كانطباع سريع عن الاستفتاء فيني قول انو رضيان عن النتيجة (كتجاوب للناس).. يعني صحيح كنت متوقع فوق الخمسين مشارك.. اجو 48 لكن نسبة جيدة.. مانها ممتازة بس جيدة بالنظر الى احصائيات الأعضاء المواظبين بالمنبرو الصالون (القسمين اللي انحط فيهون الاستفتاء) و ليس كعدد كلي للأعضاء.. يعني من هالناحية اعتقد نجحنا, ما جبنا ممتاز بس جبنا جيد..
أعتقد انو حتى لو مشاركين 10 أو 15 عضو زيادة كان ما كتير تغيرت النتيجة (كنسب مئوية) لأنو العينة اعتقد حققت غرضها من حيث انو كانت تمثيلية (representative) بشكل معقول.
شغلات لفتت نظري بالنتيجة (اللي اعتبرها بشكل عام منطقية و معقولة جدا) في الشغلات التالية:
اقتباس:
* ما هو مفهوم الفقر بالنسبة لك:
- الفقر هو ضعف الحالة الاقتصادية بشكل يؤثر على مقدرة الفرد على الحياة الاجتماعية الكريمة ( حياة اجتماعية كريمة بمعنى ساعات عمل محددة, دخل كاف لتلبية الاحتياجات الأساسية و الثانوية البسيطة). 12 شخص (25%)
- الفقر هو ضعف الحالة الاقتصادية بشكل حاد مما قد يؤثر على مقدر الفرد على توفير الاحتياجات. الأساسية و يجبر الفرد على البحث عن مصادر دخل اضافية لتوفير هذه الاحتياجات الأساسية فقط بشكل يؤثر على حياته الاجتماعية من حيث تضاعف عدد ساعات العمل. 35 شخص (72,92%)
- لا أعرف/ لا أجاوب. 1 شخص (2,08%)
|
التعريف الأول هو تعريف المفوضية الأوربية للشؤون الاجتماعية سنة 1999 للفقر. و التعريف الثاني هو التعريف اللي صغتو أنا بما اعتقد انو مفهوم الفقر بمجتمعنا السوري..
من الـ 12 شخص اللي اختارو الخيار الأول على الأقل 8 ساكنين برا سوريا.. قصدي من هالحكي, و من هالسؤال بالذات التأكيد على اختلاف مفهوم الفقر بين المجتمعات.. ما هو فقر في أوربا ليس فقرا في سوريا... في اختلاف درجات اعتبار كتير واضح (72% مقابل 25%)
كمان لفت انتباهي منطقية الترابط بين السؤالين هدول, أو بالاحرى الخيار اللي علّمتو بالخمري مع سؤال تاني
اقتباس:
* أهم أثر للفقر في رأيك:
- ضعف فاعلية الفرد في المجتمع. 8 شخص (16,67%)
- الاحباط و تدني مستوى الطموح. 12 شخص (25%)
- الهجرة. 20 شخص 18 شخص (37,5%)
- الفساد الأخلاقي و انهيار القيم و انتشار الجريمة. 6 شخص (12,5%)
- لا أعرف/ لا أجاوب. 4 شخص (8,33%)
|
مع السؤال هاد:
اقتباس:
* العلاقة بين الفقر و الصحة النفسية العامة في المجتمع ( انتشار حالات الاكتئاب و انفصام الشخصية و سائر الأمراض النفسية, ارتفاع معدلات الانتحار...الخ):
- علاقة وثيقة و مهمة. 20 شخص (41,67%)
- يوجد علاقة إلى حد ما لكن ليس سببا أساسيا. 19 شخص (39,58%)
- علاقة ضعيفة أو لا يوجد علاقة. 9 شخص (18,75%)
- لا أعرف/ لا أجاوب. 0 شخص (00%)
|
لفت انتباهي لأنو فاجأني... في شي جيد من حيث اعطاء أهمية بنسبة معقولة للعامل النفسي... اللي بمجتمعنا ما كتير معطالو اهمية على ما أعتقد, ما زلنا من هالناحية شوي متخلفين لأنو أحيانا نعتبر التفسيرات النفسية و الاعراض النفسية دليل ضعف أو صف حكي أو علاك ... لكن نتيجة هالسؤال عم تثبت انو في ازدياد وعي بالنسبة لهالنقطة.
اقتباس:
* من هي المؤسسات أو الجهات الأقدر على الأهتمام بمشكلة الفقر من حيث دراسته و تحديد أسبابة و آثاره و وضع الخطط للتصرف:
- المؤسسات و الجمعيات الأهلية الخيرية. 6 شخص (12,5%)
- وزارة الشؤون الاجتماعية و العمل. 9 شخص (18,75%)
- المنظمات الدولية الحكومية و غير الحكومية 4 شخص (8,33%)
- هيئة حكومية جديدة لتنسيق و مساندة جميع الجهات العاملة. 24 شخص (50%)
- لا أعرف/ لا أجاوب. 5 شخص (10,42%)
|
بالنسبة لهالسؤال حابب بس استعملو كمثال على أهمية الديموسكوبيا بالمجتمع المدني.. لو هالاستفتاء عاملتو شركة متخصصة و باعت النتائج لحزب ما قبل انتخابات تشريعية... فقراءة هالاستفتاء راح تعطي فكرة للطرح بالبرنامج لهالحزب, و على الأغلب يدرجو بالبرنامج الانتخابي انشاء هيئة حكومية جديدة للفقر لأنو في 50 % من عينة ناخبين بدهون هيئة جديدة..
أجدد شكري لجميع من شارك
تحياتي
