[SABE]

الموضوع كتير حلو و الحوار كتير راقي من بعض الأطراف, و كتير منحط و ما يعتبر حوار من أطراف أخرى غير ..

بعض الأشخاص عندهون أفكار مسبقة الصنع !!! و صنع بلدي حتى .. أنا بدي أطلب من فوضوي و من سيريان إنو يتوقفو عن الحوار مع الأشخاص اللي عميرمو **أحسن كلام بيقدرو يحكوه** و مسباتهون متل زخ المطر .. هدول الناس ما بدها مناقشة و ما خرجها مناقشة, و مع الوقت بيبطل عندهون عقدة الخوف من الشيء الجديد عليهم , و الشيء الجديد أقصد فيه المناقشة العلنية لهكذا أمور ..

ما بدي أنكر إنو بسبب وجودي الحالي في ألمانيا و الشغل اللي أنا هلأ فيه, تغيرت نظرتي كتير للمثلين جنسياً .. بس شغلة إنو وقت كنت بسوريا كمان, كان عندي رفقات غايز .. وأنا بعرف و هني بيعرفو إنو خيي هالمواضيع بيناتنا بلاها .. في أشخاص ما بيتكلمو بصراحة عن الموضوع, بس القصة مبينة بتكون .. و في أشخاص بالعكس .. بتكون متخيل إنو والله هالشب شخصية و ما بعرف شو (( هلأ عمبحكي حكي الشباب )) و إنو بيقدر يزبط أحلى بنت .. و بعد فترة بس تصير صحبة مزبوط معو بيقلك إنو والله انا غاي ..

لأحكيلكون آخر قصة صارت معي, من تلت جمع .. و مانها أول قصة و بعرف إنو مانها آخر قصة ..

بالمكان اللي بشتغل فيه, بيشتغل معنا واحد غاي .. بس هالزلمة ما بينطاق .. ما حدا بيحبو, و بعتقد إنو عندو كتير عقد نفسية, وروح قلبو بالحياة إظهار نفسو و حشر حالو بمواقف و ما بعرف شو كمان .. بقدر إحكي عنو لمدة ساعة .. بس بلا ما نشلي هلأ عالناس
المهم,من فترة كام شهر إجا شب جديد عالشغل .. و هالشب كتير مرتب .. أحاديثو محترمة و طريقة حكيو و لبسو و تصرفو مع الكل ..

أوكي و بلا طول سيرة قال من تلت جمع كنا بحفلة عند عالم رفقاتنا .. وكان الشب المرتب معنا بالحفلة, و متل العادي, المنكر و الموسيقى شغالين .. رقص و ضحك و نكت و ما بعرف شو .. المهم , و من سيرة لسيرة مرقت صبية من إدامنا , عمقلو للشب إنو ليك هالبنت بتجنن (( الله الوكيل كانت شقفة )) بقا وقتها و عقولة الألمان , ماعاد كنا كتير صحيانين , و عقولة السوريين , كنا مطفيين .. بيقلي, اي بس انا ما بحب البنات .. أول لحظة فكرتو عميمزح .. لأنو مستحيل الواحد يتخيل إنو هاد ممكن يكون غاي !!! اي والله و إتفاجأتلكون شو تفاجؤاي !! بعدين وقت صدفتو , لأنو أول شي فكرتو عميمزح , بلشنا نحكي عن الموضوع ..
و كمان مرة تاني من سيرة لسيرة, جبنا سيرة الشب الغاي اللي بيشتغل معنا و ما حدا بيطيقو ... و قلي إنو كمان هو ما بيطيقو و بيجعلو راسو حتى ..

بعدها مرق شب بالحفلة, و قلي مثلاً إنو ليك هاد الشب حلو !!! طلعت فيه هيك و قلتلو بالله !!! ليش عمتقلي .. قام قال وقتها .. انت قبل شوي ليش قلتلي إنو البنت حلوة .. ضحكنا و كفينا السهرة ..

هلأ الشب ما زعجني بأي كلمة, و لا حتى حاول يقرب صوبي ..

الشغلات اللي كنت أول مرة بحكي فيها كانت عن موقف أهلة و كيف ناوي يحكيلهون , و قلي إنو أهلو كونسيرفاتيف بالعربي بتطبع متخلفين أو رجعين , مشان هيك ليخلص جامعتو بيخبرهون .. مشان ما يقطع أبوه المصروف عنو .
و شغلة تاني حكينا فيها كانت المشاعر .. اللي لحد هلأ ما نجاب سيرة الموضوع هون ..

إنو الغايز أوكي غايز .. بس كمان عندهون مشاعر ؟؟؟ ملا أنا غلطان !؟!

أوكي هلأ إذا بدنا نقارن مثيلين الجنس بالعادين بعتقد إنو المثيلين أكتر شاعرية من الناس العادين .. ما بعرف , هيك تصوري .. و الشغلة مانها بس (( فتينا و رق ولعبنا ... تعبير مجازي يناسب الأشخاص دون الثامنة عشر ))

كمان نقطة حابب إحكي فيها, هي الخروج coming out .. سألتو إذا كان تعرض لمضايقات جنسية لما كان طفل أثرت عليه , قلي لا ..
بعدين سألت, طيب تربيت شي بين شي خمس بنات, و تبيتك المنزليه كانت أقرب لبنت منها لشب !! كمان لا ...
طب شلون إكتشفت ؟؟
قال من لما كنت 13 سنة (( مع الملاحظة إنو لم يبلغ عمر البلوغ بالنسبة للشباب )) كان لما يتطلع عالتلفزيون, يعجبوه الشباب مو البنات .. و بالمجلات نفس الشي .. و ما كان يعرف ليش , و بعمر 17 سنة قدر عنجد يخرج متل ما بيقولو .. ووقتها قال أول مرة لرفيق إنو هو مثيل جنسي ..


حبيت شارككون بالقصة اللي صارت معي, لأنو بعرف من حالي, لما كنت بسوريا كنت كتير إنبسط لما أعرف كيف الحياة برا !!! و بتمنا ما كون ديقتلكون خلاقون ...

و شكر لفوضوي على الموضوع الحلو (( إشتقنالك يا زلمي )) و لسيريان غاي على صراحتو .. و كمان شكراً لكل شخص عمبيناقش و يحاور بكل آداب الحوار ..

و بدي إطلب منكون طلب, إستغلو فرصة وجود سيريان هون للتعرف بشكل قريب على المثليين !!! الله الوكيل ما حدا بيعض و بياكل بشر .. و ما حدا رح يعيب عليكون إذا تقبلتو الآخر ...

سلام للجميع