[E L W A R]

كاتب النص الأصلي : alwaleed

في الحقيقة المقال جيد

أنا متأكد انو قصدك ( من وجهة نظري الموضوع جيد ) أو ( في الحقيقة أنا اعتقد ان الموضوع جيد)
لانو في كتير بيختلفوا معك
يعني بأي لغة كانت وبأي لهجة المقال لازم يكون مفهوم للي يقرأو لحتى يقدر يستوعب أفكارو ويرد عليه

كاتب النص الأصلي : alwaleed

يسلط الضوء على امور هامة جدا

أي امور يا أخي؟؟
شو الأمور اللي كانت مختفية عن عيون الناس وجاء الأخ سلط الضوء عليها بمقالو؟؟
الأمرين الوحيدين اللي اكتشفناهون من مقال الأخ انو في ألفاظ لسى ما سمعنا فيها باللغة العربية والامر التاني انو الصحابة كانو اغناء النبي صلى الله عليه وسلم

كاتب النص الأصلي : alwaleed

لا يعلم انه يناقش اناس لا يعرفون دينهم حتى

ههههههه بظن هالشي ما بتقدرو حضرتك ( مع احترامي الك )

كاتب النص الأصلي : alwaleed

مجرد ان تطرح مسألة دينية للنقاش ينفونها عن دينهم ويقولون ان الدين منها براء والمشكلة بمن يطبق الدين

يا عيوني مو نحنا اللي نفيناه اللي نفاه الدين نفسو
يعني الأديان السماوية بشكل عام بتدين العنف بكل أشكاله
ومن جهة أفعال التكفيريين فاذا رجعت للدين الاسلامي و عرفت شو قول تحريم القتل رح تشوف انو المحرم بالاسلام ( قتل النفس التي حرم الله الا بالحق ) وهون قال النفس وما قال النفس المسلمة أو النفس المؤمنة وهاد الكلام يعني انو الدين حرم القتل بدون وجه حق مهما كانت الظروف
أما من جهة المسيحية فكلنا بنتزكر الحروب الصليبية على بلاد الشام والحجاز وبنعرف من كتب التاريخ انو كانو عاملين المسجد الأقصى اسطبل لخيولهم وكان بعض قادتهم يهاجمون الحجاج ويقتلونهم ويسلبونهم أموالهم
طبعا هاد ما بيعني انو الدين المسيحي بيشجع على القتل وكلنا بنعرف نظرة المسيح للعنف لما يقول ( بما معناه لاني قليل العلم بالدين المسيحي ) انو اذا ضربك أحدهم على خدك الأيسر فاعطه خدك الأيمن وهاد بيؤكد انو الخطأ باللي عم يطبقوا
وبنجي على اليهودية وكلنا بنعرف الجرائم اللي بيقوم فيها المحتل الصهيوني بحق اخواننا الفلسطينيين بس هاد ما بيعطينا الحق انو نقول ان اليهودية دين العنف لانو الدين اليهودي بيحرم القتل وبيحرم القذف لك وبيحرم الغيبة
وبعد كل هالكلام والحقائق اللي ما بظن انو في حدا بيقدر ينكرها بنستنتج انو الخطأ باللي عم يطبق الدين مو بالدين نفسو

كاتب النص الأصلي : alwaleed

الزملاء ابتعدوا عن نقاش الفكرة الاساسية وانخرطوا بكتابة المجاملات لبعضهم هذه عادتهم
لا باس ربما هذه احدى تجليات ازمة العقل العربي

مجاملة ؟؟؟ كل اللي صار انو في ناس أعطت رأيها وفي ناس شاركتها الرأي
وبالنسبة لحضرتك انت عم تدافع مجموعة أسطر وعم تسميها مقال وتوصفو بالجيد رغم انو طالب الصف السادس ما بيوقع بالأخطاء اللي وقع فيها كاتب المقال ( طبعا أنا ما قصدي اجرح الأخ مارس بس هاد اللي صار وكل شي معرض للنقد )
هذه عادتهم ؟؟؟
ههههههه ومين نحنا يا ترى ؟؟ المسلمين ؟ ولا المسيح ولا الدينيين ولا الملحدين؟؟

كاتب النص الأصلي : alwaleed

لا اضحكني هذا الذي لم يجد ما ينتقده بالمقال وبدأ يركز على الاخطاء الاملائية

من ناحية ( هذا ) فبظن انو الي اسم فيا ( أنت) بتمنى تذكر اسمي (طبعا تمني لا طلب )
ومن ناحية اني ما لقيت شي انتقدو فاسمحلي أقلك انو حضرتك غلطان لانو كل المقال على بعضو فريسة مقطعة ومطبوخة وسهلة المضغ بالنسبة لأصغر النقاد فما بالك فيني أنا اللي بعتبر نفسي من كبار( أشباه المثقفين )بالبلد ولا فخر طبعا
ومن ناحية تركيزي على الاخطاء الاملائية فلأنها عزبتني وحبيت أحتج عليها مو اكتر من ناحية وأنبه الكاتب عليها من ناحية اخرى

كاتب النص الأصلي : alwaleed

عزيزي تركيزك على الاخطاء الاملائية التي يمكن ان نبررها بالسرعة بالكتابة
يسيء لك لانه يثبت انك لم تفهم المقال ولم تجد ما تنتقده

أخي الكريم أنا ما ركزت عليها انا طالعت بعض منها بس مشان أنبهه من جهة و انو يحاول يعدل بالمقال لحتى نفهم معناها ولما بدنا نبرر الأخطاء بسرعة الكتابة بشو بدنا نبرر عدم مراجعة اللي كتبو؟؟
أما من جهة فهم المقال فكل اللي فهمتو انو الاخ كان يدور بدائرة مفرغة وعم يصرخ الفكر الديني بليه كيف وليش وشو هو دليله على هالشي ما بعرف ولا حدا استشف شي سوى فكرتين أو ثلاثة وأنا رح ناقشو فيهون بعد ما اخلص الرد اللي بايدي

كاتب النص الأصلي : alwaleed

هل يقبل المسلمين ان يقوم الغرب بسبي نسائهم ؟؟؟؟

ليش بالغرب ما في مسلمين؟؟؟
وليش الغرب على وجه التحديد في يهود جنبنا
أما من ناحية مسلمين فيا أخي بتمنى توجه كلامك للمتدينين العرب اللي هم مقصودين بشكل عام بهالكلمات اللي كتبها الاخ مارس واللي سميتها مقال طبعا بحب زكرك بالعنوان ( البلاهة في الفكر العربي الديني المعاصر )
ومن ناحية نقبل أو ما نقبل فأنا بحب قلك انو اذا قرات بالدين الاسلامي رح تشوف باكتر من موضع خليفة أو حاكم أو أمير بيوصي قائد جندو لما يروح يحارب او يغزي انو لا تهدم صومعة ولا تقتل راهبا او شيخا أو امرأة أو طفلا ولا تحرق نخلا والزنا محرم قطعا فما بالك بالخطف؟؟؟

كاتب النص الأصلي : alwaleed

هل يقبل المسلمون ان يفرض عليهم المسيحيين الجزية ؟؟؟؟

ههههه يا عيوني الجزية يعني زكاة غير المسلم ولما انت بدك تعمل مساواة فلازم يتساوى المواطنين بالحقوق والواجبات وكلنا بنعرف انو الدولة في الها ضرائب لازم يدفعها كل مواطن بغض النظر اذا كانت هالدولة دينية أو علمانية ولما المسيحي ما في عليه واجب الزكاة (لما يكون عايش بدولة دينية) ففي عليه ضريبة تانية تتسمى الجزية واللي ما بيدفعها المسلم واللي بتضمنلو حقو مساوي لحق المسلم بالزكاة
وهاد من أوجه المساواة وأنا بظن انو الاخوة المسيحيين ما بيشوفو انو الامر فيه اجحاف بحق حدا

كاتب النص الأصلي : alwaleed

هل يحق للمسلم ان يتزوج مسيحية ؟؟؟؟؟؟؟؟
الجواب نعم
اذا لماذا لا يحق للمسيحي ان يتزوج مسلمة ؟؟؟؟؟؟؟؟؟؟؟؟

ليكون قصدك انو لايحق للمسلمة أن تتزوج مسيحي
لا يحق لانو متل ما حكت وحدة من الأخوات برد سابق المسلمة لازم تسمع كلام زوجها ولازم تطبقو وفي حال كان زوجها غير مسلم ( مو بس المسيحي كل الغير مسلمين ) ممكن يأمرها بشي ينافي الاسلام من ناحية ومن ناحية تانية الاطفال لما بيجو رح يتبعو دين الأب و هاد اللي عم يحاول الاسلام يبتعد عنو وبظن انو هاد حقو متل حق أي دين انو يبشر بتعاليمو والعكس بالعكس
وتحياتي اعزائي وليد و مارس
بس بتمنى انو تكونو موضوعين شوي بالمواضيع المقبلة
تحياتي
الوار