[oliver68]

كاتب النص الأصلي : tiger

يعني ما عم اعرف شو قلك بس ياللي بعرفوا انك بعدت كتير كتير عن ياللي انا قصدته من مشاركتي السابقة ,انا كتبت شي و انت رديت شي تاني تماما , ياريت ردك ما كان يكون بهالطريقة العاطفية العصبية المتوترة , لأعرف رد عليه لطريقة توصل المطلوب للقارئ بشكل احسن .....
يعني انا ما تحاملت على الدين الاسلامي و لا على المسلمين بشكل عام و انت عم تحاول انو تطالعني حكيت حكي انا ما قلته !!!!!! ......
خلينا نحكي شغلة شغلة ......
انا الاسلام اخي لا بحبه ولا بكرهه ( يعني انا مو معني فيه متل ما انت مانك معني بالمسيحية ) انا فقط بحترمه و جدا لانه دينك و انت ابن وطني و اخي ......
هاي شغلة و الشغلة التانية انو الاخطاء ياللي عم تحكي عنها ( ملينا من سيرتها ) لك اخي انا كمسيحي شرقي ما بتعنيني لا من بعيد و لا من قريب ....
على اي حال وللتاريخ , كوبرنيكوس و غاليليو قامت الكنيسة ( بالاعتذار ) عن هالامور و اوضحت موقفها منها , يعني يا ريت تركيا كمان تحذو حذو الكنيسة و تعتذر عن مذابح الـ 1914 / 1915 و ترد الاعتبار لهالناس ياللي ماتت بدون سبب .....
بالنسبة للاستعمار الصليبي لمعلوماتك انو لما اجى قتل من المسيحيين الشرقيين اكتر مما قتل من مسلمين , يعني في يوم واحد فقط تم قتل 50.000 مسيحي شرقي في اجتياح مدينة اورفا وقبل ما يوصل الجيش الصليبي للقدس و يسقطها من يد المسلمين , فلا تحاسبني على شي انا نفسي كنت ضحية له متلك .....
و هذا ما كان سوء تفسير للدين المسيحي , معلمي بكل كلمات ربنا و مخلصنا يسوع المسيح ما اجا ولا جملة واحدة بتحرض على القتل و الحرب و الاعتداء و هالشي اكيد معروف للكل ......
القصة كانت قصة مصلحة اباطرة و امبراطوريات و بظن انك بتعرف هالحكي .....

بشكرك على الشبه شتائم ياللي وجهتلي ياها بطريقة مبطنة ضمن مشاركتك بس حابب قلك انو يا ريت ما تزاود علي بموضوع اصدقائك المسيحيين لانو انا متأكد شو ما كان عددهم عندي اكثر منهم اصدقاء مسلمين و مقربين لحد الاخوة .....
بالنسبة للانتقام على طريقة المتطرفين القذرين فهو اكيد مو مقبول بالنسبة لي و انا ما طلبته و لا كمان حتى صاحب المقال ......
بيكفينا انو يكون في اعتراف بالشي الصار و تفهم إله , و هالشي بيعني انو اكيد ما رح يتكرر لانه سلفا مدان .....
نحنا هون نقاشنا هو المهم , انا ما عم اطلب انتقام , انا عم اطلب حوار حيادي بناء , بيبني فكر واعي ......
خلينا نسمي الخطأ بإسمه و نعتذر عنه في حال وقوعه , خلينا لا نخاف من الحقيقة و نعترف فيها , خلينا فعلا نقبل بعض على اساس المساواة و لاشيء غير المساواة ....
لانو هيك وبس هيك نحنا بنكون فعلا ابناء وطن واحد عايشين مع بعض بمحبة
هادا ياللي عم اطلبه ......
واذا فهمت شي تاني من كلامي فهاي مشكلتك .....

صديقي تايغر أنا باعتزر من كل ألبي إزا فهمت من ردي إنو فيه شتيمة، عنجد باعتزر، بس تأكد تماما إنو ما كان أصدي هيك شي، و أما مشان إنو أنا عمغالي برفقاتي، أنا ما بعرف شو يللي خلاك تفهم إني عمغالي أو عمفكر هيك!!!!!!!!!!!!!!!! هلأ في شغلة بدي قولها إنو صحيح إنتي ما حملت على المسلمين و الإسلام، بس حابب زكرك بفقرة صغيرة بأول موضوعك، صحيح هالحكي مو حكيك و حكي مقتبس، بس على الأقل إزا ما كان عاكس موقفك كان فيك تؤول إنو مو كل الموضوع بيعكس أفكارك و آراءك الشخصية، أنا يا سيدي كنت عمبقرأ موضوعك بكل تمعن و فهم و موافقة على فحواه لحد ما اعترضتني هالفقرة يللي نزعت الموضوع كلو و سببت كل سوء هالفهم، و سبق و علمتلك ياها بالأحمر بس رح حطها مرة تانية: " بالله عليكم لا تقولوا لي ان من اصدر هذه الفتوى ليس مسلما ولا يمثل الاسلام، فنحن في وضع مرعب، ولن يفيدني اي تبرئة للذات وللاسلام، فما اراه وما اسمعه وما يفرض علي بقوة السلاح اصدق من كل تبريرات المبررين، انه الم وعجز لحد العي لحد الشلل، الشلل الفكري والشلل عن الاتيان بالجديد، فما ذنب انسان كذ وشقى لكي يكون له دارا ومسكنا له ولاطفاله وفجاءة يخير بين ان يترك كل شئ، او ان يغير عقيدته، وحتى لو ارتضى بتغيير عقيدته، فعلى اي مذهب، فمن الواضح ان تغيير الدين ليس بكافيا، فغد كل قوي سيفرض تغيير الناس لمذاهبها، كما عملت الدولة العثمانية والصفوية في العراق. "
يعني إنتي من بداية الموضوع منعت أي واحد يدافع عن الصح إنو يحكي، بحجة إنو "السلاح أصدق"، فأنا كتير استغربت إنو واحد مثقف و فهمان و واعي متلك يآمن بهيك كلام و يوافق على هيك رأي.
الشغلة التانية أنا يا معلم و أبلك كمان أطالب تركيا بالاعتذار، و لاتنسى يا صديقي إنو كمان الاحتلال الصليبي للقدس كانت دوافعو دينية، يعني متل احتلال اليهود هلأ، بس الدوافع الحقيقية هيي المصالح الشخصية للأباطرة، و هلأ عمبصير نفس الشي معنا، يعني القتل عمبصير بدوافع إسلامية بينما هوي بالدرجة الأولى بيخدم مصالح فئة معينة ما إلها علاقة لا بدين ولا بغير دين، و متل ما المسيحيين انقتلوا أكتر من المسلمين بالاحتلال الصليبي، هلأ كمان عمبموت مسلمين أكتر بتريليار مرة من المسيحيين بحجة المذهب و حضرتك شايف الشيعة و السنة و التكفير يللي نازل على أبو جنب، يعني الزمن عمبعيد نفسو لكن بغير شكل، و متل ما إنو الإنجيل مافي أي أمر بالقتل، فأنا كمان بقلك إنو لا القرآن ولا السنة النبوية الشريفة فيها تحريض عالقتل، و إنتي كمان بتعرف هالشي و يمكن أكتر مني. و أنا باعترف إنو كلشي عمبصير قتل، هوي قتل عنصري و نتاجو ناس متطرفين و شباب انغسل دماغهن مشان تنتشر الفتنة بيني و بينك و بين كل واحد فينا، و هي أنا ما خفت من الحقيقة و بعترف إنو يللي صار غلط و انا باعتذر منك بسبب هالحثالة من البشر، لكن مهما كان فهوي لا يمثل الإسلام ولا المسلمين ولا بأي شكل، ولازم ما نسكت قدام هالظلم، و نحنا لازمنا ثورة عيللي بيستغلوا الدين لمصالح شخصية بحتة، متل ما ثارت أوروبا على حكم الكنيسة يللي ما إلها علاقة بالمسيحيين، و بصراحة يللي حسيتو من صاحب المقال إنو عميصطاد بالمي العكرة من ورا هالجملة، و ما بدو إصلاح ولا تفاهم ولا نقاش، يعني المقال كان حلو و فيه منطق و بلش التخبيص من عند هالفقرة.

بالآخر يا صديقي أنا بالنهاية معك و لا يمكن كون ضدك، لأن إنتي متل ما حكيت ابن بلدي و متل أخي،و أنا بدي اعتزر مرة تانية إزا فهمت مني شي إساءة، و حقك عراسي من فوق، و هي أحلى وردة للورد ، و كمان أحلى بوسة لعيونك الحلوة