ما شا الله عليك أخ حسام .. الواحد بيفتخر أنو موجود بنفس المكان مع إنسان متلك .. رغم أنو كتير شغلات ممكن يختلف معك فيها أي عضو منا و تكون نظرته مختلفة لكن ما بنقدر إلا نحترم و نفتخر بإنسان متلك و هاي مانها مجاملة إطلاقاً و إلا كان فيني ما شارك أصلاً هون ..
قرأت إجاباتك كلها و كتير نقاط حابب ناقشك فيها لكن إنسجاماً مع الإتجاه العام بالمقلاية بكتفي ببعض الأسئلة و أرجو ما تكون تقيلة عليك و تاخد من وقتك كتير .. و بننتظر مع أخونا الكريم حسام أنو يشاركنا بمواضيع النقاش بعتقد أنو من حقنا على إنسان ما شا الله جدا مثقف و الأهم صادق متل ما حسيت بردودك أنو نتعلم من تجربتك و من أفكارك ..
1_ أخي حسام كتير مواضيع من السنة الماضية لهلاء تحدثت عن أخوية و عن المشاكل يلي بتصير بأخوية لفتتني جملة كتير كنت تتكررها بكذا موقف ( أخوية مانها تجمع نخبوي .. ) لاحظت انو كتير معني بأخوية إنعكاس للواقع الحقيقي بكل تناقضاته .. سؤالي أخي حسام .. يعني المفروض كصاحب موقع على الشبكة أنو تهتم بمستوى معين أو أنو تطمح لمستوى معين من الناس الموجودة حتى ينعكس هالشي على مستوى الموقع بقصد هون مستواه بين المواقع أو المنتديات الحوارية العربية .. شو الدافع يلي خلا حسام يتنازل عن ريادة كان ممكن تكون سهلة بوجود مجموعة كبيرة من الناس هون و تكون قمة الأماني عند حسام هو تجمع غير نخبوي بكل تناقضاته و همومه و مشاكله ؟
2_ أخي حسام و أرجو ما تعتبر سؤالي هدا عبارة عن نقاش في وجهة نظرك يلي كتبتها بأحد الردود لأنو السؤال كنت ناوي أسئله قبل لشوف إجابتك .. سؤالي هل تعتقد أنو الصراع بين سوريا و الكيان الصهيوني يتعلق أساساً بالجولان أم أن الجولان لا تمثل في المعادلة سوى " قميص عثمان " و أن الصراع مع الكيان الصهيوني بالأساس هو صراع وجود .. بمعنى هل تعتقد أنو الكيان الصهيوني من الممكن أن يقبل بقيام دولة " ديمقراطية " منتعشة إقتصادياً قرارها السياسي مستقل .. تولي إهتمام بالغ بالعلم و الأبحاث و التكنلوجيا و التطور على حدود الشمالية ؟
3_ بيحزنك غياب عضو عندك بأخوية أو إنقطاعه من الناس يلي بتعتبرها أعمدة أخوية .. كريم مفتقده ! يمكن قبل لتجاوب في شغلة مهمة المفروض نتفق عليها .. بتؤمن بشي إسمه أعمدة أخوية ولا نظرتك للجميع متساوية و الكل هون بيمثل عمود بهدا الصرح في الشي يلي بيبدع فيه ؟
4_ شو أكتر كتاب قرأته أثر فيك .. آخر كتاب قرأته .. كتاب شدك عنوانه أو إسم الكاتب و لقيته ليس بالمستوى اللي كنت متخيله .. في كاتب معين بتحب تقرأ إله أو بتابعه .. مصادر ثقافة حسام على شو مرتكزة بالأساس ؟
بتمنى ما تكون أسئلتي تقيلة عليك
تحياتي و إحترامي لك أخ حسام و أمنياتي إلك بدوام التقدم و النجاح ..
إن تراب العالم لا يغمض عيني جمجمة تبحث عن وطن!
19 / 6 / 2007
|