أخوية - عرض مشاركة واحدة

**TheLight** · 20/01/2008

اقتباس:

كاتب النص الأصلي : butterfly

فقرة جديدة اخترعناها خصيصا ً لحسان .. ( انو يعني ماي بارتنر .. أقل منها .. ؟ )
اسما الفقرة " قبل و بعد " كتير سهلة ... بدي اقتبسلك رد قديم من مقلايتك بال 2006 ورد جديد او رح اسأل عن نفس النقطة بال 2008 ... محاولة لنشوف شو اللي تغير بحسان بهالفترة ..

بال 2006
اقتباس:
شو صفات البنت اللي بتحب ترتبط فيها ؟
اقتباس:
مواصفاتها انو تكون طموحة و مثقفة و تقدر تتحملني وطبعا بتمنى تكون حلوة كمان

بال 2008
اقتباس:
شو هيي صفات امراة احلامك
اقتباس:
تقدر تتحملني...تدعمني وتقويني...وما تتخلى عن المشوار بنص الطريق...
وتقدر يللي رح اعطيها ياه....
علمها وجمالها مش مهمين...هدول الها مش الي....
1)
هلق السؤال ؟ كونو ما عاد كتير مهم انها تكون حلوة .. هو مجرد نضج لفكرة الأنثى بحياتك ؟ ولاااااا بعدو مهم بس صارت اجوبتك اكثر دبلوماسية ... ؟

الجواب ألو شطرين....
أولا...البنت الحلوة بتستخدم جمالها ولو بشكل خفي كورقة ضغط ع الشريك....يعني ع دقة الكوز بالجرة بتقول بينها وبين حالها...أنا حلوة وميت شب بيتمناني....
أي بس انو يعني طزعدم الموأخدة...واذا كنتي حلوة؟؟؟
بتركبي علينا....خيتو لقلك البنات الحلويين معبايين الدنيي واذا انتي ما بدك...فالله معك....وانا كمان مو ناقصني شي
(طبعا حوار مسخرة بيجوز بس الفكرة بعتقد واضحة)

ثانيا...أنا حبيت وما كان للجمال أي دور بمشاعري او عواطفي...وتبين انو الحب متل التور أعمى وما بيشوف والقرد بعين أمو غزال....المهم انو ما تكون البنت مقبولة...يعني اذا الواحد اطلع فيها ما يتضايق...

2) تاني سؤال ؟ بالمرتين كان كتير مهم انها تتحملك ؟ تتحمل شو بالضبط ؟؟
مو المهم نكتب شعر غزل وتخويت...ولا المهم نضل ماسكين ايدينا بايدين بعض كل السهرة ونسبل بعيون بعض متل الهبلان....
المهم يوم بنكون بحاجة بعض ندعم بعض...يوم بحتاجها بلاقيها جنبي ويوم بتحتاج حدا, كون أنا هالشخص...
المهم تتحملني وقت بكون غير متوازن...وين بكون متعب...ووقت بكون غير مستقر....بلحظات الضعف قبل لحظات القوة....
بحبها وبتحبني صح...بس المشاعر ما بتكفي....الدعم والتعاضد والتساند هو الاساس بكل شي...

بال 2006
اقتباس:
عندي رغبة بالتمثيل خصوصا بعد ما طلعت موهوب ومالي خبر
3) اليوم وين صارت هي الرغبة ... ؟
الرغبة موجودة بعدها بس ما عاد في أي من العوامل المساعدة...مافي مشروع مطروح...ومافي وقت...
4) لأي درجة فيك تلتزم بسيناريو مكتوب مسبقا ً ( بحياتك ) ؟
حسب مين كاتب السيناريو....
اذا الكاتب أنا....فملتزم بقدر المستطاع وبحاهد أني التزم فيه وبجبر حالي ألتزم فيه وقت ببلش اطلع عنه...
أما اذا الكاتب فرد أخر/مجموعة أفراد/مجتمع...فبلتزم فيه ضمن حدود قناعاتي وأفكاري الشخصية...عاد عن ذلك ما عندي رادع أني أخرج عنه لما بيكون الخروج عنه بيمثل رغبتي وقناعاتي وارادتي..

كمان بال 2006
اقتباس:

حسان غريب بوطنه وببراته
أخوية بيتي التاني
المكتبة همي الحالي
الحزن ممتع

بدي عقب عالأربع نقط هدول

5. بعدك بتحس بالغربة ؟ انت اللي غريب ؟؟ ولا الآخر ما عم يقدر يفهمك ؟

طبعا بعدني بحس بالغربة...شعور الغربة شعور مستمر...الفارق يللي بيولد مع الوقت هو قدرنا ع تقبل الغربة...

مع الوقت صارت الغربة بالنسبة الي شي عادي جدا...صار تحدي ممتع...وعم كون منتصر فيه دوما...

أنا مش غريب بمعنى مختلف...ولا بمعنى ضد...أنا غريب كوني من أقلية...سواء بسوريا او برات سوريا...مع الوقت بيكتشف الانسان انو هالشي مفروض عليه...شخصي ماني من الاشخاص بيميلو للتقوقع والاختباء بحضن أقليتي لأحمي حالي...أنا بواجه...لاقنع...ولافرض نفسي كمختلف ولكن متميز...

الأخر قارد انو يفهمني اذا راد لأني قادر أني عبر عن نفسي بطريقة كتير سهلة وسلسة وقادر أقنعه فيي بسهولة...بس لما يرفض...بضطرر استعمل أساليب تانية....

6. اخوية اليوم شو ؟
بعدها أخوية نفسها نفسها...هي ما تغيرت بس أمور تانية تغيرت...فرضت علي أتعامل معها بطريقة مختلفة
7. وينك بالمكتبة

المكتبة كتير تطورت ما عاد عندي القدرة أني أغنيها أكتر....
ضمن الامكانيات عم حاول ساعد....يعني حملتلك من فترة ع الرابيد شير فوق المية كتاب من المكتبة...وشغلتيني فيهن...وما شفتك منزلة غير خمس لينكات...

8. شو الحزن اليوم بحياتك ؟ وقدي بيحتل مساحة ؟ وهل هو ممتع ؟
الخزن بعدو موجود متل ما كان بس لأسباب يمكن مختلفة...بيحتل مساحة أصغر ولكن شدة ومرارة أكبر....وهل بعده ممتع...لاء...صار مؤلم جدا...

بيبقى ..
9 . شو اكتر شي تغير ... بالنسبة لحسان بالسنتين هدول ؟
عدة شغلات....
صرت بقدر أكره وعبّر عن كرهي أكتر....وصرت سعيد بهالشي...
صرت بتجاهل يللي بيتجاهلني بسهولة بدون الموضوع ما يزعجني...
صرت بقدر أتجاوز عواطفي وبسهولة وهمشها...بطلت كون انسان عاتفي
فقدت الرغبة أني أعطي بنفس الطريقة يللي كنت أعطي فيها...صار مفهوم العطاء عندي مختلف...بأسلوب مختلف وبطريقة مختلفة...
صرت أسمع فيروز....
صرت نام بكير...
صرت دخن أكتر...
10 . شو اكتر شي برأيك تغير بأخوية بالسنتين هدول ( سلبا ً وإيجابا ً ) ؟
أخوية تغيرت سلبيا...وعم تتغير سلبيا بشكل مستمر...
فقدت كريم....
فقدت مجموعة من الاعضاء المتميزين...
فقدت الروح الحلوة يللي كانت فيها...
فقدت التجدد الغني فيها...
وقريبا راح تفقد اكتر....وحتكون خسارة كبيرة...

رح ارجع في اشيا قرقتني من اخر رد لألك وغير منصفة بحق النساء

لازم ارجع استفهم عنن
انا رح حاول التزم بال 30 سؤال اللي مقررة اسألن

روووح شايفلك.....