مرحبا زين أهلا سونا
ذكرت انو بدك ترجع ع الدراسة .. شو كنت عم تدرس قبل؟؟
انا كنت بدرس ادارة مشاريع بجامعة خاصة صار فيها مشاكل وسكرات وانا وقتها أنجبرت روح ع الجيش هلق خلصت جيش وراجعين ع نفس الفرح بكلية الاقتصاد بحلب
ايا قسم بالاشراف كنت مستلمو من قبل باعتبارك مشرف متقاعد؟؟
انا طنت لقسم الموسيقى بس انا ما اشتغلت فيه كتير لانو رحت ع الجيش والقسم هلق كتير تمام سمرا عامل شغلو وزيادة بس انا لو محلو بحط سياسة لمستوى ونمط الاغاني مع انو هالشي ما كتير محبز عند كتار لانو الاأذواق بتختلف
وكيف شايفو هلق؟
انو متل ما قلت شي ناهي
حسب تعليق الك انو الوضع عنا بسورية مش منيح بكتير مجالات برايك لما منحكي عن تطوير لمجتمعنا السوري شو الجانب اللاهم برايك يلي لازم نسعى لتطويرو؟ سياسي ولا اقتصادي ولا اجتماعي؟
هلق انا عندي قناعة انو الوضع السياسي لبلد معين ما بيتغير ليتغير الشعب يعني شعب منفتح فكريا وبيقبل الاخر متحرر و مثقف مستحيل تقدر تحكموا سلطة ديكتاتورية فلهيك منبدا باصلاح الانسان قبل كلشي وبعدين اقتصادي وسياسة وهيك
الغربة بتشكل حل لكتار من الوضع عنا .. شو راي زين بهالشي؟ حل فعلا ؟ ولا فقط هروب من دون حسبان نتائج هالشي؟
لا لا انا ما بشوفها هروب هي حل مطروح لصعوبة الاوضاع عنا يعني انا هلق اذا بيصرلي سافر بسافر (بس مو ع السعودية مشان اللي عبالو يبعتلي فيزا
)
بعدين مافينا نسميه هروب لانو نحنا من أول ما منوعى منواجه اشيا كتير فنحنا منقرر نروح ونسافر بعد ما منمل من المواجهة اللي ما بتخلص
علاقة المغترب بالوطن بعد رجعتو كيف بتلاقيها ؟ ( اذا كان في تعامل شخصي مع هيك نمط)
هلق بالشكل العام المغتربين بيحسو انو هني بيحنو وبيحبو الوطن زيادة حبتين فأنا بقول انو احيانا نحنا بيصير عنا حنين للبلد أكتر من اللي برا لانو نحنا عنا البلد عم يتغير كتير كتير لدرجة انو أحيانا ما منعرف سوريا فمنزعل ومنحن لسوريا حبيبتنا وقمرنا وروحنا
شو عن ذوق زين الموسقي بالعام ؟ بتعتبر حالك من محبي الكتب ؟ وايا نمط بتحب تقراه ؟
انو كالعادة فيروز زياد ماجد وجوليا وهالشلة المقاومة بالموسيقا وكمان بسمع كتير شغلات اي شي بيعجبني مثلا عاجبتني هلاء غنية لمطربة اسمها أمنية واسم الغناية الحب بيجي بثانية كما انو نجوى كرم الها معزة خاصة بقلبي لانو هي اول مطربة حبيتها من لما كان عمري 5 سنين وقت أنا مافيي حبك أكتر من عينيي
وميرسي ع الاسئلة
