[ويحد سوري]

حدث البارحة
اليوم متل كل يوم , وأنا هوي أنا , و الأخبار هي أخبار , و الجرايد جرايد و حكي الجرايد ما بيطعمي خبز , بس الاهم انو اذا انت عم تقرا بجريدة انتبه ع صفحه مهمه كتير و هالصفحة عادة بيجي فيها أسماء لا تتكرر الا بخطأ طباعي أو مطبعي , طبعا هالصفحة هي صفحة الوفيات , ومن الطبيعي انو اذا انت بتحب تعرف مين مات امبارح من شخصيات سمعان فيها ولا لاء لازم تكون من قراء هالصفحه . اليوم لما اشتريت الجريدة لأقرا الاخبار كان عندي تفاؤل اني بدي اقرا اسم شخص بعرفوا ولو بصفحة الوفيات , المهم اسموا مذكور بالجريدة , ولما افتحت الصفحة تفاجأت و كانت مفاجأتي كبيرة و حتى انو دمعت عيني , صراحه كانت صدمة , لأنو ما في ولا اسم بالجريدة , ولا حتى شكر ع تعزيه .
انصعقت من هالحالة ومن هالخبر وبلشت فكر اذا صارت هالحالة عادة شو ممكن يصير , و تسألت انو معقول مافي حدا مات؟؟ وقررت اكسر هالحالة وانو لازم موت و لازم تكتب عني الجرايد وينزل اسمي بصفحة الوفيات , بس لازم موت بطريقة مهمه ولازم الخبر يهز العالم , و انطلقت باتجاه الموت , وأنا بطريقي للموت خطر ببالي سؤال مهم : اذا أنا متت كيف بدي اقرا خبر وفاتي ؟؟و بلحظه وقفت و تركت الفكرة , مع شعور بالحزن والاسى لأني ما اقدرت حقق شي ولا حتى إني غير حالة و حسيت حالي ضعيف .
ارجعت ع غرفتي وأنا عم فكر انو شو ممكن يصير اذا تكررت هالحالة , وبهديك الليلة انا متت ألف موته (كما يقال ) وتاني يوم الصبح اشتريت جريدة وفورا افتحت ع صفحة الوفيات , اندهشت بالصفحة , وخصوصا انو حاطين عنوان بأعلى الصفحة (نتيجة خبر البارحة ) صفحة الوفيات لاتتسع لأسماء أشخاص ماتو نتيجه عدم تحملهم خبر عدم وجود وفيات بالبلد , وسيطبع ملحق بأسماء وقيات ورد أسماؤهم إلى مقر الجريدة بعد طبع العدد!!
هون أنا ابتسمت وحسيت بالطمأنينه و انو في أشخاص غيورين وانو جاهزين للتضحية , وانو في أشخاص متلي جاهزين ليقروا أسماء لي ماتوا .....
(ملاحظة : أسماء الاشخاص الذين ماتوا و نشرت أسماؤهم وهمية ولا تمت للواقع بصلة واذا ورد تشابه بين الحقيقية و الخيال فهو مجرد تشابه بدون أي قصد )