[قرصان الأدرياتيك]

كاتب النص الأصلي : التقرير الجوال

بالبداية أنا مش خبير بقوانين أحوال شخصية و خصوصاً القوانين الروحية الموضوعة من قبل الكنائس .. ما بعرف شو خلّلاني افتح موبيلي لشوف شو صاير بالموضوع و إلا بالعادة أنا باخد قيلولة بأيام الاجازة .
طيب قانون الاحوال الشخصية الجديد أو القديم بشو بيتعرّض لغير ديانات؟ و كمان الكاثوليك و لو سامحين بالزواج بدي خلين تقرأ هالشي ZENIT و باختصار هي مجلس الأساقفة الايطالة مأصدر رسالة عام 2005 بعنوان "الزواجات بين الكاثوليك والمسلمين في ايطاليا" و هي تعليق لرئيس اللجنة الأسقفية بايطاليا رح حطلكيا باقتباس
كلام لايتناطح فيه عنزانبس بدّي قول عنّه بانه مغلّف بأوراق من السلوفان .
أنا مافي عندي مشكلة بخصوص الاديان و سيطرة و طغيان ديانة على اخرى بس النقطة يللي لازم نوعاها هي بأنو السنن و الشرائع و القوانين بتنحط للأكثرية و يا أخي الأقلية في عندن مرجعياتهن فوين الغلط.
و هي كمان تصريح للفاتيكان.
أنا مارح علّق و لا طالب منّك التعليق بس الشيئ بالشيئ يذكر و كتابك افضل أن تستلمه بيمينك.
باقي شي بخصوص الام الكاثوليكية يللي مطلوب منها شرعاً تنشئة أطفالها على ديانتها حتى إذا كانت متزوجة مسلم .. بظن أنت بتعرف هالشي .. الفاتيكان ما قال لأ بس ردودو الدبلماسية قالتها و لو الموافقة كانت و ماتزال على مضض .. شو برأيك بدهن يقولو لأ منشان الباقي المتبقى من القرون الوسطى يذهب مع أدراج الريح و بيفللو لبيوتهن؟

أهلا فيك من جديد...
حضرتك عم تقول إنك مانك خبير بالقوانين وخاصّة الكنسيّة فليش لسّاتك مصرّ تجادل؟! ولنمشي معك للآخر:
بالنسبة للتصريحات يللي نقلتها من هون وهون (زينيت يللي ماخذة عن مجلة العائلة المسيحيّة أو تصريحات للفاتيكان) فهدول يندرجوا ضمن التعليم الكنسي الاجتماعي وما ألهن خصّ بالقانون العام أو الشّرع الخاصّ يللي لازم يوافق القانون العام حكماً! والهيئة يا أخي ما عم تميّز بين التعليم والقانون... بكل الأحوال القوانين اللي حكيتلك عنها موجودة ضمن مجموعتين كبار أولها "مجموعة قوانين الكنيسة اللاتينيّة" يللي ما بيعنوا موضوعنا لا من بعيد ولا من قريب بس للأسف حضرتك دخلتهن عالنقاش فاضطريت جاوبك. وتانيا "مجموعة قوانين الكنائس الشرقيّة" وما يرافقها من شرع خاصّ بكل كنيسة! وهون بيت القصيد!
هلا ردود ديبلوماسيّة... موافقة على مضض هاد مو من شأنك ولا شأني نحكم عليه... القانون موجود وفيه تصريح علني عن الزواج بين كاثوليكي وغير مسيحي من أي دين كان.
بالنسبة للي ذكرتو بالبداية فالموضوع يتعلق بأزمة عم تعيشها إيطاليا وهيّ أزمة محليّة ما فيك تطبقها عالعالم الكاثوليكي أجمع ولهالسبب بتشوف اللجان يللي تعلم بتعود للجان خاصّة بالكنيسة الإيطاليّة ونحن موضوعنا سورية والقوانين العامة والخاصّة فيها فلا تبعد عن الموضوع الله يخليك!

أنا مافي عندي مشكلة بخصوص الاديان و سيطرة و طغيان ديانة على اخرى بس النقطة يللي لازم نوعاها هي بأنو السنن و الشرائع و القوانين بتنحط للأكثرية و يا أخي الأقلية في عندن مرجعياتهن فوين الغلط.

أنا عندي مشكلة، وكل إنسان بيشوف الوطن واحد والبشر متساويين لازم يكون عندو مشكلة بهالإطار... لأننا نحن بالدولة ما بنشرع لحضرتك أو لحضرتي، لدين أو لدين آخر، نحن بنشرع لدولة بتضم أديان ومذاهب وقوميات مختلفة ولجمع هود الكل تحت خيمة وحدة يقتضي العدل أنو يكون القانون واحد مع مراعاة خصائص كل منهن بدون ما تكون هالخصائص على حساب التانيين متل ما عم يصير معك أنت ومع قانون الأحوال الشخصية الجديد!

أنا قصدت مارح يكون في مصادقة على الزواج المدني و إلا أصلاً الزواج إلو صبغة مدنية بيتطبق ضمن تعاليم شرعية او لاهوتية .. إي نعم لما بيصير اشهار للزواج و شهود و من دون لا قاضي و لا قسيس فهاد زواج و كان حاصل و واقع.
و عندك لبنان و مشروج الزواج المدني يللي جوبه بالرفض من البرلمان أكتر من مرة.
هون بقى إذا مسيحية بدها تتزوج مسلم فحاصل بشكل او بآخر .. مسلمة بدها تتزوج مسيحي بيجوز إذا صار في وفاق و تنازلات و الموضوع في إلو تبعيات .. باختصار الزواج المدني الشعب مش رافضو لأنو انت و غيرك رح تختاروا يللي بيناسبكن .. لكن المرجعيات الدينية و أولها المسيحية قبل المسلمة هنّ يللي رافضينو و لو البعض قبلو فهو قبول على مضض

لا عيوني أنت قصدك واضح جداً وليك شو قلت بالحرف الواحد:

لأنو الزواج تشريع سماوي بكل الديانات و سننه و قوانينه مستمدة من مصادر بتعرفوها اذا كانت شريعة اسلامية أو مسيحية او غيرو.

فرجاءً التزم كلامك ولا تعملي تفاسير واجتهادات متل ما متعودين فقهاء أهل الذّكر!
شغلة تانية بحب تعرفها أنو المرجعيات المسيحية مانها رافضة للزواج المدني، والتجربة اللبنانيّة ما بتعبر عن سورية، لأن هونيك الموضوع يختلف تماماً، هونيك الزواج المدني رح يكون باب لكل الأطراف لتتخلص من المحاكم الدينيّة، وتتطلق على كيفها، والكنيسة بلبنان اعتبرت الموضوع مرفوض لهالسبب ولأسباب أخرى تتعلق بالمسلمين وشرائعهم الخاصة بلبنان وما بدنا نفوت بالتفاصيل لأن الموضوع ما بيهمني والمفضل نبقى بقصصنا نحن!

هاد الشرع الاسلامي شو بدك تعمل .. و انت عايش بين ظهرانين العرب و المسلمين " هي إذا انت مش عربي " و عم بتمارس حياتك اسم الله عليك و عم تنقد الاسلام و شرعه و ماشي حالك و ما تنسى بانو سوريا فيها 10% مسيحيين يعني إذا بدّك تجاري الواقع الصبغة و التشريع بصراحة بدو يكون اسلامي و مابظن 80% من الشعب مستعدين لتغيير معتقدهن منشان 10% هاد واقع

كتر الله خيرك وخير الإسلام إي والله لازم بوس إيد الله وخدودو على هالنعمة... عم يسمحولي مارس حياتي وماشي حالي كمان... وأنا عايش بين ظهرانين العرب والمسلمين... بس كمان بدي أتشكر الله ألف مرة وبوسو من طـ... على نعمة الحكم العلوي برغم كل مصايبو الاجتماعية والاقتصادية بالبلد داعس على راسن وحاطط الصرماية بتمن، هدوك يا رجل عرفت مين هن؟! ولولا الحكم هاد كنت هلا بنزل من عالرصيف إذا شفتلي شي أخونجي ماشي عليه، أو إذا شفتك أنت ماشي عليه لأنّك من نسل الآلهة وأنا من نسل الأبالسة... وبعلق صليب وزنو شي سطاعش كيلو برقبتي حتى يعرفوني ويبصقون بوجهي لأني مشرك كافر... الله يخليلنا ياك يا بشار لك روح إلى الأبد روح شايفلك على قولة الأخوية! فقر وتخلف تحت حكم علوي أرحم بستلاف سنة ضوئية من حكمكن أنت وأمثالك.
إي نسيت أترحّم كمان على تراب ترابو لأتاتورك مقوض الخلافة ونازع القلنسوة والعمامة وحالق الذقون من جميع الأطراف... بشرفي أنا رح أشهدلو يوم القيامة أنو الزلمة بار وصدّيق ورح أعطيه حسناتي ليفوت على جنة الحريم والحوريات... لك بس لو في متلو 3 اليوم بعالم العرب لنحط أوروبة بجيبنا هداك يلي معلق بالبنطلون من تحت!

هلأ المسيحية الكاثوليكية بتكفر المسلم و إذا كنت خاطئ ففي طوائف بتكفر المسلم و بتعتبرو خارج عن الرحمة و مآله النار .. حكو المسلمين شي بهالخصوص؟ ليش ما حكو؟ أنا قللك ليش!
المسلمين عايشين على ارضهن و كمان المسيحيين عايشين على ارضهن عمّي كل واحد بحالو بخصوص الامور الحياتية و بصراحة بس المسيححين العرب آخدين دور الـ Drama Queen و بعض العلمانيين يللي موعاجبهن شي و بدهن يغيرو بس للتغيير.

روح يا عبقرينو... شو هالشحطة؟! من وين جبتا هي دخيلو أنا؟! سمعان بشي اسمو علم "السوتيريولوجيا"؟! إذا مو سمعان فبنصحك تغطلك شي غطة بالنت بحبشة ونكوشة على هالكلمة بركي بتعرف شو معنى "علم الخلاص" عند المسيحيين، واللي بيقتضي بخلاص جميع البشر الأخيار لأن الله مانو لا مسيحي ولا مسلم ولا حتى يهودي من جماعة الليكود... إذا كان إله عادل وأب لكل الخلائق فهو بيخلص البشر أجمعين بناءً على أعمالك وإيمانك مو عالهويّة والقوميّة... بشرفي اللي يسمعك بيفكر في شي حاجز لبناني أو سوري على باب الجنّة (أيام الحرب الأهلية) ودبح عالهوية وشغال الكفوف!
يا سيد تقرير جوال بنصحك تترفع عن هيك أقوال ضعيفة مانا موجودة ولا بأي قاموس وإذا شفتا عند شي قس أو مطران فمتلو متلك ما في فرق وحياتك!
قلتلي الدراما كوين... الله يرحمك يا ستي الزلمة أمثالو كلا أنكلوسكسونيّة! لا حبيبي المسيحيين مانهن آخدين هالدور لأن أنتو ما مخلين الدور لحدا وبعدين أنا ما عم نادي لا بمسيحية ولا بإسلام أنا عم نادي بعلمانية شرقية توحد السوريين تحت لواء واحد وما بتميز بين فلان وعلتان بس لأنو مسلم أو عربي!

منحكي شوي عن عهد الذمة
شكلها هالكلمة بتأثر كتير بس الواقع حاصل و لما طُرحت هالكلمة و أخد العمل بها كانت الدولة اسلامية نهجها اسلامي صرف و ما بعرف انت اذا بدك تسمي المغاير لعقيدة دولة شو؟ بكل الاحوال لغةً الذمة هي الضمان و الأمان
و يعني انت شو قاهرك من هالعبارة يللي بتميز او بتفرق المسلم عن الغير مسلم أنت ما بيهمك بأنو حقوق الذمي هي نفسها حقوق المسلم؟ هاد حاصل
كمان وجوب الدولة المسلمة الذود عن أهل الذمة كما هو الحال عن المسلمين! كمان المسلمين و الذميين سواسية أمام القوانين القضائية من حيث تطبيقها عليهن .. ما عدا الشؤون الدينية فتحرم فيها عقائدهن بيكفي بأنو الحدود الاسلامية ما بتطبق عليهن لانهن مش مسلمين كمان بظن لا يدعى الذمي للمثول للقضاء في يوم عيده.
بدنا نحكي بمنهجية كلمة الذمي تطلق على من يعيش ببلد اسلامي أو بلد خاضع للاسلام و ما بظن هلأ المسيحيين عم يدفعو فلوس بس لسلتهن ما بيحاربو.

معليم إذا أنت جاهل بدينك فهاد مو ذنبي؟! فأما إذا ما كنت جاهل فيه فروح اقرا منيح شو تعني كلمة "أهل الذمّة" وبمعيتك اقرا شو هي أحكام أهل الذمّة... لك لسا في بشر عندن عقل يحكوا هيك؟! إي لأني غريب والدولة المسلمة بتذود عني... ماشالله عليك وعلى أفكارك النيّرة من نورها وطيت وسجدت!
هالحكي ما عاد مقبول بعالم عم ينادي بتحرر الإنسان من كل أشكال العبوديّة وبالمساواة بين جميع الأفراد ذكراً وأنثى... إذا بدك تبني عالم إنساني صحيح فبتمنى عليك تفتحلي عقلك شوي (متل البراشوت كل ما فتح أكتر بيشتغل أكتر) أنت وجماعتك وتخلولي عصور ما قبل التاريخ لهديك العصور وتبلشوا تطرحوا إسلام بينادي بالانفتاح والرحمة والعدل والمساواة وكل ما خلا هالأمر يستر عليه الساتر الأوحد! بيكفي تشوهوا صورة الإنسان يللي كان قبل كل الأديان... لك بدي أفهم قبل وجود الإسلام والمسيحية واليهودية وغيرا وغيراتا ما كانوا بشر؟! ولا هدوك جحاش وأنتو بس البشر؟!
الإنسان من يوم الخلق هو إنسان قبل ما يكون يهودي أو بوذي أو مسيحي أو مسلم... لك حاجتنا قرف!

حلوه هي المسيحي المسلم و بدّي اتبعها بمقولة لفارس الخوري منشان زيدك صَرَع هي من ويكيبيديا و ما بعرف صحتها قال فارس الخوري: "لا يمكننا محاربة النظريات الهدامة التي تهدد كلاّ من المسيحية والإسلام إلا بالإسلام" خلص كلامه.
كيف يعني حكومة شبه علمانية؟ شيوعية مثلاً او ما بتآمن بدين.. منشان هي رح اقتبسلك كمان مقولة إلو " لو خيرت بين الإسلام وبين الشيوعية لاخترت الإسلام" .. كمان قال: "يمكن تطبيق الإسلام كنظام دون الحاجة للإعلان عنه أنه إسلام" و للحقيقة هي المقولة فيها أبعاد كتيرة خلينا نتجاوزها.

إي عجبتك ما؟! اتبعها خال اتبعها بس دير بالك من تبعياتها أو ليسمعك شي إرهابي يفجر حالو فيك! أولاً فارس الخوري مانو معيار لألي ولا حتى لأي مسيحي سوري هو يمثل حالو بالنسبة لهيك آراء شخصية... لأن أنا إذا خيرت بين الإسلام (متل ما حضرتك عم تقدمو) وأي شي تاني لاخترت بالتأكيد هالشي التاني ولو كان الانتحار ! وتاني شغلة أنا لما أحكي عن "شبه علمانية" لأن بآمن بعلمانية (مختلفة عن الغربيّة ببعض الأمور) توحد الجميع بقانون عام مع احترام خصائص المذاهب بدون مخالفة القانون العام... تماماً متل الشرع العام والخاص ضمن الكنائس الشرقيّة!

هون بقى بدنا نقول بأنو المنطقة بأسرها بيسيطر عليها الفكر الديني ما بدي رشّح الاسلام للحل او العلمانية بس صدقني مش بالسهولة تطبيق العلمانية على أرض كانت مهد للديانات أرض تعمرت عليها آلاف المساجد و الكنائس أرض بشر لساتهن ماشين على سنن و نهج الرسول الكريم محمد عليه الصلاة و السلام .

وأنا ما بفكر أهدم الكنائس والمساجد ولا حتى معابد اليهود... أنا بفكر أنشر فكر جديد بيخلص البشر من عبودية الأديان والطقوس البالية والعادات الخنفشارية والأفكار المهترئة يللي سبق وقرأنا عنا هون.
والصّلاة والسلام على الإنسان بكل أشكاله!