[Joe]

كاتب النص الأصلي : المحارب العتيق

كاملة ؟ . مافي ولا أفريقي غني ؟ . كل الناس بأميركا مثلا اغنياء ؟

طبعا لاء بس النسب متفاوتة يعني أنا معك أنو الفقر بأفريقيا أكتر بكتير من غير دول . هلاء منجي صح أنو الجفاف والمؤامرات الدولية أحد الأسباب وصح انهم مو متوكلين وكسالى . بس في طريقتين كمان للحل . أول شغلة رب العالمين أمر بالزكاة يلي هية بتاخد جزء صغير من مال الغني .وبينحط ببيت المال مشان يتوزع على الفقراء . ( وهو بيشبه بطريقة ما قانون الضمان الأجتماعي بالدول المتقدمة ) ؟ طيب أفريقيا لا فيها هاد ولا فيها هاد ؟ شغلة تانية افريقيا فيها أكبر مخزون أحتياطي بالعالم من الثروات الباطنية .وفيها أراضي شاسعة ممكن تنزرع . بيكون رب العالميين مسؤول عن أنهم لايستيطعون أستغلالها ؟ . ما الخليج العربي وضعو مشابه وأمور بألف خير . أخر شي رب العالمين ما أمر من حدا أنو يضل بمكان معين . واذا كان عايش بمكان مابيساعدو فرب العالمين أمرو أنو يدور على الافضل . بس مشكلة الحدود والفيز الأانسان عملها ورب العالمين مالو يد فيها

بحييك علة تساؤلك المنطقي بالوقت يلي كتير من يلي علقو همهم الازدراء مو أكتر

ما يسمعوك الافارقة ليتحسسوا و ينهز بدنهم برياحة. نعم معظم الافارقة اغنياء. شيلك من النخبة الموجودة بكل دولة و يلي بتكون عم تنهب الباقين و تسرق منهم القليل الموجود

الحل الاول تبعك فاشل و فيك تراجع ردي اعلاه. بس معروف انو بيخلق مشاكل اكتر ما بينفع و الامثلة لا تحصى

مثلا.. بكوبا.. الاقتصاد على نوعين.. الاقتصاد المبني على الوظائف المحلية متل الدكتور و شوفير التكسي و الحلاق.. و الوظائف بالفنادق السياحية و يلي اصحاب هدول الوظائف المحظوظين بيحصلوا على مدخول طبيب شهري بظرف يوم واحد من البخاشيش من الاجانب.. هالشي شو بيخلق؟ على المدى القريب بيخلق رخاء اقتصادي لعائلة المُبخشَش عليه.. و على المدى البعيد بيعني انو اصحاب المهن الحقيقية متل الزبال و الطبيب و السمكري رح يتركوا وظائفهم و يشحدوا مصاري من السياح.. شو بالنتيجة بيكون صار؟ كارثة.. الا اذا ناوي تحول كل كوبا لشحادين

بإفريقيا.. المساعدات الغذائية يلي بتجي من اميركا (محل ما الحكومة بتدعم الفلاح الاميركي), للدول الافريقية يلي عندها نتوفة اقتصاد زراعي.. بالمحصلة بتقوم بتدمير هالقطاع الزراعي المتواضع و بتخلي الافريقي رهن للمساعدات الغذائية.. بدل ما المواطن الافريقي يدفع للمزارع الافريقي حق الأكلات.. صار بيجيه الأكل ببلاش. بالنتيجة الفلاح رح يفلس و الاقتصاد الضعيف خلقة رح يتدمر

بقى اسلوب الذكاة و هالقصص ما بينفع إلا على مدى محدود جدا جدا و ضيق.. اتخيل شخص اذا اشتغل بيطالع باليوم 100 ليرة و اذا راح وقف على باب الاعالة الاجتماعية بيطالع 80... بيقلك بلا الشغل و منيحة ال80 قريبة.. تخيل اذا الاعالة الاجتماعية ارتفعت.. (متل ما البعض بيشوفو كحل للحد من الفقر).. بالنتيجة كتير من العمال رح يتركوا اشغالهم و يقعدوا بلا شغلة و لا عملة (بطالة)

هي افكار معروفة و من بديهيات الاقتصاد

بدك تساعد, لازم تبني بنية تحتية و تخلق وظائف و اعمال و تعمل نظام صحي و تعليمي إلخ.. طبعا الدول الغربية ما عندها هيك رغبة.. بينما بيع المحاصيل الزراعية الفائضة بأسعار بهسة للحكومات الافريقية بحجة المساعدة او حتى التبرع فيها هوي الحل الأسكس و الاسهل


بخصوص الشق التاني... ضحكتني باستخدامك للعرب كمثال. يلي بيسمعك بيقول العرب نبشوا عن البترول بإيديهم و استثمروه لحالهم... العرب كانوا عبارة عن قبائل بدون حضارة و يا دوب بعض الثقافة.. اجوا الاجانب و سرقوا منهم البترول طوال عقود طويلة و لحد الان سيطرة العرب على ابار النفط محدودة و اقتصادهم مرهون بالنفط .. حتى دولة عربية هائلة النفوذ السياسي و الاجتماعي و الاقتصادي متل السعودية مرهونة بالنفط و بأي لحظة ممكن اميركا تقلب نظامها و تسرق النفط.. مثلا لو صار حرب
بقى الافارقة بيحقلهم يسألوا رب العالمين ليش ارضهم جافة ما بيقدروا يزرعوا فيها قمح و ياكلوا.. و ليش يا الله بليتنا بمناجم الذهب و الألماس و المعادن حتى الدول الأجنبية تجي تسرقنا و تلعن شرفنا.. الافارقة ما عندهم أيا فرصة يا غالي بدون اما التدخل الإلهي او التدخل الأوروبي الحقيقي للمساعدة. و طبعا رسميا ما حدا مجبور بسما حدا.. بقى بيضل رب العالمين يلي خلقنا على الساحة.. (عم يدبك متل التمساحة)

و بخصوص التنقل.. من كل عقلك مقتنع بهالكلام؟ ما بعرف شو رد عليك.. بس بيذكرني بماري انطوانيت لما قالولها الشعب ما معو حق خبز... قالتلهم ياكلوا كيك! بقى صح ليش هيك الافارقة جدبان قاعدين بافريقيا؟ و لا الهنود حاشكين حالن هديك الحشكة.. و لا الفلسطينيين بغزة.. يطلعوا يا اخي.. يقتاتوا من ثمار الأرض بغير مناطق.. لعمى شو تنابل

سلام