[personita]

المساكنة شي حلو وأنا معها 100% وحتى بمجتمعنا
ممكن ساكن...بس لو اني بمجتمع غير اللي أنا فيه
الموضوع ما بيهمني ...وبعتبر انو ما الو داعي
المساكنة حرام....وغلط...ومو لازم يتناقش هالموضوع أبدا

هلأ أنا بين الخيارات الأربعة المطروحة، ما لقيت خيار بيعبر عن رأيي، مشان هيك ما رح صوت، بس مع ذلك، بدي أحكي رأيي.


"المساكنة حرام" هذا حكم ديني بحت، متل لما منحكي "الخنزير حرام"، أكيد مبني على اعتبارات وأسباب بيحددها الدين. بس بيضال حكم ملزم للمؤمن وما بيلزم غير المؤمن. هلأ الدين بيحاول يفسر ليش وقع التحريم بسلسلة من الأسباب اللي بغض النظر عن كونها مقنعة أو ما مقنعة، بتضالها مقصورة على تبرير الحرمة لأصحاب هذا الدين. مثلا، لما منحكي "الخنزير حرام" لأنو حيوان مش نظيف، وبياكل الوسخ ولحمو ثبت علميا أنو ضار، إلخ.. من المبررات، وبيجي شخص تاني ما مقتنع بالفكرة ولا بالأسباب المذكورة لأنو حسب قناعتو الحيوانات كلها مش نظيفة وبتاكل وسخ، والخروف مثلا لحمو ما كتير صحي لأنو نسبة الكوليسترول عالية فيه، فبشو أحسن من الخنزير؟ إلخ..


الفكرة انو الشي الحرام دينيا ما بالضرورة يكون سيئ بالنسبة للكل، وحتى الشخص المؤمن ممكن يلتزم بالحكم لأنو مقتنع تماما بالأسباب المذكورة أو فقط من باب الالتزام بالدين من غير ما يكون مقتنع كتير بالسبب.


وهاي النقطة اللي بدي أوصلا، المساكنة حرام، أوكي، حكم شرعي بلتزم فيه إذا أنا شخص مؤمن، وممكن أقتنع فيه تماما كمان إذا الدين حكالي مثلا المساكنة ممكن تنتج عنها شغلات سلبية في المجتمع وضرر لعدم ضمان حقوق أي من الطرفين. طيب إذا المساكنة تمت على أساس ما بتترتب عنو ها الأضرار، وإذا الأولاد اللي رح ييجو من ها العلاقة رح يكون عندهم نفس الحقوق بالضبط اللي عند الأولاد اللي بييجو من علاقة زواج؟ وإذا ها الصيغة هي صيغة قريبة جدا من الزواج بحيث أنو ممكن حتى توثيقها بعقد رسمي بيضمن للطرفين جميع الحقوق؟ متل ما هو حاليا في الدول الأوروبية؟


اي، بطبيعة الحال إذا انت شخص مؤمن، رأيك ما رح يتغير وما رح تساكن، لأنو مع اختفاء الأسباب، الدين لساتو بيحكي انو المساكنة حرام! بس مع ذلك النتيجة اللي ممكن أوصلا، هي انو المساكنة مانا لا أخلاقية ولا سيئة ولا مضرة بالمجتمع، المساكنة بس بتتنافى مع قناعتي الدينية، مشان هيك ما ممكن أعملا، متل ما الخنزير مانو سيء ولا يؤدي أكلو إلى الوفاة، بس هو "حرام" مشان هيك ما رح أكلو.