[samsoum]

كاتب النص الأصلي : ليندا

بصراحة انا مستغرب من حالي، اني متفائل بقيام الحرب، يمكن لأني متفائل بإنو رح تجي علينا ايام نعيش فيها بكرامة بعد هالحرب، مع انها مارح تمر بدون خسائر، بس مافي شي بيتحقق بدون ثمن، وحاجتنا ذل
يسلمو معلم

اسمحلي سمير عارضك بهالتفاؤل
اول شي احتمال نشوب حرب بعيد جدا حالياً نظرا لانو اسرائيل ماعندا امكانيه لتفتح باب جديد ع حالا بيكفيها يلي عندا حاليا ً
انا وانت وناس كتير مستقرين برات سوريا وازا صارت الحرب بنكون نحنا بعاد عن الوضع جداً ...ويلي ايدو بالنار مو متل يلي ايدو بالمي ويلي برات البلد مو متل يلي عايش جواتها ..ولو صار حرب مع انو هالشي مستبعد هالفترة مارح تكون نتائجها ايجابيه ومارح ياكلها الا هالشعب المسكين ..
هي سياسة ....سياسة دوله لا انا ولا انت ولا حدا بيقدر يوجهّا او حتى يعطي كلمة فيها ..سوريا دوله قويه بالنظر لوضع الدول العربيه معها واكيد رح تحسبها مية مرة قبل لا تعطي رد ع اسرائيل .[/quote]
اهلين ليندا
أكيد مجنون كل واحد بيتفائل بالحرب،و انا قلت بالبداية اني مستغرب من حالي لأني حاسس اني متفائل، ولما قلت هالشي ماقصدت اني متفائل بالدمار او الخراب او القتل، وانما متفائل بإنو لابد بالاخر انو نستعيد هالكرامة بقى، وانتي شايفة انو كل مالهن عم يحاصرونا اكتر وعم يحاولو يذلونا اكتر واكتر،
الشي اللي بيقهرني انو الشعب السوري من اكتر الشعوب العربية ذكاء وحيوية ،وسوريا بهالطاقات اللي فيها لازم تكون من أفضل الدول بالمنطقة من جميع النواحي، بس هالحصار المفروض عالشعب واللي مقصود من خلاله نشر التخلف والجهل والفقر،لحتى ما يتطور ويتحول لعبد للغرب واعوانه،(متل معظم الدول العربية) هالشي هو اللي ماعم يخلي البلد تتقدم
هللأ بيجي حدا بيقللي الحكومة هي السبب.. صدقوني لو الوضع بهالبلد طبيعي مافي اي حكومة بتقدر توقف ضد ارادة الشعب فيه،والمسألة بتكون مسألة وقت بس.
بعدين صحيح انا عايش برات البلد، بس لاتنسي انو اهلي واصدقائي وذكرياتي وكل شي حلو بيخصني موجود فيها، والشي الطبيعي اني دافع عنها وعنهن، واذا احتاج الامر وماقدرت روح عالشام، في ألف طريقة بيقدر الواحد يخدم فيها بلده حتى وهو خارجها، واحيانا بيكون تأثيره أكبر بكتير مما لو كان عايش داخلها، وهالشي لمسته هون بنفسي.
و100 اهلين