[eman maher]

هاى يا بنات و ستات أخوية
انا جايبه لكم شوية ماسكات للبشرة العادية و انا شخصيا جربتها و لقيتها فعالة جدا
هقدملكم ستة ماسكات مناسبة جدا و مكوناتها طبيعية و فى متناول اليد :
الماسك الاول:-
هاتى نصف كوب مستردة و دوبيه فى اتنين لتر مية ( أنا عارفة ان اتنين لتر دة كتير بس معلش اتحملونى) و اخلطيه بأوراق الورد البلدى المطحونة و لما يبقى عجينه ,حطيه على وجهك لمدة نصف ساعة و كرريه مرتين كل اسبوع و شوفى النتيجة.....
الماسك التانى:-
هاتى صفار بيضتين و اضيفى له شويه عسل نحل صغيرين و نقطتين زيت لوز و ضعيه على وجهك لمدة عشرين دقيقة و بعدين يشطف الوجة بالماء.....
الماسك التالت:-
هاتى نص كوب من اللبن المتخثر (يعنى اللبن اللى انفصل الماء منه ... اللبن المقطع يعنى بلغتنا احنا المصريين) و بعدين حطى له عصير ليمونه كبيرة او عصير ليمونتين متوسطين او عصير قفص ليمون مش هيفرق كتير , و بعدين حطيه على وجهك لمدة نص ساعة و اشطفيه بالميه الباردة و اوعى تنسى الباردة دى......
الماسك الرابع:-
هاتى نص كوب من اللبن المتخثر ( دة ورانا ورانا) و حطى عليه عصير ليمون تانى بس زودى المرة دى عصير نص برتقالة ( أنا عارفة طبعا ان المصريين مش هيقدروا يعملوا الماسك دة لانه مفيش برتقال دلوقت و العثور عليه فى مصر بجدودة كويسة مشكلة عندنا بس معلش)
المهم يا ستى ياللى اكيد مش من مصر انك تصنعى عجينه و تحطيها على وجهك لمدة ... لمدة ... بصراحة مش فاكرة المدة .. هو انا هافتكر ايه و لا ايه... بس نص ساعة هيكون كويس .. و بلاش اكتر من نص ساعة علشان فى ماسكات بتقلب بغم بدل ما تدعوا عليه... المهم ان الماسك دة هيساعدك على تفتيح البشرة ......
الماسك الخامس:-
هاتى شوية خيار مبشور و مية جوز هند ( المية اللى جوة ثمرة جوز الهند يعنى .... افهموا شويه بقى) ... المهم انك تحطى الخليط دة على وشك لمدة نص ساعة و دة كمان هيفتح البشرة ....
الماسك السادس:-
هاتى موزة مستوية اوى يعنى كاملة النضج .. (بس يا ريت تشميها لان ساعات ناس بتجيب موز بايظ و تقول انه دة هو الموز الناضج تماما ... لازم يبقى ناضج بس مش لدرجة انه يحلف بالطلاق انه ناضج تماما .) ....... المهم انك تحطى لهم شوية فراولة و حطيه على وشك برضة و بعدها هتلاقى وشك ملىء بالنضارة و الحيوية......

كفاية جرعة الماسكات دى بقى النهاردة لانى بصراحة تعبت و ايديه وجعتنى من الكتابه بس مش خسارة فيكو

على فكرة يا جماعة لما سألوا النجمة العالميه كاميرون دياز و النجمة العالمية برضه كاترين زيتا جونس عن سر اسنانهم الجميله و ابتسامتهم الساحرة قالوا ان السر هو انكل واحدة بتدعك اسنانها كل يوم الصبح بثمرة فراولة قبل غسيل الاسنان بشويه
هو انا ليه بقول دة مع انى بتكلم فى البشرة مش فى الاسنان ؟؟؟؟ مش عارفة بس مش مهم اهى معلومه و خلاص و اهو ابقى كسبت ثواب فيكم .... ههههههههه

اشوفكوا بعدين بقى لانى وجعت لكم دماغكم مش كدة .... بس ما تفرحوش اوى انا هرجع تانى بمواضيع جديدة علشان اوجع دماغكوا تانى ..... سلااااااااااااااام و يا رب يكون عجبكم الموضوع ومستنية ردودكم يا ترى اكتب لكو تانى مواضيع و لا اخرس و اقعد فى بيتنا اقشر بصل....