هلق منمسي على الموجودين
بعد ما تربيت من القصص والحكاوي ألي مرت معي
وقلت خلص
وما عدت أمن لأي وحدة أبدا
إلا ما أتأكد 100% أنه بتحبني لشخصي مو لأي مصلحة
وراحة أيام وأجت أيام
الساعة السابعة صباحا
وأنا عبسمع بالبيت على فيروز
وعبشرب القهوة بسمع صوت أمي
قوم يا مالك فز وروح على الفرن وجبلنا خبز ما بقيان عنا
لا إله إلا الله محمد رسول الله
يعني مابصير الواحد يعقدلو شوي يشرب قهوة برواق
أمري لله
يلا مالك
حاضر حاضر
وهي رحنا على الفرن
أففففففففففففففف شو زحمة
رحيت صفيت على الدور
شو بدي أعمل
لك لك على هالشوفة
يا حرام
معقول
يا جماعة بنت متل الوردة
بس مبين عليها متبهدلة
تيابها شوي موسخين مقطعين
شو حدا ضاربها يعني ؟
وهالشباب عبتتحركش فيها
كلهم أستغلاليين بدهم يستغلوها
لا حول ولا قوة إلا بالله العلى العظيم
ورحتلكم على هالبنت وقلت بدي أوقف موقف أنساني وماله علاقة بأي قصص تانية
وقلتلهم بعدو هيك
بعدوا هيك يا شباب عيب عليكم
شو ما عندكم خوات ؟!!!
وحكيت مع البنت وقلتلها
لك شو شو زاعجك وشو عمتعلي هون بهالوقت من عبكرة الصبح يا أختي ؟؟
ردت بصوت مبحوح وقالتلي : جوعانة
شو عمتحكي أنت ؟
طيب أنت من وين ؟
طيب وين بيتكم ؟
قالتلي : جوعانة
قلتلها : طيب لعيونك ولا يهمك
أخدتها ورحنا على مطعم فول
لأنه ما كان حدا فاتح غير مطاعم الفول
وطلبنا أكل
ونزلت المستورة سبيحة بصحن الفول أشو حرة أشو فراشة أشو غطس ....
وأنا عبتفرج عليها كيف عبتاكل
تقول مو شايفة أكل من 10 سنين !!!
المهم
بعد ما شبعت خلصت وشربت كازوز
قلتلها وين بدك تروحي
قال : ما بعرف
شو ما بتعرفي وين بيتكم
ما بعرف
طيب وين بيتكم
قالت : ما عنا بيت
طيب وين أهلك
قالتلي : ما عندي أهل
معقول !!!!!
قلتلا طيب وين ساكنة وين قاعدة
قالتلي : بالشارع ألي يومين عبمشي بالشارع وأنا هربت من تعذيب أبوي
أبوك !!!!!
مو قلتي ما عندك أهل
قالتلي : عندي أب ظالم ظالم ظالم بيضربني كل ساعة وكل دقيقة وبده يشغلني خدامة عند الناس مع أنه مو بحاجة مصاري
بس هي بده يزلني ما بعرف ليش ؟
طيب ليش هربتي منه ؟
بده يجوزني لواحد عمره 70 سنة
غصب عني وأنا ما بدي
طيب قلتلا والعمل هلق وين بدك تروحي ؟
قالتلي : ما بعرف
شغلت الموتور الأحتياطي لدماغي
وقلت معقول مرؤتي تسمحلي أني أترك بنت بالعشرينات من عمرها بالشارع لينهشو فيا الوحوش ؟؟!!
بيسمحلي ضميري ياترى ؟؟!!
وعلى الفور
خطرت ببالي هديك الفكرة
تذكرت أنه في ألنا وحدة جارة بعيد عنا شوي وعايشة لوحدها ببيت كبير فممكن تأجرنا غرفة منه
وفعلا دقيت بالبنت ومع وشي لعند الختيارة
وبعد أخد ورد وحكينالها القصة
وافقت هالختيارة تأجرلنا الغرفة مفروشة
والغرفة ألها باب خارجي مستقل
قلتلها مشكورة
وهون كتير أرتحت والبنت طار عقلها وما صدقت
ونزلت على السوق وأشتريتلها شوية تياب نضيفة وعبيتلا البراد
وبقية معها لليل
وبعدها قلتلا أنا رايح أنام ببيتنا وبتقفلي على حالك ونامي وريحي حالك وبكرا إن شاء الله منشوفك
تصبحي على خير
القصة صعبة شوي يا جماعة
فينا نكمل بكرا لأنه شوي أنا تعبت من تذكري لهالقصة الأليمة
بشوفكم بكرا بأذن الله
(إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالآَخِرَةِ وَاللهُ يَعْلَمُ وَأَنْتُمْ لاَ تَعْلَمُونَ) [النور:19]
|