[yass]

فكرة حلوة, و مطروحة أكتر من مرة... و مبدئيا كتير من المشاهير يقلك أي بعدين ما يلتزم بالحضور أو يمطمط أو الى ما هنالك (يعني مو شوفة حال, انما يمكن صعب يلاقي وقت مشان هالقصص)..

بالزمانات عملت مقابلة صغيرة مع محمود درويش لما تكرّم هون عنا, بشهر نيسان 2006, و نشرناها هون مع كم صورة و مقاطع فيديو... الموضوع لسبب تقني طار, يمكن لما تهكر الموقع السنة الماضية, و الصور و الفيديو عند صديق انتقل الى مدينة أخرى و ما عم اقدر أمسكو مشان يبعتلي ياهون.. بس احصلهون بدي ارجع اعملو للموضوع... بس كان موضوع حلو (مو لأنو شغلي, هاد أقل شي أهمية, ذاتا لو مشتغلو غيري يكون فهمان بالشعر كان أكيد أحلى بكتير) بس انو كان متكامل... أي المشكلة كانت لقطة هالمقابلة, بدون تحضير ولا شي, كنت مدعو عالتكريم و بالكوكتيل اللي بعد المحاضرة متّنت وجهي و رحت حكيت معو.. لو طالب منو موعد ما بيعطيني أكيد (هاي وحدة من الأمور اللي خيبت أملي بمحمود درويش, يجوز بسبب الارهاق أو ما بعرف ليش بس ناشف و عنجهي حسيتو..)


قصدي من هالديباجة الطويلة انو يمكن صعب تلتزم ببرنامج محدد, انما يكون كل واحد عندو خط مع حدا مشهور يكمشو و يعمللو مقابلة... عالتياسير يعني


تحياتي