[بقـ انسان ـايا]

- أول شي وقبل أي شي يكون مظهرك حلو وجنتل حتى لو ما كان شكلك حلو اقصد شيفه يعني ( عادي يقولون الرجال يكفي انه يكون اجمل من القرد بشوي ) <<< نفسي اعرف قرد مين اللي قال الحكي ذا
أو اقلها اقلها يعني ما تنفرها
وعلى سبيل المثال
تحافظ على نظافتك الشخصية وتفرش اسنانك بالذات لو كنت تعسل ولا تدخن
عطر رجال رايق

2- ثاني شي قبل لا تعاملها على انها زوجه حاول تكون صديقتك يعني زي ما الوحده محتاجه واحد يضحك بوجهها ويمزح محتاجه واحد لي صار مهموم ما يلاقي مكان افضل من قلبها يطيح عليه همه
وغير كذا لي ضاقت بها الوسيعه حتى لو منك تجي تحكي لك اصرف ما تروح تدور غيرك تحكي له
مثال اهلها <<< كانها بنت اجاويد

3- ثالث شي حاول تجذبها برومنسيتك معها وحاول تحسسها انك تبي منها قلبها قبل جسدها او ان جسدها اخر حاجه تفكر فيها
بتقولي كيف

بقولك عشان


لا لا جد امزح

بقولك يعني مثال تخيل انك تجي نولع شمعتين مع كاسين عسير على موسيقى كلاسيك او اللي تبي
تطلب منها انها تراقصك او ترقص لك عادي
او تجلس تسولف معها عن أي شي



4- حاول تشاركها حياتها يعني بدال ما تكون الساعة وحده لازم تحط الآكل وتصلح الفطور متى ما قمت
ادخل أحيان موب دايم أحيان معها وحاول تساعدها حتى لو خربت عليها صدقني بتستانس هي لمجرد المشاركه الوجدانيه
مافيها أي عيب انك تمسك شي تصلحه لحالك تطبخه صدقني لوه وشو بتصفق لك وبيصير راسها ما يطلع من الباب


5- اذا كان في زوجتك بالذات اول الزواج
يحصل كثير شي ما يعجبك من طبايعها تصرفاتها
مثل لبسها – اهلها – صاحباتها .. الخ
لا تفرض عليها تغيره خلها بدون ما تشجعها طبعا اتركها تسوي لحد ما تحس انها غلط من حالها وبمحبتها لك راح تمشي على اللي انت تبي
بتقول زوجها ومن حقي بقولك انت خطبتها ودخلت بيتك وانت تدري عنها انت ما خذت وحده تربيها ماخذ وحده تصير شريكه معك
وهذا حوقك يا الارفل وكله ولا حوقه

6- علمها تكون قويه مع العالم كله وما تخاف من احد مدام هي زوجتك عطها الثقه في نفسها
لكن بمجرد تصير لوحدها معك تحس انها اضعف وحده بالكون
قلت لي ليش
بقولك عشان يا جنط المرأة قمة قوتها في ضعفها امام الرجل
وفي نفس الوقت دايم خلها تشوفك مع العالم انت القوي اللي ما يتنكسر شوكته اقصد بمظهرك وشخصيتك
لكن بينكم حاول تحسسها انك داخلك طفل صغير محتاج لحنانها

7- شي مهم لي بغيت منها شي لا تطلبه اوامر
لا حاول دايم تكون طلاباتك مع ابتسامه وكلمه حلوه
الله لا يهينك - عيوني انتي - ..الخ
ولي صلحته برضو تشكر
اذا طبخت لك شي مو كله تقول حلو وتسلم يديك ولا تطلب منها لا لا لا
بالعكس ما بين فتره اطلب منها تصلح لك كذا
ولي صلحته خلك ذويق شوي
اذا ما اعجبك قولها لوك مكثره كذا والله المره اللي فاتت كان اطعم
يعني عشان تتحمس
ولو صلحته حلو برضو عطها من الكلام الحلو يعني اتفخ راسها
لأن مسكينه حرام تجلس احيان تصلح لك طبق اربع ساعات تتعب فيه
وتجي تلفه في عشر دقايق بدون ما تتشكر


8- حتى لوها ام ورعان وزحمه مسكينه
وانت شاكوش عادي
ترا كل واحد منا داخله طفل صغير محتاج لرعايه وسريلاك
يعني في حاجات بسيطه
لو اسمها هيفا بدال ما تقولها ام فلان قولها هيوفه او حتى هيوفتي احلى<<< من لها بالدنيا غيرك يدلعها
حتى لو كان اسمها موب حلو عادي دبره ودلعها
مثال شقحا << شقوحتي عادي ما فيها شي
وان مره مره خلاص قولها عيوني حبيبتي عاد والله انها مره رايقه
حلوة اللبن لا اسفه نسيت ان حلوة اللبن امك ما عليش مكثره لبن اليوم


بدال ما تقولها عيالك قول عيالنا ولا انا وعيالي ما لنا غيرك يا بطه << اما بطه كثر منها هاهاها

ما فيها شي لو خذت لها ورده ما بين فتره وفتره يعني ادخل وانت مبتسم ومخبيها وراك
والله انها بخمس تريل يعني ما اعتقد واجده عليها


9- وحده من البنات تقول جنوني لي قالي روحي مع اهلك
على فكره احيان الوحده تحب تاكل جت وتنتظر منك وعد على انك تهملها في كبد اهلها

10- نقطه مهمة جدا
الغيرة مطلوبة شي اكيد ما نختلف فيه بس بحدود
ما يحسسني اني حقته ممنوع أي احد من الدنيا يتعامل معي بشكل مباشر او غير مباشر يعني ثق انها بتطاوعك لكن اخر شي بتطفشها ترا
خلها شوي تتنفس بحدود اللي ما تتعدا العرف والتقاليد والدين قبل هذا كله

اقرب مثال
لو اكلم امي قالي وش تبي منك
طيب انا لا زلت بنت اهلي لهم خصوصياتهم اللي مو من حقه يعرفها
وعلى نفس الوتيرة حاجات كثير


11- دايم حاول تطلعها لي صرت فاضي منها تقضي اغراضها ومنها تطلع وياها مكان رايق تتعشون فيه تشربون لكم شي تحكون في جو هادي
ويا ليت لو تخليها تساعدك في اختيار المكان اللي بتتعشون فيه
يصير اليوم هذا اسمه يوم العائله
كثير من الناس يمر عليهم الاسبوع فيه كثير من الزحمه احيان اسبوع كامل ما تقدر تتكلم كلمتين على بعض رايقه معها
ذا اليوم مخصص لكم وبس تنسون الدنيا والناس
وتنسى فيه اخوياك
وهي اهلها
وكل شي




أسرار أكيد انها مو جديده بس ممكن تكون غايبة عن البعض

- ترا أي أنثى مهما كان قويه اضعف منها عند الكلمه الحلوه مافي
يعني كلمه حلوه توديها وكلمه حلوه تجيبها
بالعربي مخفات ونصدق
مخفات بس مو غبيات
نصدق اللي حنا نبي بس في حاجات لو يمووت الرجال عشان يقنعها ما في امل
سالفة ان حنا ناقصات عقل ودين شي ما يعيبنا لكن هو شي في صالح يالرجال حاول تفهم هالشي وتستغله صح لصالحك

تذكر دايم اذا كانت زوجتك تمثل لك نص حياتك او ان كثرت ثلاث ارباعها وهذا الواقع
ان عند زوجتك روحها وحياتها كلها
يعني في حال ان الزوجه صارت ما تعجب في حلول كثيره عشان ترجع تكون سعيد انت تقدر تتزوج اربع مو وحده
وتقدر تطلقها ولا يعيبك شي حتى لو كنت ابو عيال ما راح يعيبك هالشي زي ما يعيبها عشان تكمل حياتها
بينما انت اذا ظلمتها تأكد انك بتكون سلبتها كل شي في دنيتها
لو خسرتك راح تخسر نفسها
ولو تطلقت بيصير اسمها مطلقه مو عزوبيه مثلك <<< للأسف واقعنا اللي ما نقدر نغيره


ابسط حل


ابسط حل لجميع المشاكل
اذا انت في مشكله معها اول شي حط في بالك اللي يبي يصالح ينسى اللي فات ولازم تتفق معها على هالشي
لكن في حال انه لا بد من نقاش
صلح اتفاق معها انكم ما تطلعون عن المربع اللي اسمه غرفتكم الا متصالحين انشالله بعد تكسير روس لكن ما تعتبون باب الغرفه الا متصالحين
منها تضمن انكم ما تطولون متخاصمين
ومنها تضمن ان اسرار بيتك ما تطلع برا
لأن نظرة الناس لكم ممكن تأثر كثير على حياتكم وحياة اولادكم في المستقبل
والاهم انك وقت النقاش قد ما تقدر يكون صوتك هادي وتحاول تلتمس الاعذار للطرف الثاني وتحاول تحس فيه وشوله هو اصلا غلط في حقك
ولو قدرت انك تبتسم وتلومها لون حبايب صدقني وقتها بتصير قااااااد النمله وينكسر خشمها بمزاجها وبكذا تكون انت الربحان

... في نقطه بعد يا ليت تنتبهون لها
وتعطوني رايكم فيها
كثير من الحريم يفضلون ازواجهم يقولون لهم لوين رايحين ومن وين جايين
وعذرهم في هالشي عشان تتطمن عليه بس وتدري وش الدنيا به لا اكثر
مدري هل من حق الوحده هالشي ولا مو من حقها