[Joe]

تحياتي شباب

انا بشوف انه غلط تكون اول بنود الحزب هيي بنود متعلقة بالسياسة. السياسة شيء بيتغير. المطالب يلي ذكرتوها عن حالة الطوارئ و التعددية السياسية, مفروغ منها.. بس ما يعني انو الحزب ما ممكن يتخذ اجراءات اضطرارية او استثنائية ببعض الاوقات. مثلا بأميركا الحرية الشخصية موضوع مهم, بس بسبب 11 سبتمبر صار في ضغط على الحرية الشخصية. هاي امور استثنائية و ما بتتعارض من توجه الحزب الحاكم بشكل عام

أهم شي بالبداية هوي توضيح الخط الاقتصادي. الخط الاقتصادي كبداية هوي لحالو بيوضح الخط الاجتماعي و الخط السياسي. من السياسة الاقتصادية بيقدر الحزب يصوغ سياسته اليومية و الفكرية و غيرا. بس طبعا ضروري يكون في مبادئ فكرية كمان.. ماني عم انفي دورها المركزي... بس المحور الاساسي بيتعلق بالاقتصاد

مثلا لو انا كنت بدي اعمل حزب, فبتكون الليبرالية بشكل عام هيي الخط الرئيسي. و مدعومة بانفتاح اقتصادي و ترحيب بالاستثمار الخارجي ... هاي لحالها بتعطي فكرة عن الحزب انه حزب منفتح... و متحرر من قيود القوميات و الوطنيات. ما يعني انه حزب مانو "وطني" و ما بيرتبط بالمشاعر الوطنية و الوطن... بس في أولوية

الليبرالية بتعني بهل حزب ليبرالية الحزب من الافكار الدينية , و التعامل بطريقة حضارية مع قضايا المثلية الجنسية و الاقليات و البحوث العلمية الحساسة و غيرها

يعني لما الحزب بدو يتشكل و يرشح نفسه بالانتخابات, كيف رح يخاطب الشعب؟ بشو رح يحكي ممثلي الحزب؟؟ طبيعي الكلام رح يكون متعلق بالاقتصاد.. و خطة الحزب بالمجتمع: فتح مدارس, دعم للمستشفيات, تخفيف ضرائب... هل تفاصيل هاي كلها موجودة و بتصدر عن كون الحزب حزب ليبرالي او محافظ. لو محافظ رح يكون الدعم متوجه لشغلات متل الضمان الصحي و العجزة و الأسرة و الدين و منع الاجهاض ... و يمكن كمان دعم الجيش و التسليح.. و التأميم و الوطن و الشعب و هل حكي يلي بيضرب على الوتر الوطني... و لو ليبرالي بيحكي بتخفيض الضرايب و منح حريات صحفية اكتر و هل شغلات

شغلات متل الديمقراطية و الحرية الشخصية... يعني هاي بتكون داخلة بدستور البلاد

بس نحنا كسوريين يمكن الفكرة داخلة ببعضها... يما انو الحزب الحاكم صاير هوي الدستور و هوي كلشي

بس الحقيقة انو الأحزاب , صحيح هيي احزاب سياسية, بس لما يصير الشغل على الساحة الداخلية, فكل الحكي رح يكون مستمد من خلفية الحزب الاقتصادية و تحفظه او ليبراليته

سلامات