انو بدايتا. معلم انا ابدا ما عصبت.
ما بعرف من انو رد استدليت اني معصب.
بس بكل الاحوال.
معلم متل ما قال جي ام سي هاي دراسات ممكن تزبط وممكن لاء.
ومتل مافي دراسات بتأيد فصل الشباب والبنات في ظاهرة تانية بتأيد جمعهون.
بس لاحظ الفرق بين الدراسات.
الدراسة اللي بتأيد الفصل. بتحكي عن ارتفاع مجاميع البنات. ومعدلاتهون.
اما الدراسة اللي بتأيد الاختلاط, فهية بتحكي عن احترام متبادل بين الجنسين, ووعي تام انو هالجنس بيطلع معو متل ما بيطلع نحن معنا, واكتر.
الاولى ممكن نحققها بكون البنات بمدرسة مختلطة.
بينما التانية كتير كتير صعب نحققها بكون الشب او البنت بمدارس خاصة, لانو بكل بساطة هني ما عم يتعاملو مع بعض.
هلق في شغلة تانية. مافينا ناخد المجتمع الاميركي (هاد اللي انا عايش فيه وبعرفو مشان هيك بحكي عنو) على انو مجتمع كامل.
ففي كتير من الاحيان الرجل الو افضلية على المرأة, والمرأة بتتعامل بطريقة مختلفة عن الرجل.
وبكتير من الاحيان بفهمو المرا انو هية اقل قدر من الرجل.
لاكن بالنسبة لتعاملون مع المرأة فهني ارقى مننا بمليون مرة.
الدراسات اللي ذكرتها انت, ما ناقشت عوامل التانية. وهالشي خطأ.
في عوامل كتير بتأدي لتراجع مستوى الطالب. دراسيا. كتير فوق ما ممكن نحن نتصور.
هالدراسات ما اخدت غير كون البنات بمدرسة لحالون.
وكمان هالدراسات انعملت نسبة للمجتمع الاميركي. اللي بيختلف كتير عن مجتمعنا.
بس انا كوني كنت بمدرسة مختلطة, وبعرف رفقات من مدارس غير مختلطة.
فيني قلك انو هالتجربة بسوريا ناجحة جداً.
نحن ما بدنا نكون متل الاميركان.
نحن منسعى لنكون افضل منهون.
