راضين في و بدهنياه ... العبرة بأنو الرافض بيعمل على التغيير بأسلوب بيتماشى مع عقيدة الأغلبية و غير هيك رح بيكون تطاول و تعدي.

بدي احكيلك شغلة صارت معي مع ست السنة الماضية, طبعاً الست مسيحية و المسيحية هون متدينين أكتر من غيرهن, فتناقشنا عن الصلب و قيامة المسيح .. سألتها ببساطة أنت بتآمني بقيامة المسيح؟يعني مقتنعة بهالقصة؟ قالت ببساطة "لأ" بس بنفس الوقت هي راضية و مبسوطة بدينها و ما بدها تغيرو ..
الخلاصة .. بشر انفطروا و ربيو على مفاهيم و أفكار أخدت كامل فكرهن و جنانهن فكيف بدك تغيرلهن بأفكارهن و بمسلمات ماشيين عليها و يربو أطفالهن عليها! برأيك سهل هالشي .. هون عم احكي عن المسلمين.

فيك تعمل اسقاط للقصة هي مع الشرع الاسلامي يللي مافي مسلم بدّو يغير في شيئ بتاتاً.

يا اخي انا ما بدي الاسلام كعقيدة يصير موديرن
عاجبني كتير وضع الاسلام هيك مافي احلى منه
وما شغلتي انا قلك عملي عقيدة اسلام مودين او رجاع قصله شعره بانكي او فيرزاتشي
انا بدي القانون اللي بيحكم حياتي الشخصية يكون مودين عصري واقعي ما بيهدم مبادئ المواطنة
بشرفي عيب نطالب بهيك أشياء .. كأننا عم نطالب بهوا نتنفس فيه
يا اخي هاد حق للكل الهوا مينو انت لتسمحلي اتنفس او لا ؟

حضرتك مانك مستعد تحط قانون وضعي نطور فيه ومتمسك بمرجعية اسلامية
فطبيعي نطالب بإسلام مودين .. لأن ما عم يقدر اسلام الـ 600 ميلادي يحكم بالعدل داخل مجتمع الـ 2009
صعبة كتير هلنقطة حتى ما حدا من الاسلاميين المتشددين قادر يفهما ؟
انه يفصل بين عقيدة اللي بآمن فيها وبين الشرع اللي فارضه على القية نقطة كتير عسيرة الفهم على العقلية المتشددة ؟

يعني يللي بيسمعك تحكي هيك بيقول بانك عايش ببلد متشدد حالو متل حال دول الخليج .. يعني شو الفرق بين المسيحي و المسلم أو غيرو من باقي الملل او الطوائف .. بس لأنو القانون نوضع للأغلبية؟
يا رجل الناس عايشين بأساليب حياة مختلفة ضمن المجتمع الواحد ليك الأرمن بحلب عندهن مجتمعهن الخاص فيهن بس كمان منصهرين بأسلوب الحياة العام .. ليك الشام من كل حَد و صوب و ماشية الأمور و عال كتير
لك شو بدكن بالظبط
بدّي فتحلك عيونك على شغلة بيجوز هي يللي عم تعمللك اللبس بأنو المتشددين ما عم يقتنعو بضرورة الحداثة و التطوير و الـ 2009 بعيدة كتير عن الـ 600 ميلادي .. الزمن بعيد كتير بس الشريعة هي هي .. و مارح يصيبها اي تغيير أو تطوير و هاد إذا انت بتسمي تزمّت و تشدد غيرك بيسمي إتباع نهج شرعة الله
هلأ لما الكنيسة الكاثوليكية بتعمل تفريق أو فصل بين الأزواج منشان بس ما بيلجأو للطلاق هيك الشرع و الزواج شرع من السما و يللي بيزوج هو الله عندهن فصعب تجي و ببساطة تقول يللا بدنا نطلقكن .. هيك نسفت كل مبادئك بل دخلت ضمن الكفر لأنك تطاولت على شرع معبودك .. فيك تدرسها من هالمنطلق, لأنك عم تتعامل مع بشر في عندهن إلاه معبود و لازم الناس تتبع شرعه و هاد بظن من حقهن .. هون بقى بدنا نحكي عن الحداثة و التغيير .. كيف بدنا نغير بكلام و شرع المعبود؟ على شو و منشان شو .. و مين أصلاً حابب يعمل هيك ليدخل ضمن دائره غضب الله؟
الموضوع مش بهالسهولة يللي عم تحكو عنها .. اي وضع قوانين حداثية سهل بس الصعب تأنيب الضمير.
شو رأيك بأنو شهود يهوه بانجيلهن بانو بس شي 140 أو 144 ألف رح يدخلو الجنّة بس هيك هاد قرار صاغو انسان
إذا فيك تعمل على تضليل البشر و بتنام مرتاح قرير العين فرح يكون سهل عليك تفبرك بشرع الله

البديل الوحيد بيجي وقت بيقتنع الانسان بانه مقعتده الشخصي بينه وبين ربه ، وقت بيحتفظ فيه بينه وبين ربه ما بعود لحدا الحق يتدخل فيه أو ينعته بعدم العدل والمساواة متل ما عم نعمل هلق
عم تقلي العلماني لازم يشتغل بالمجتمع ويقدم البدائل
اذا المسلم الملتزم بحسب ما قلت (وبوافقك بهاد الحكي ) بيعتبر القانون الوضعي غير المطابق 100% للشريعة الاسلامية كفر
كيف بده يسمعني اذا بيعتبرني كافر ؟
ما بيسمعني وبيخضع لرغبة العلماني الا وقت بحس حاله أقلية .. متل أوروبا يعني
وقت بصير أغلبية متل سوريا يعني بقلك نحن الأكثرية ومن حقنا نطبق شرع الله على الأرض .. لا بل هاد فرض علينا
بشكل مطابق تماما لطريقة التفكير اللي انت فتت فيها على النقاش
سوريا بلاد أغلبية سكانها من المسلمين ومن حقن يطبقوا شرع الله لأنه الشرع العادل والصحيح

أما بالشرع الإسلامي فمافي معتقد بيني و بين ربّي .. العقيدة أنزلت على الرسول لكي تكون هداية و شرع للعالمين و من هالمنطلق مبدأ بأنو أنا بعبد ربي بطريقتي مرفوضة و عاملني كانسان من دون التطرق لعقيدني فيها نظر و لقلك بانو الانسان حقوقه مصانة بالاسلام,بقطع النظر عن ديانته هاد إلا إذا بغى و عمل عالافساد.
و بالنهاية ولاد الوطن مشتركين بالوطن "عالقليل حالياً بهالظروف " مافي فرق و لاتمييز و الجدارة و الحضور و التميز للأسبق و المجتهد و لتبسيط الموضوع كل شي ناقشو قانون الاحوال من منظور إسلامي ما بيناسبك تركو أنت مش مجبور في و يا عمي خود بس يللي بيناسبك.
و للتذكير أمور الزواج و التركة و العَقَديات مارح تتغير و رح ترجع كمان مستقاة من الشرع الإسلامي.