اقتباس:
كاتب النص الأصلي : GOVERMENT
طائفيتنا طفيفة وماعبتتفشى لانو النظام مسيطر نوعا ما ع الوضع .. بس ازا فرضا وبيوم من الايام راح النظام شو بضمنلك انو الطائفية ماتتفشى ونتنتشر اكتر من لبنان ..
بالعكس نحن عنا التربة الخصبة للطائفية اكتر بكتير من لبنان وممكن يصير عنا اكتر ماعبصير من لبنان وازود
مابعرف ازا نظام الطوارئ بينمع ولا مابيمنع الطائفية متل ماحكيت .. بس بالنسبة للمستقبل ازا قانون الطوارئ انلغى وانشال فالوضع رح يصير عنا بخوف ..
|
يعني ما بعرف ليش عم تقول انو الطائفية تبعيتنا النظام مسيطر عليها.. هو مو مجال نقاشنا لكن مو صحيح هالحكي... لو تنفجر تنفجر بوجود النظام و بعدمو... صارت عنا مشاكل سابقا قبل وجود النظام و رجعت صارت بوجود النظام... يعني أمر مو مرتبط بوجود النظام و عدمو.. بالعكس اعتقد انو في كتير شغلات عملوها بس ليخلو الناس تخاف من بعضها و يربطو وجود الأمان بوجود النظام و انو اذا مافي قبضة أمنية الناس راح تعبّي ببعضها... انو ليش يابي؟
انت حلبي و بحلب مليانة مسيحية و أرمن... بتعتقد في شي يبرر كل الاحاطة الأمنية وقت احتفالات المسيحية؟ طبعا مافي بس وجود الدورية ع راس الشارع وقت الصلاة أو وقت المسير أو شو ما كان بيعطي انطباع أول شي للمسيحية انو خيو نحنا حامينكون و بدون وجودنا راح ياكلوكون الاسلام.. و تاني شي تعطي انطباع للاسلام انو هدول المدللين (أساسا اذا تلاقي شي تمييزي هو انزعاج بعض الفئات انو ليش في مدارس مسيحية خاصة و مافي مدارس اسلامية مثلا)
بالرقة مافي غير روضة تشرين تبعيت الاتحاد النسائي و روضة الكنيسة... رغم انو مافي يمكن ألفين مسيحي بكل البلد.. تلاقي ع روضة الكنيسة بدك ألف واسطة و واسطة لتدخل ابنك.. يعني اذا ابن الرقة المسلم (غالبا سني) عم يسلم المسيحية ترباية ابنو الصغير وين الحقد الطائفي بالموضوع؟ المدرسة الوحيدة الخاصة كمان بالرقة للأرمن (مدرسة الحرية) و تشوف العالم تروح تتوسط عند شي حدا يحكيلهون مع المطران مشان يقبلو ولادهون.. يعني الشبح هاد اللي عم يخوفو الناس فيه مالو معنى و فيه نية جدا عاطلة (ما عم احكي عنك طبعا حسن... عم احكي عن اللي يجتهد لينشر هالتخويف)
لبنان و العراق غير.... لبنان دولة انعملت بالأساس ع أساس طائفي و نظام حياتهون انو الشخص المجرّد لا شيء... انت بدون طائفتك حقك فرنكين و قيمتك من قيمة طائفتك... طبيعي الواحد يكون طائفي بهالحالة لأنو قوتو من قوة طائفتو, و لما بتعمل قانون أحزاب و دستور يمنع هالشي و تحقق ذاتك من خلال نفسك و ما تستحق و ليس اذا انت مسلم او مسيحي او أو أو.. بتخلص من الطائفية.. و العراق نتيجة لمحاولة "لبننة" البلد بهدف استغلالو... الشيعة طوال سنين تخوّنو من قبل صدام حسين لأنو اعتبر انو لأنو شيعة راح يخونوه لحساب ايران... يعني متل هلأ لو واحد بمشاكل سوريا مع السعودية يقلك سنة سوريا صفّو مع السعودية لأنو سنة متلهون و الحكم كيت و كيت من هالحكي تبع الاخوان... بربك شو رأيك بهالحكي؟ صار هيك شي؟