ليش مذيعاتنا دائما عندن نفس الأسئلة ؟؟
ليش كل الشعب حفظان شو هي الأسئلة ؟؟
ليش ما بتتغير هالأسئلة؟؟
يعني المذيعة بتروح على شي حديقة أو شي مطرح متجمعين فيه الأولادالصغار بالعيد.....وبتبلش بالأسئلة الفذة تبعها
اشتريت لبس جديد على العيد حبيبي ؟؟؟
يعني شو بتتوقع يقلها ؟؟
لأ...ما اشتريت لبس جديد....هدول سرقة من على حبل الغسيل تبع الجيران
ولا بتتوقع يقلها...
أخدت لبس أخي الكبير تبع السنة الماضية ولبستو...؟؟
طيب بركي فعلا كان في ولد
هيك وضعو....ليش حتى تسألو وتكسرلو
نفسيتو قدام بقية الأولاد
شو بتشتري بالعيد...شوكولاته وأكلات طيبة؟؟
لا والله...على العيد بشتري 10 غرام حشيش...وبنقعد نصطهج فيون أنا
ورفقاتي.....وبعدين بنأركل....وبناخدلنا كاسين
يعني الولد الصغير شو بيحب يشتري وياكل ؟؟ مجدرة ولا عدس بحامض؟؟
شو بتعمل بالعيد احكيلنا حبيبي....بتلعب
بالمراجيح؟؟
لأ أبدا...مابقرب صوب المراجيح....بالعيد بروح بلعب مصارعة
رومانية...وشوية تايكواندو....
بتلعب مع أصحابك بالعيد؟؟
أعوذ بالله...شو مع أصحابي...أبدا...بنزل بلعب مع شوفيرية التكاسي
والزعران...
مع مين بتحب تروح بالعيد؟؟ مع ماما ولا بابا؟؟
الله ياخد الـ 2... أسئل من بعضون....مابينطاقو....
احكيلنا ...وين بتروحو بالعيد إنت ورفقاتك... حبيبي....؟
مابدها سؤال...على الكباريه...لترين عرق.... 4 رقاصات .....2 على
اليمين و2 على اليسار....
طيب مذيعاتنا المهمات...ما عم يلاحظوا كيف
الولد عم يتلعثم...وعم يتلبك...وما عم يعرف يحكي...
....وبلشت تشط ريالتو من العبطة...وما عم يطلع صوتو....وما عم يحكي شي....؟؟؟
هالمذيعة الحنونة هي....ما عم يطلع من خاطرها تترك الولد بحالو؟؟
ما عم تلاحظ إنو الولد ما بدو يحكي....؟؟
لك اتركيه بحالو....
ما عم تلاحظ المسكين قديش انعبط وتدايق وعلى شوي راح يبكي بدو
ماما...نزعتلو العيد وأبو العيد....إي شو هالحنية الزايدة هي؟؟
يحرق حريشون على هالأسئلة