اولا اشكر كاتب الموضوع لأنه فتح المجال انه يشرح عن فلسطينيو48 وبالفعل كل ما ذكرتوه هو مزبوط واعجبني انه الفكرة المأخوذة فكرة واقعية ومش كاذبة كيف ما بياخذوا فكرة عنا احنا فلسطينين 48
صراحة انا كنت ابحث بمحرك البحث غوغل عن فلسطينيو 48 كفضول الي اني اعرف شو الفكرة المأخوذة او شو مكتوب عن فلسين 48 بمواقع ومنتديات مختلفة بالدول العربية !!
وتوصلت لهدا الموضوع ,, وسجلت بالمنتدى عشان اكتب رد هون
اولا , ,انا واعوذ ابلله من كلمة انا اعيش في اراضس فلسطين 48 , من مدينة الناصرة
حبيت من خلال ردي اني اعقب عن عدة امور موجودة بحياتنا مع اليهود
اولا
تعريف هويتنا
طبعا هناك صعوبة كبيرة بتعريف الهوية ولا زال التشتت موجود بعقول شباب اليوم ولكن بفضل الله هناك تحسن كبير ووعي بيزيد يوم عن يوم
اي انه بتحكيلي وحدة بتقربلي وهي كبيرة بالعمر ( زمان يوم النكبة ( الاستقلال عند اليهود) كنا نحتفل ونغني ونرقص ونوكل كعك ,, اما اليوم ففي وعي كبير بالمدارس وهدا الاشي كتير منيح
يعني يوم النكبة او بهيدي الفترة بكون مهرجانات ومظاهرات لإحياء ذكرى النكبة وعروض فنية ومعارض وهدا اشي كتييير منيح وتوعية للشباب من الناحية الوطنية
عن نفسي بتعرف الهوية اعرف نفسي بـِ : مسلمة عربية فلسطينية اعيش في دولة اسرائيل
يمكن تستغربوا اني بقول دولة اسرائيل ! او اني بعترف بدولة اسرائيل
ليش ما اعترف ؟؟ هاي الدولة الي انا عايشة فيها اسمها اسرائيل ولكن الارض الي انا ولدت فيها ورح اموت فيها بإذن الله هي ارض فلسطين !!!!
بالنسبة لتحدثنا باللغة العبرية
في فلسطينية عايشين بالصفة وغزة بيعتبروا هالشي غلط ,
وانا بشوف انه بالمرة مش غلط
اولا كيف تفضل صاحب الموضوع وقال انه احنا مجبورين نتعلم هيدي اللغة بسبب انه تعليمنا فيها وبمنهاجنا الدراسي بنتعلمها
ولكن في سبب تاني
وهو انه في حديث للرسول ص بيقول بما معناه انه الانسان لازم يتعلم لغة عدوّه
وحابة اذكر الكوا عدة مواقف صارت معي او مواقف صارت مع غيري
اول اشي ,, معروف انه عند اليهود الاسرائيليين النشيد الوطني الي اسمه " هتكفا " وهني بيغنوه باحتفالاتهن الرسمية
بيقفوا بينشدوا ومدته دقيقة وشوي ,,
في عنا بالمدارس العربية بما يسمى ب " مجلس طلاب " يتم انتخابه بشكل قانوني وديموقراطي بالمدرسة
ولحسن حظي انه هديك السنة كنت رئيسة مجلس الطلاب بمدرستي ,, وكنت مرات اروح على اجتماعات ولقائات قطرية مع كل رؤساء مجالس الطلاب بالمدارس الموجودة عنا .
المهم
مرة كان في لقاء قطري مع كل القياديين رؤساء مجالس الطلاب بدولة اسرائيل ,, يهود وعرب طبعا
لما بدأ المؤتمر طبعا اليهود بدهم ينشدوا النشيد الوطني تبعهن " هتكفا "
كل القاعة وقفت من محلها منشان ينشدوووه ولكن الجدير بذكره انه الطلاب العرب الي كانوا مشاركين وانا كنت معهم ما وقفنا اي انه تخيلوا الموقف !!
القاعة فيها 500 شخص الاغلبية يهود وعدد العرب حوالي 80 او اكتر شوي
400 يهود واقفين احتراما لدولة اسرائيل ولنشيدهم الوطني والعرب قاعدين وقتها اليهود تفرجوا علينا نظرات استعجاب واندهاش وكان خلال المؤتمر ورشات عمل
بكل ورشة 20 شخص يهودي و 3 عرب
ومن ضمن الورشات سألني شخص يهودي :
ليش لما نشدنا النشيد الوطني " هتكفا " ما وقفتوا انتو العرب من مكانكوا ؟؟؟
فكانت اجابتي : " كل فئة من الناس وطنية !! عندها نشيد وطني خاص واحنا كعرب بدولة اسرائيل نشيدكوا ما بيعنيلنا اشي وما بخصنا , ليش حتى نقف ؟؟ "
انا لو فيي كان جادلته اكتر ولكن لغتي العبرية على قدي بقدر افهم شو بيحكوا ولكن اني احكي كتير صعب !!
بعرف اني طولت عليكوا
بس عنجد في اشيا كتيرة ما بتعرفوها
انتوا لسا بتعرفوا رؤوس اقلام
كمان متلا خلال المؤتمر الي كان كان هناك صحفي يهودي
وكنت الوحيدة المحجبة بالقاعة اجا عندي ومسك الكميرا وصار يصور فيي بما معناه انه المظهر غريب جدا عليه !!!!!
مستغرب من اللبس !!!
وقتها طبعا انا احتجيت وما سمحتله يصورني لأني مش عارفة شو هدفه ووين بده يحط الصور
كمان بحب اذكر
انه العنصرية والتفكير الخاطئ موجود بين فلسطينيو 48 نفسهن !!
يعني اهل المتلت متلا مع احترامي الهن
نظرتهن لبنات الشمال وبالذات بنات حيفا والناصرة مختلفة !!
بيدعوا انه هدول البنات غير ملتزمات بالدين وبيقلدوا اليهود بشكل اعمى
انا معهن وهالشي موجود
بس هني عم يظلموا اقلية
يعني بكل مكان وبكل دولة عربية بنلاقي المنيح والي مش منيح حتى بأحدى المرات فتاة من المتلت قالتلي : اول مرة بحياتي بشوف متحجبة من الناصرة !!!!!!!!!
يااااااااا الله !!!!!!!!!!!
ودائما بحاول اناقشهم بطريقة جيدة عشان يغيروا فكرتهم شوي !!!
بالنسبة لبعض المواضيع الي بنتعلمها بالمدرسة في موضوع اسمه : مدنيات بتتعلموه اكيد
احنا بنتعلم فيه عن دولة اسرائيل وعن حقوقنا وواجباتنا ,,
المهم
مرة بإحدى الحصة سألنا الاستاز :
لو خيروكوا تعيشوا بدولة اسرائيل او بدولة عربية شو بتختاروا ؟؟؟
الاغلب كانت اجابتهم انه يبقوا في دولة اسرائيل وقدصهم مش من ناحية وطنية انه بدهم يبقوا في ارضهم الي ولدوا فيها انما من ناحية ظروف وماديات العيشة احسن بدولة اسرائيل
ولكن البعض كانت اجابتهم مختلفة وانا منهم
كانت الاجابة انه بنفضل نعيش بفلسطين اي انه بحكومة فلسطينية
يعني نحنا هون لا حاسين انه هاي ارضنا ولا هدا وطننا
حاسين حالنا بغربة وكأنه الارض مو النا !!
واخيرا بقول بس الله يصبرنا ويصبر اخوانا الفلسطينية
|