ماشي لكن هلأ دوري جاوب على الأسئلة ...
منبلش مع فارون :
واول سؤال لسعيد اديش اكبر عدد للخسارات اكلتون بيوم واحد؟؟؟؟
والله ماني متذكر .. لأنو أنا من النوع يلي بيتقبل الخسارة بروح رياضية ... إنو والله ما بعصب و بنقهر و مدري شو بيصير معي كمان .. بشتري كولا .. أو هالحالات اللي بترافق الخسارة دائماً ..
سؤال هنون :
سوس سؤال واحد كيفها الاكس خطيبها
والله الإكس خطيبة بتجنن .. و إشتقتلها كتير كتير .. مدري شو قصتها ما عمتعبرني هالكام يوم ..
إذا شفتيها سلميلي عليها ..
سؤال كريمبو :
شو رأيك بالنباتيين؟
على عيني مان .. والله النباتيين بحبون كتير .. و بحب نقعد ناكل سوا .. لأنون ما بيمدو إيدون على اللحمة ..
بس إختراعات نازلة جديد بالشام .. شغلات إسمها فيلاديلفيا و أوهايو و وانتاريو .. يعني هيك شوي شغلات بتخلي الواحد يبطل بحياتو يفكر إنو يصير نباتي ..
بس بتعرف أنا بحب آكل بس الحيوانات اللي بتاكل النبات .. يعني إذا منحسبها بكون أنا كمان نباتي .. باكل لحم بقر .. و جاج .. و هدول التنين ما بياكلو غير نباتات و حبوب
لا بس عنجد .. إنو رفقاتي اللي هون النباتيين .. و هالشغلة كتير منتشرة هون .. بتلاقيهون و جهون أصفر أغلب الأوقات و بيضلو مبينين إنون مرضا .. (( و بعدين شو الله جابرنا ... الصوم و ما بصوم .. ))
منجي على سؤال سيمون اللي طلع بالسلامة اليوم من إشاعة مبغضة :
اذا تركتك حبيبة قلبك ع غفلة و ماعاد سألت عنّك شو بتعمل بهالحالة...؟؟؟!!!!
مان هلأ أنا بعرفك شي ؟ شايفك هالكام يوم ؟
ما في داعي فكر كتير لأنو قصة شبيهة عمتصير معي هالكام يوم ...
وأنا اللي بعملو إنو بمضل حطلها حجج .. يعني بقنع حالي إنو هلأ بتكون مانها فاضي أو ظروفها معها .. و بحاول أعرف بكل الطرق ليش هيك هي عمتتصرف .. و إذا كان حكيها مقنع .. ما حدا بيقدر يضرب التاني عإيدو و يقلو يا معلم انت و الله غصب عنك لازم تضل معي ..
و هلأ سؤال بنت العم sweetbaby :
who is ur best friend?
عنجد و بكل صراحة أنا بحس إنو أكتر من حدا هني البيست فريند تبعوتي ..
مجد و تنين غيرو من حمص و هدول بحسون أقرب ناس إلي ..
و كمان أخي الأصغر مني .. بعتبرو رفيق .. و كمان رفيق كتير قريب على قلبي ..
بصراحة و أنا عمجوب إحترت مين أكتر حدا منون .. بس كلون بسوية بعض .. هيك ما بكون زعلت حالي
وهلأ الشريك و الزميل مجود :
سؤالي إيمت كانت أحلى لعبت سلة لعبتها ؟؟؟
هلأ بعتقد إنكشف الشي اللي كنت ما حابب إحكي فيه مشان ما زعل فارون
بس خلص هلأ ماعادبدي جاوب .. رجعو قرو التعليقات السابقة بتعرفو ..
سعيد حابب ترجع على سوريا ؟؟؟
والله يا أبو شريك ما بعرف ..
إنو هون كتير مبسوط و الحمدلله .. و بسوريا كنت كمان كتيير مبسوط .. يعني شفت انت .... سكران بدون ما إشرب ..
بس أنا بقول إنو سوريا بالصيفية بتجنن ... و بالشتوية نزلت مرة الماضي عالعيد .. خيو مافي شي . رفقاتك مانون فاضينلك .. و كل واحد ملتهي بدرسو أو شغلو ... خليها بالصيفية أحلة و أسلى ..
وهلأ willi : اللي بدي إسألك نفس السؤال وقت بيجي دورك ..
اكتب لمحة شخصية عن حالك
شو اسمك ,عمرك ,منين ووين هلق وشو عم تدرس ولا عم تشغتل
من هالحكي يعني
اسمي سعيد , عمري 21 و رح صير 22 شهر الجاي , أنا من حمصي و بكل فخر , هلأ بألمانيا عمبدرس برمجة طبية ..
بحب السلة و السباحة كتير .. و الحفلات كمان .. بكتب و بقرا و بغني
و بسمع مسيقا كل الوقت .. بلا موسيقى ما بعيش .. بحس إنو في شي ناقص ..
و بحب system of a down and linkin park and
metallica ووائل كفوري من المطربين العرب ..
وشو كمان همممم ؟؟
و بحب أخوية كتتتتير كتتتتير .. و الناس اللي فيها أكتر ..
بيكفي هيك بعتقد ..
توت توت توت :
شو هالسؤال .. انا شو عاملك ؟
شو رأيك بالحكومة ؟
خيو منيحة .. و أنا ضد شغلة المعارضة من حيث مبدأ المعارضة متل ما عميعملو كتير عالم بهالفترة .. و دائماً بتطلع على النص العبيان من الكاسي ..
أووووف .. و أخيراً خلصو الأسئلة ...
هممممم .. مين رح حط بعدي .. حلينا نجرب الصبايا هلأ ...
و أنا بقول
ليلى بنت العم ...
و أول سؤال هو ..
شو برأيك معنى السعادة الحقيقية .. (( متل السؤال اللي نسأل بفيلم فانيللا سكاي لتوم كروز ))
وسلامات ..