اقتباس:
كاتب النص الأصلي : LiOnHeArT.3LA2
اخي انا عندي كم سؤال حاليا
بعدين برجعلك
|
لا والله ما بترجع
اقتباس:
ابو طوني .. شو رأيو بالمدونون السوريون .. او المدونين السوريين ..
والتدوين العربي ..
|
المشكلة أنه التدوين صاير كأنه شغلة خطيرة او شي اختراع ذرة
القصة اسهل من هيك بكتير
يا اخي انا انسان باكل بشرب بنام ويمكن ما بنام ما منختلف على هلنقطة
، عايش حياتي بشكل كامل فطبيعي يكون عندي شي عم فكر فيه ، طبيعي يكون عندي شي عم يدور براسي بهي اللحظة
يمكن يكون سخيف بنظري بس يستمتعوا البقية بقراءته
التدوين العربي مانه فهمان انه المدونة مشروع شخصي بيكتب فيه الواحد الشي اللي عم يفكر فيه وبيقدر يطور هوايته الأدبية أو يعمله شوية بحوث علمية يفيد العالم فيها
معتبرين المدونة - موقع - وهنن المديرين تبعه
بتشوف اللمسة الشخصية غايبا تماما عن الساحة العربية ، اغلبية التدوينات على شو آخر خدمة نزلتها شركة غوغل وشو آخر نوع متصفح عم تفكر شركة مايكروسوفت اتطوره وشو آخر نظام تشغيل طرحته شركة آبونتو
ماني ضد انه اذا الشخص عنده ميول للأمور التقنية يعمل مدونة تقنية يفيد فيها العالم من خبرته ، بس ضد انه يصير الستاندر من المدونات هوي القالب التقني .
سوريا عنجد وبكل موضوعية وبعيد عن اي مشاعر انتماء لمجموعة المدونين السوريين
بتشوف بالمدونات السورية لمسة شخصية أكتر من رائعة بكتير ، هلمسة عم تخلق زوايا وصفحات انترنت ما بينساها الزائر بسهولة
بتقرا احداث كاتبينها العالم من حياتن اليومية بتخليك تعيش اللحظة معن
اقتباس:
..
فكرة العلمانية ..
برأيك اديش بدا لتطبق .. تطبق يعني انو اخي .. ينشء عندك جيل سوري .. يآمن انو لازم يكون عنا علمانية ..
|
بزعل منك يا زلمة
سوريا محسوبة على البلاد العلمانية كون الحزب الحاكم فيها علماني
بس لسع الشعب مانه فهمان شو هوي الدين ومين هوي الله وكيف هلنص هاد ماله أيا هدف غير يعرفني على الله ... بعد ما اتعرف على الله بتصير علاقتي مباشرة معه وما بعود في أهمية للنص الديني لأن مهمته انتهت باللحظة اللي صرت عيش فيها مع الله .
ما بتخيل بالهين شعبنا بيستغني عن انتماءه الديني .
اقتباس:
وصعي صعي ..
انتي مع فكرة العلمانية ما ؟
|
للعضم
سؤال ..تاني
اقتباس:
طلب منك رئيس الوزراء .. انو تعمل ليستا .. وكل الوزراء رح يطبقوها ..
تفضّل لنشوف ..
هات ما عندك .. وسنعود بعد كليل ..
|
هيك بفرض مرة
يا سيدي بدي اعتبر انه السؤال هدفه احكي شو ببالي غير بسوريا بشكل عام ( مو بس على صعيد الوزارات )
سماع لئلك :
- بعمل اسعار الانترنت اقل من رمزية وبأمن خطوط سريعة لكل بيت
- بمنح الجامعات الخاصة حرية وضع الشروط اللي رح يفوت فيها الطالب على الفرع ( يعني بحررن من البكلوريا الهم تبعنا ) وبنفس الوقت بعمل بالجامعات الحكومية اختبارات بمواد معينة على اساسها بفوت الطالب على الجامعة مو على اساس البكلوريا الحلم تبعنا .
- بمنع تعدد الزوجات في سوريا
- بقدم تسهيلات كتير كبيرة للشركات والمعامل اللي بترعى أندية رياضية وبعفيها من جزء كتير كبير من الضرايب في حال نجخت برعاية النادي وتحقيق نتايج بترفع الراس على صعيد اللعبة.
- بسمح بترخيص التجمعات الاجتماعية بعد التأكد من سمو الرسالة اللي عم تأديها وبغض النظر عن وجود جهة دينية راعية الها او لا
- برخص لعدد كتير كبير من الفنادق
- بلغي مادة الديانة من السلك التعليمي وبنزل بدل ساعاتها مادة اسمها خدمات اجتماعية .. بهي الساعات بيطلع طلاب الصف بيعملوا شي لصالح البلدية متل تلوين الرصيف أو توزيف بروشورات توعية على العالم بالطرقات .
- بمنع يكون عدد طوابق البناية في الضواحي في الريف يزيد عن 3
- بطبق خطة للحد من النسل .. مافي براسي خطوات معينة بس بفكر امشي بهاد الطريق
- بخلي الموظف يعيش
.. بعطيه راتب متل العالم والخلق
- بفرض غرامة مالية على المشاة اللي بيرموا زبالتن بالطريق .. يمكن تقلي هي نقطة مو مستاهلة .. بنظري مستاهلة ونص وكبيرة كتير بالنسبة الي .
- بنزل خدمة العلم للسنة الواحدة فقط
- بجبر كل وزير يعمل مدونة ويمنع ميزة الاشراف على التعليقات
في لسع كتير اشياء براسي شي خاص بعازفي الكمان ( مجلس الشعب ) وشي خاص بالجبهة الوطنية بس بلا ما احكي احسنلي
.. بس اجاني هيك سؤالك فجأة ومن كتر الافكار ما عدت لحق اكتب ، فحاجتي احلام اكتر من هيك .. بخاف صدق حالي وبطّل اقدر ارجع عيش مع الواقع