سؤال لطالما راودني ..
ليش احنا (وهون بقصد العرب عامة والسوريين خاصة) بطلو يسَمّعو صوتون ؟
يعني برا .. لمن الواحد عندو رأيي بشيئ او موقف معين او قضية عم يحكي عنها .. بتلاقيه بيحكي وبيقول وبيجاهر وبيبزل كل غالي ونفيس كرمال يسَمّع صوتو ..
بتلاقيهم بيدعمو الاحزاب بالمصاري والجهد والعمل ..
بتلاقيهم بيدعمو الجمعيات والمنظمات الإجتماعية والمدنية متل تبعون النظافة والتشجير وغيرهم بالجهد والمال والوقت ..
بتلاقيهم (للناس) مهتمين انو صوتهم ينسمع ، ومآمنيين انو صوتهم ليه دورو وليه اهميتو ..
فبينتخبو وبيرشحو وبيشاركو بالإستبيانات (تبع استطلاع الرأي) وبيشاركو بالإستفتائات (تبع الرئاسة ولا النيابة ولا المجالس الخ الخ ..) .. بالنهاي .. الناس عندهم ايمان بأهميتهم واهمية صورتهم و الأهم مستعدين يضحو (برجع بعيد سواء بمال او وقت او جهد ..) كرمال يوصلو رأيهم وكلمتهم ..
لسبب او لأخر .. وعلى رأس الأسباب بيجوز دوام أحوال الإنفراد بالسلطة في الدول العربية .. ومع الوقت بلشنا كمواطنين نحس انو صوتنا ماله قيمة ، وانو كلمتنا متل قلتها ، وهيك اتنامى عندنا نزعة الكسل و عدم تقدير الزات وحتى الإستهتار بأنفسنا و دورها وفاعلينا ..
هم ..
ممكن في كتير اتململو وعم يتسائلو شو دخل هال الحكي بالسوبر ستار ...
دخل هال الحكي انو انا بالفعل حسيت بغبن شديد جدا لمن دخلت شهد مرتين بمرحلة الخطر
يا جماعة انا عن نفسي من اقل الناس متابعة للتلفزيون والفضائيات وبرامجهم .. و عندي الكثير من التحفظات على الدور السلبي للإعلام العربي والأسروي (الي بيتوجه للأسرة تحديدا) ..
وتحديدا برامج الستارز (سواء الأكاديمي او السوبر او غيرها ) ما بتنال اعجابي ولا بتابعها ..
بس الطفرة بهال البرامج وببرنامج سوبر ستار تحديدا .. كانت
شهد ..
البنت يا جماعة
عبقرية الصوت !! استغربت جدا جدا .. دخولها بمرحلة الخطر مرتين والي هوي نتيجة للتصويتات .. الحقيقة هي ليست ان الناس مش مهتمة او الناس عم تتعامل مع الموضوع بطريقة اقليمية وبنزعة قبلية .. وانما _وبتقديري_ بيعود هذا لإحساسنا المتنامي مع الزمن بهامشية اصواتنا وعدم جدواها .. و عدم استعداديتنا لتقديم اي شيئ _الى حد كبير_ كرمال نسمع الناس صوتنا و نعبر عن رأينا ..
يعني بعتقد (وعم حاول كون حيادي) ان بقرارة الكثير او الأغلبية الساحقة من الناس الي عم بتابع هال البرامج وبكل الأقطار العربية .. عندهم ايمان انو شهد فعلا عبقرية الصوت و صوتها كما اسمها ..
شهد على شهد .............
بس الفكرة انو شهد سورية والسوريين تحديدا وبحكم تجربة الإنفرادية السلطوية الطويلة الأجل خلتهم يحسو بشكل مستمر بهامشية نفسهم وصوتهم ويحسو بكسل ممقت تجاه بزل اي شيئ كرمال يوصلو صوتهم وهيك ..
اخيرا انا بدعوكم جميعا ومهما كان رأيكم (سواء كنتم من مشجعي ابراهيم او شهد) للتعبير عن صوتكم .. يعني معلش
ضحي بتلات دقائق من وقتكم وادخل موقع السوبر ستار وقول رأيك وصوت ..
يعني معلش بالناقص من كام يونيت بالموبايل و اتصل صوّت ..
وخلوني كون واضح اكتر.. موضوعي هون ليس دعوى للتصويت لشهد ، او سواها .. ابدا .. وانما للتعبير ... عبّر !.. عبّر .. عبّر ..
اذا بك اتصوت لأنك سوري وشهد سورية .. فلا اتصوت ..
اذا بك اتصوت لانك سعودي و ابراهيم سعودي فلا تصوت ..
الموضوع هوي لناخد خطوة لقدام
لمن بتحب شخص .. ما تكتفي بحبك ليه .. وانما اخطي خطوة للأمام وعبر ليه .. ولو بإبتسامة.. ولو بوردة ..
لمن بتآمن بفكر ما .. ما تكتفي بإيمانك .. وانما خود خطوة للأمام ولو بالمساعدة في نشر هذا الفكر ..
لمن بتسمع صوت حلو .. ما تكتفي بالسمع .. وخود خطوة لقدام و لو حتى بقولة "اللــــــــــــــه" (ولو حتى
بمسج تصويت
)
صوتو خدمة للفن والطرب العربي الأصيل .. صوتو لإثراء موسيقانا العربية واغنائها
للتصويت عبر الإنترنت استخدم الرابط التالي
http://rack.futuretvnetwork.com/superstar/vote
1- اذا كنت تصوّّت للمرة الاولى (أو ليس لديك كلمة السر) انقر هنا
2- حط اميلك
3- روح شيك اميلك بتلاقي باعتينلك كلمة سر
4- رجاع للصفحة الي دخلتها بالأول الي هيي
http://rack.futuretvnetwork.com/superstar/vote
وحط اميلك والباس المبعوتة ليك ..
للتصويت عبر الإتصال من الموبايل والتوصيت
من سوريا 1439
من لبنان 1374
من فلسطين 1459
من السعودية 70077717
من مصر 1464
العين الي قاومت المخرز امبارح .. وبعدها عم بتقاومو لليوم .. بكرا بدها تقلعو !