خرج غيث من غرفة المكتب وتبعه الاستاز سامع..... وصلو إلى الغرفة حيث جلس السيد يتحدث وابو حمادة ينصت إليه ويتابع حديثه بتشوق مصطنع
دخل غيث مباشرة إلى صدر الغرفة وجلس بقرب والده..... ووقف الاستاز في مكانه عند الباب حتى سمع أمر السيد بالجلوس فجلس على اقرب كرسي عليه وهو متوتر وخائف من نتيجة الامتحان..... هل سيقبله الاستاز غيث كمدرس خصوصي ام سيسحبو عليه سيفون
؟؟؟
سأل السيد غيث: غيوثتي حبيبي كيف كان الدرس؟؟
فبدأ غيث بالضحك والقهقهة حتى كاد أن يغمى عليه ثم قال: ظريف كتير
فسأله السيد: يعني عجبك الاستاز وبخليه يعطيك دروس دائما ياحبيبي؟؟
فأجاب: اي بابا كتير هالزلمة اهبل وبيضحك وبدي اياه يجي كل يوم كل يوم لعندي
وعندها تنهد السيد الصعداء...... اخيرا اعجب ابنه باحد المدرسين وسيتحقق حلمه بأن ينال الطفل الدروس الخصوصية اللي يستحقها..... ثم خاطب الاستاز سامع: سمعت.... سمعت حبك غيث
وبدو اياك تجي كل يوم لعندو...... خلص لكن اتفقنا انو تجي كل يوم..... ومشان المصاري مارح نختلف نحنا كريمين وانت الظاهر عليك بتستاهل كل خير ورح اعطيك اليوم دفعة عالحساب شي عشر تالاف ليرة
وعندها كاد الاستاز سامع ان يفقد الوعي من كثرة الفرح..... يالله عشر تالاف ليرة دفعة وحدة...... ولك هالمبلغ لسه مامسكو بايدو دفعة وحدة ولا مرة....... وياسلام ياسلام رح يعطي المرة مصاري تشتري الهدية
وماأن تمالك الاستاز نفسه حتى قال: ولو سيدنا والله انا ماهمني المصاري ابدا..... بس حابب قدم شي خدمة للوطن مو اكتر....... بكل الاحوال مشكور كتير والله يديمك ذخرا للوطن ويخليك فوق رؤوس المواطنين ياسيدنا
والآن سأله السيد: ماقلتلي شو رأيك بغيث؟؟
فأجاب سامع: والله انو استاز واستاز كبير كمان..... يعني ماشالله عليه كامل مكمل.....ذكاء وجد واجتهاد وفوق كل هاد خفة دم...... يعني انا مر من تحت ايديي طلاب كتير ومخرّج اجيال كتير بس متل الاستاز غيث والله مامر عليي ابدا.... الله يخليه اكيد رح يطلع ابن ابوه ورح يكون شخص كبير ومهم...... يعني بيكفي ياسيدي تشوف مسكتو للقلم اللي بتدل على شخصية فذة وبعدين خطو اكتر من رائع يعني هيك.... هيك.... هيك..... كأنو خط شي دكتور ما بتتوقع انو شخص بعمرو يكون عليه خط...... ماشالله ماشالله
ماأن أنهى الاستاز سامع كلامه حتى قال السيد: لكن اتفقنا انو كل يوم من الاحد للخميس يعني خمس ايام بالاسبوع بتجي لعند غيث بمتل هالوقت وبتعطيه درس..... بس عطينا رقم هاتفك بركي شي مرة حب غياثو يشوفك بغير الموعد لازم يكون في وسيلة اتصال
وعندها أصابت الاستاز سامع حالة من التلبك القاتل وقال: والله ياسيدي مابعرف شو بدي قلك بس الهاتف حاليا مفصول..... بس بكرة من الصبح بكير رح ادفع الفاتورة وبينوصل اكيد
وعندها صرخ فيه السيد: ولك يخرب بيتك ولاه.... انو هيي فاتورة هاتف ليش مابتدفعها بوقتها..... عن جد انو انتو شعب بجم...... بكل الاحوال كرمال عيون غياثو عطيني الرقم وباسم مين مسجل وانا بحل المشكلة هلأ فورا..... يعني قبل ماتوصل على بيتك بيكون الهاتف موصول وبتبقى بتدفع الفاتورة على راحتك واذا مادفعتها كمان مو مشكلة.... المهم غيث يحكي معك وقت اللي بدو ..... وهلأ تعى استلم مصاريك وانصرف..... خلص لقاء اليوم..... يللا يللا الله معكن
