نال الرئيس الأمريكي أوباما جائزة نوبل للسلام هذه السنة 2009
في حين أن شعبيته انخفضت إلى 44 % بالولايات المتحدة الأمريكية نفسها
ولن أقرظه بإنجازاته في عالمنا العربي الخاصة بالسلام فالجميع يعرفها وأنا واثق من وعي الجميع.. لذا .. لذذذذذذذذذذا ..
( انتبهوا لهذه الـ لذا.. فهي نقطة الاستناد ومرتكز القصة كلها.. وإصبعي معها مرفوعة )
سأتوجه إلى فخامة الرئيس مباشرة:
بمناسبة إنجاركم الكبير يا سيدهم الرئيس أوباما
إليك هذه القصيدة التي منعوها لأجل سواد عينيك في العالم " العربي ":
أوباما
للشاعر العراقي:
عباس جيجان
إلى فخامة الريِّس الأمريكي أوباما
من مواطن عربي متَّهم ..ما أعرف شنهو اتهامه
عاش خايف مرتعب من رأسه حتى أخمص أقدامه
بعد التهاني والتحايا واحترامي والسلاما
أنتَ.. أنتَ مكسي تجنن وفارع القامة
يا خليفة عنترة .. يا ابن الكراما
نشوف بعيونك بلال إلـ أذّن وأحسن إسلامه
سيدي الريِّس أوباما.. أشتكي عندك عليهم
ذولا ياما وياما.. ياما
ذولا ياما عذبونا.. وأقل ما عندهم حكم .. حكم الإعداما
وذولا لو هدّوا علينا.. مثل ثور وهايج وفالت زمامه
وأنتَ لو هجِّيت بيهم.. والله واحدهم يرد مثل النعامة
سيدي الريِّس أوباما..
إحنا شعب الرافدين .. كنا واحد والحضارة يشيلها بصدره أسامة
جزأونا .. وفرَّقونا .. و " فدرلونا " (من Federalism)
وصرنا كل من شايخ بربعه وعمامه
سيدي الريِّس أوباما..
أريد أقول لك سر خطير.. ويصدق الشاعر كلامه
كلنا نكره أمريكا .. قبل جيّتك .. وبعد جيّتك غصن زيتون وحمامه
سيدي الريِّس أوباما..
أريد أسولف لك على الجرى وصار بينا.. من هجمتوا بيوتنا بحرب القيامه
النتايج قاسية وجداً فظيعة.. الـ شافها لفّ له عمامه
سيدي الريِّس أوباما..
عندنا مليون بس من الأرامل.. وخمسة مليون اليتامى
ها.. وسبعة مليون الـ تهجَّر.. رحنا ما بين الدول نطلب إقامة
وإحنا .. إحنا أغنى دولة بالعالم يا سيدي.. عندنا نهرين ونفط يجرن قيامه..
وبالحقيقة .. شعب عايش عالتسوّل ..لا أمان .. ولا ضمان .. ولا ابتسامه
إش أحكيلك بعد .. يا سيدي الريِّس أوباما..
عن فضيحة أبو غريب؟!.. بين قوسين الحكي ما ينحكي وما هي شهامه
وإلا عن فضيحة " البلاك ووتر" ؟؟.. Black-water
شيّبت حتى الرضيع .. أمّه ذبحوها قدّامه
سيدي الريِّس أوباما..
نشتكي عندكم عليكم.. لأن.. كل شي خليتوه بأيديكم
من أمر تعيين الرئيس .. لحد برميل القمامه
سيدي الريِّس أوباما.. كل شي عندكم ..
الطائرات الحاملات الغواصات .. القاصفات الفرقاطات الصاعدات النازلات
الغازات السامات .. القواعد الثابتات .. القواعد المتحركات
والصواريخ الذكية والغبية العابرات القارات..
وإحنا عندنا وداعتك بس الكرامة ..
وأخذتوها بأبو غريب..
الكلب هشّوه علينا وإحنا عريانين نستعرض أمامه
ولو ما تصدّق .. سيدي الريِّس أوباما..
إسأل بهوليود عن كلب نبح وانعرض أفلامه
سيدي الريِّس أوباما..
أرضنا مهد الأنبياء.. والأولياء .. الـ بيهم العدل استقاما
وتدري من هو الـ بي عدنا .. سيدي الريِّس أوباما..
أبونا آدم .. ونبي هود .. ونبي صالح .. ونبي يونس ..
ونبي نوح .. والعزير.. والخضر.. وابن عم المصطفى.. حيدر إماما
ودارنا مسقط رأس النبي إبراهيم .. الـ تسمونه بلغتكم أبراهاما
وللحسين الصدر .. شيّدنا المقاما..
إش أحكيلك بعد .. سيدي الريِّس أوباما..
عن قضية فلسطين؟! .. ما انحلت.. قايمه بغزة القيامة
ذولا ما يعطون حق عيال ساره.. ماخدين القدس والمقصف تهامه
وين خالد ؟ .. وين طارق؟ .. وين عقبة؟ .. وين أبو زيد الهلالي؟..
ليش ما جرّد حسامه ؟!
قلنا.. صح نخاف منكم .. سيدي الريِّس أوباما..
لو حكينا وقلنا ليش؟ .. ننحبس بغوانتاناما
لا تزعلني عليك .. سيدي الريِّس أوباما..
شرطة نيويورك تنظر لي بلؤآما
لأن برجين التجارة تقول ابن عمك ضربهن.. وخرَّب الدنيا أسامه
العفو .. سيدي الريِّس أوباما..
ابن عمي .. لا هو يمّي .. ولاني يمّه ..اثنينّا نعيش بخصامه
ومن ورا فعلته هذي الـ فعلها .. عندي شك ..
مدري هوَ .. مدري إنتَ .. مدري أنا .. مدري هذا الـ بالقدس يرمن سهامه
وما علينا .. قول رُفضَتْ.. سيدي الريِّس أوباما..
تنسحب.. ما تنسحب .. هاي يمّك .. سيدي الريِّس أوباما..
ولو فرضنا .. قررت الإنسحاب ..
وصّوا الجيران بينا.. بخلافكم نبقى يتامى
وهالأيام الناس تطمع باليتيم الـ ماله بابا وماله ماما
سيدي الريِّس أوباما..
بخاتمة هذي القصيدة .. وداعتك بس الملامه
إحنا مثل وحده غاوية .. تحب مطربين ..
أيا مطرب تشوفه .. ترقمه وتخزن أرقامه
وبالنتيجة لا حِظيت برجلها ولا اخذت راغب علامه
شكراً .. سيدي الريِّس أوباما.
رابط القصيدة بصوت الشاعر عباس جيجان:
http://www.4shared.com/file/13172630..._____.html?s=1