وأخيرا إسقاط القمر الصناعي!!! 20-21/2/2008
هدا الخبر تابع لموضوع القمر الصناعي التجسسي التايه ويللي كانت أميركا مفكرة تضربو، ويوم الأربعاء 20شباط مساءا الساعة 10.26 بتوقيت أميركا، يعني فجر الخميس 21 شباط الساعة 5.26 بتوقيت دمشق، أميركا ضربت القمر الصناعي التجسسي التايه، واعتقد مسؤولين بالبحرية الأميركية إنهن صابوا القمر الصناعي إصابة مباشرة، وعلى ذمة الجنرال جيمس كارترايت قال إنو عندن ثقة عالية إنهن نجحوا بضرب خزان الوقود تبع القمر الصناعي، وهادا أخطر جزء، وظهر بالسماء غيمة كبيرة اتبين إنها للوقود الخطير الهيدرازين "Hydrazine" يللي انفجر بسبب الضربة، وكمان قال كارترايت إنو نتجت أجزاء صغيرة بعد الضربة وأكبر قطعة شافوها لحد هل كانت ما بتزيد عن حجم كرة القدم. الصاروخ يللي صاب هالقمر أطلق من على متن "USS Lake Erie" من المحيط الهادئ غرب هاواي، وقال الجنرال صاحبنا إنو الصاروخ صاب القمر الصناعي يللي بيبعد حوالي 200كم أو 130ميل فوق هي السفينة بعد شي 24 دقيقة من إطلاق الصاروخ، وكمان قال الجنرال إنو هالمحاولة كانت ضرورية بهالوقت وصعب تتأجل لأن الأحوال الجوية رح تسوء وتخفف احتمالية النجاح، كمان ما قدروا يعملوها قبل هيك بسبب عودة مكوك أتلانتس للأرض، لأن إذا صابو القمر الصناعي بوقت جية أتلانتس، كان ممكن أشلاء القمر الصناعي تضرب بأتلانتس، فمشان هيك استنوا لينزل هالمكوك على الأرض وبلشوا بالعملية فورا. وأضاف كارترايت إنو الأشلاء انحرقت بالغلاف الجوي فوق المحيط الهادي والمحيط الأطلسي، ورح تضل توصل بقايا وتحترق بهالكام يوم كمان.
كمان صرح الجنرال معلمنا إنو هالصاروخ يللي أطلقوه ليضرب القمر الصناعي ما كان عليه رؤوس حربية، وإنو هالعملية كلفت حوالي 60مليون دولار كحد أقصى تبعا لتقديرات وحسابات معينة.
طبعا لو ما صارت هالعملية، كان القمر الصناعي رح يوقع على الأرض لحالو ويحترق الوقود الخطر يللي فيه وتقريبا فيه شي 450 كيلو من الوقود، وكانت هالكارثة غطت مساحة تقريبا شي ملعبين كرة قدم أميركية(رغبي) وكان الوقود سبب مشاكل كتيييييييير خطيرة على الرئتين وأنسجة التنفس غير المشاكل البيئية الخطيرة، لأنو الهيدرازين مشابه للكلوين والأمونيا وبالتالي بسبب نفس المشاكل.
وصرح مسؤول بالبنتاغون إنو تشكل فريق من 200 خبير ومهندس وعامل عندهن الخبرة الكافية لتعديل الصاروخ يللي رح يضرب القمر الصناعي، وكان من ضمن التحديات توجيه الصاروخ، لأن متل ما هوي معروف إنو هيك نوعية من الصواريخ بتلحق أهدافها عن طريق الحرارة، والقمر الصناعي بارد، ولحل هالمشكلة، تم توجيه الصاروخ حاسوبيا وزودوه بآلة قتل حركية "kinetic kill vehicle" مشان تخلي الصاروخ يشوف القمر الصناعي ويعدل مسارو باتجاهو إذا كان في داعي.
من ناحية سياسية منعرف إنو الصين صنعت سلاح مخصص لضرب الأقمار الصناعية، وبالتالي برزت أسئلة وتكهنات إنو أميركا عمتستعرض عضلاتها بهالمجال كمان، بس هالشي أنكروا السيد جيمس جيفري نائب مستشار الأمن القومي الأميريكي، وصرح إنو هالعملية كان الهدف منها حماية البشر من هالكارثة مو أكتر.
والصين قالت على لسان المتحدث باسم وزارة الخارجية الصينية السيد ليو جانتشاو إنو هيي عمبتابع الحدث بكل حرص مشان تلحق عن قرب المشاكل المحتملة نتيجة هالعمل الأميركي يللي بهدد أمن الفضاء والدول المجاورة والمتأثرة. وكمان قال إنهن طلبوا من أميركا إنو تزود المجتمع الدولي وبأسرع وقت بالمعلومات ذات العلاقة مشان الدول المتأثرة تاخد احتياطاتها.
طبعا أميركا حاولت تركز جهودها مشان بقايا القمر الصناعي تسبب أقل ضرر ممكن، وكمان ما يضرب الأقمار الصناعية الموجودة بالفضاء، هالحكي قالتو الدبلوماسية الأميركية والخبيرة بنزع السلاح كريستينا روكا من خلال تقرير للأمم المتحدة عن المؤتمر الخاص بنزع السلاح ويللي انعقد بجنيف-سويسرا.
وورد كمان بالتقرير نفسو إنو أميركا مستعدة لتقديم المساعدة لأي حكومة مشان تخفيف الأضرار الناتجة عن وقوع شظايا القمر الصناعي ضمن أراضيها.
هادا كان الخبر وهي المصادر:
1) http://www.cnn.com/2008/TECH/space/02/21/satellite.shootdown/index.html
2) http://en.wikipedia.org/wiki/USS_Lake_Erie_(CG-70)
عفوا فيروز أقاطعك.. أجراس العودة لن تقرع
خازوق دق بأسفلنا ..
من شرم الشيخ إلى سعسع
من أين العودة والعودة تحتاج المدفع
و المدفع يلزمه كف و الكف يحتاج لإصبع
و الإصبع ملتذ لاهٍ .. في دبر الشعب له مرتع....
|