اقتباس:
كاتب النص الأصلي : Syrian__Angel
هلا ... 
مشان الجزء الاول ... فبعتقد اني رجعت وضّحت شو بقصد بمفهوم العلمانية ..
هلأ الشغلة اللي لفتت انتباهي هيي جملة " تضعه في مركزه الحقيقي ".... يعني الدين مركزه الحقيقي عالرف ؟!
ما بظن ... لانه الدين - شئنا ام أبينا - موجود بهالكون وما بيأثر عالانسان بشكل سلبي ... بس بئا نسبة التديّن " او نسبة التمسّك بالدين وتطبيق ما جاء فيه بحذافيره لدرجة قد تصل بالبعض للتشدد " هيي اللي بتختلف من شخص لآخر .. ومن مجتمع لآخر .. وتصرفاتهم هيي السبب بالفكرة المغلوطة هي ...
وشغلة تانية .. الدين ما بيهمّش العقل - شيل المتشددين ع جنب .. هدول حالة خاصة - ، وما بعرف من وين طلعتو بهالجملة اصلا واقنعتو حالكم فيها !!
في كتير عالم متدينة وبنفس الوقت بتطبّق العلمانية بأفكارها الى حد ما ... مو شرط تمسكها حنبلية بالدين او بالعلمانية .. يعني مو اذا كنت متديّن تتطلع عالعلمانيين انو يييه ليك هدول كيف .. الله يعينهم ع هالعقلية ... ويجي العلماني يتطلع عالمتديّن انو يخرب بيتو لهلأ بهالعقل المصدّي وما راضي يشغلو ....
الفكرة اللي بدّي وصلها ، انو برأيي الانسان بينخلق وعندو الشغلتين ( بقصد الدين والعقل ) .. ودرجة ابتعاده عن وحدة منهم واقترابه من التانية هيي اللي بتحدد " ماهيّـة " الشخص .. ولذلك خطأ كبير انّـو توصف كل متدين بالرجعية وكل علماني بالتقدّمية ..
بعرف حالي حكيت كتير  .. بس لسه بقي شغلة ...
انا بتّفق مع فلاش باك انـو ذكرك مثال السعودية كدليل ع أثر الدين وسببه بتخلّف هالعالم .. غلط ، لسبب بسيط انّو يا اخي غير الله ما بيفهم عليهم كيف عم يطبقو الدين !!
يعني لو كانو عنجد فهمانين بدينهم وحابّــين يطبقوه صح .. كانو عرفو انو مافي شي اجباري وبيصير بالقوة ( لا اكراه في الدين ) .. هلأ كمثال جماعة الامر بالمعروف والنهي عن المنكر اللي بتشحط الواحد شحط وقت الصلاة .. طبعا هدول غلطانين كتير .. ولو كانو فهمانين كانو عرفو انو ضررهم اكتر من نفعهم ... لانو اللي حابب يصلّي ما رح يستنى حدا ليذكرو .. واللي مو حابب ما بحاجة لتجبرو ... وبالاخير كل واحد حر بحالو ...
آخر شغلة بدي قولها ... انو يا جماعة لا تخلّوا الدين شمّاعة بتعلقو عليها كل اخطاء البشرية ... العيب مو بالدين .. العيب باللي عم ما عم يفهمو مزبوط ... |
بصراحة ردك عجبني كتير و أنا بأيدو
بس بهالفترة يللي نحنا عايشينا هلأ ما رح ينفع غير النظام العلماني , يعني خدي مثلا العراق , فيا كردي و سني و مسيحي و شيعي و كل القوميات و الطوائف... هدول ما ممكن يتعايشوا غير بالنظام العلماني !
بعدين نحنا هلأ بفترة عم نفتقر فيا للأنظمة الدينية المعتدلة , بما أنو قلت دينية فرح قول الإسلامية لأنو المسلمين بيشكلوا الغالبية العظمى بأغلب الدول العربية , فلو صار في نظام اسلامي حاكم متل الأخوان المسلمين كان صار في مذابح ( مع أحترامي لهالحزب و أفكارو) يعني معظم الأنظمة الاسلامية اللي صايرة هلأ هيي أنظمة تكفيرية متعصبة بتفتقر للإعتدال
فمشان هيك للفترة الحالية بعتقد أنو النظام العلماني هوي الأنسب , و الأنظمة العلمانية بالأخير ما بتحارب الأديان...
بس بالأخير أنا شخصيا بتمنى أنو يحكمنا نظام إسلامي معتدل بس بهالفترة هي بظن أنو هالشي يعتبر من المثاليات يللي مستحيل تتحقق و تنجح بالوضع الراهن...
بحييكي