هلأ بما انو الشباب عوفوني سمايي وفعولي خلاقي وكرهوني شي اسمو الاشراف عافس فوق رقبتك فقعدت فكر انو شو لازم ساوي يعني انو انا سنة الجاي لازم كون بسوريا مشان اعمل عملية لعيوني العملية بتكلفني بامريكا 3500 دولار اي 175000 ليرة سورية بينما اذا نزلت على سوريا بتكلفني 30000 ليرة سورية لهيك نازل على سوريا صيفية الجاي واسمو صايرة وصايرة قلنا منشوف المدام
بس في مشكلة هون سالوني شو هيي ها ها سالتوني
هادا يا اخواتي بعد ما اجيت على امريكا بكم نهار بيتصل واحد بامي وبيسال عني بتقلو اي يطعمك الحج والناس راجعة ريتك عندو (كلمة تقال لانو انا ما متمنا يكون عندي الله يبعدو يبعدو يبعدو )
خير شو بدك منو قال والله مطلوب عسكري
مع اني كنت طالب بالجامعة وطالعت مصدقة الدوام عن السنة الماضية اني طالب بس ما رضو ياخدوا مني ليش يا حزركن قال لاني ماني عامل فحص طبي اول اي وين بيعملو قال بدك تروح على حماه والله دقيناها على حماه انا والشباب بدنا نعمل فحص طبي والحلو وين اني انا عم لاحق وراق السفر وعندي فحوصة كمان بالجامعة وكانو فحوصة الجامعة ما بتكفيني اجاني فوقا الفحص الطبي طبعا بحماه مانكن غريبين عن النظام كيف بيصفو العالم واحد واحد وبيفوتون بالدور والعالم هيك ملتزمة وصافة وما في تدفيش وترفيس وتلبيط بنوب المهم اول نهار ما طلعلنا دور وتاني نهار ما طلعلنا دور وضلينا نروح ونجي على حماه هيك لاخر نهار مسموح للفحص رحنا وطلعلنا دور وفتنا عملنا فحص طبي قامو بسبب المشكلة بعيوني عملولي تحويل على المشفى العسكري كنت روح اعمل فحص بالجامعة وارجع على المشفى العسكري ويا عيني تقولو نفس السيستم تبع حماه قولو اول نهار ما طلعلنا دور وتاني نهار ما طلعلنا دور وتالت نهار ما طلعلنا دور انزل قدم فحص وارجع على المشفى العسكري وبعدا روح لاحق وراق السفر
قال ما بيعملولك الفحص الطبي بدون ما يكون الك واسطة قلنالن اوكي دقدقولنا القرايبين للي بيعرفون وصلنا لرئيس اللجنة الطبية بالمشفى العسكري وطلع من ضيعة بتبعد عن ضيعتنا شي ساعتين اخدنا سرفيس ورحنا لعندو على العيادة عرفتو عن حالي وحكينا وقال خلص بكرا بتروح لعندي على المشفى وانا بفوتك وبزبطلك امورك ودفعنا كشفية 500 ليرة وهوي كل شي ساوا حكى هالكلمتين ودفعنا خمسمية ليرة للسرفيس قلنا معلش تفي على الالف ليرة بس يمشي الحال وانا ما بقالي غير تلت تيام لسافر رحنا تاني نهار من صباحية الله كنا تمانة بالمشفى العسكري بحمص وكان موعدي مع الدكتور تمانة ونص هوي بيصحلي صارت تمانة ونص وما صاح تسعة وما صاح صاح الديك وما كان الدكتور يصيح وننلطع لل12 الضهر وما كان الدكتور يصيح سالنا عنو يا شباب الدكتور فلان الفلاني قال اي بسلامتك تغيرت اللجنة الطبية وصار في لجنة جديدة
تصور يعني خلال اقل من اربع وعشرين ساعة تتشكل لجنة جديدة واتخوزق انا واتخورف بالف ليرة
وسافرت وما عملت فحص طبي
ماذا يؤدي بعد كل هاللت والعجن
ما في احالة من المشفى العسكري ما في فحص طبي
ما في فحص طبي ما بيستقبلو شعبة التجنيد مصدقة الدوام
ما في مصدقة دوام ما في تاجيل جيش
ما في تاجيل جيش معناتا في جيش (شي منطقي ومو منطقي بنفس الوقت)
في جيش معناتا اسمي صار بالمطار مشان بس حط رحالي على تراب الوطن الحبيب يعفطونا ويسحبونا على سيارة الجيب اللي واقفة قدام باب القادمون وبوجهن على الثكنة حيث سينكل فيني سيادة المقدم مدري العقيد مدري العميد مدري الفريق (لاء هيك صار كتير مهيك مسحو اخر كلمة ) مدري شو شكل دين ربو لانو تاخرت عن الالتحاق
طيب وبعد كل هالحكي هادا وبعد ما احبطوني الشباب وتراجعت عن عقد العزم عن فكرة الاشراف عافس فوق رقبتك (منرجع للفكرة الرئيسية هلأ )
وبعد الاسئلة والاستفسارات والاتصالات والتحشيشات (هاي اهم الشي لانو بلاها ما صار كل هالشي ) اتضح انو ما رح حط حالي تحت الاشراف انما رح سجل بالغروبات السياحية اللي بتنزل على سوريا وهيك ما حدا بيعفطني بس انزل بالمطار وبصير بمر حد هادا الضابط اللي كان بدو يكون مسؤول عني بالجيش وحندقو (وساوي شغلة تانية عيب تنعمل قدام البنات ) انو انا بسوريا وهوي ما عم يمارس سلطتو عليي
ومنشوف المدام
ومنعمل العملية وتوتة توتة خلصت الحتوتة حلوة والله فتفوتة
تعبت صار بدها سيكارة
حياكون
