[The morning]

Jimy

هل شوش طفلي كبيري؟
نوعا ً ما .. بتذكّـر لم كنت صغيره كان براسي انو انا بكبر لما بصير فيّ قطّف من شجره الليمون اللي عنـّا بالجنينه (( بسوريا )) بدون ما وقف عالكرسي .. هيك كانت فكرة اني صير كبيرة براسي .. و أنا لليوم ما بوصـّل قطف منها بدون كرسي أو سلـم ..
و حسب نظريتي ( الشوشيه البحته ) انو كلياتنا اطفال لكن بس نكبر بنحاول نخبي هالشي .. انا ما بحب خبيه .. و فيك تاخد كمثال على هالشي البكي .. كطفل البكي فعل اساسي من الفعاليات اليوميه و عادي كول بتبكي باريحيه .. بس تكبر بتضلك تبكي بس بتصير بدك تخبي هالموضوع لأنو انت ما بدك تعترف بانو مازال في طفل جواتك ..
غالبا ً الطفل اللي جواتك او جوات الناس يعني بيظهر بالفترة الأولى للأبوه او الامومه يعني بصير في اريحيه اكتر انك تتشارك مع طفلك بطفولته و تحط طفولته على طفولتك و هيك ..
أنا , هاوايفر , بشتغل مع الأطفال و يمكن هالشي بساعدني عبّر عن الطفل اللي جواتي بسهوله أكبر ..

هل بتشعري انك فقدتي مرحلي من طفولتك ونضجتي مبكرا؟؟

ليش حاسستك جارنا بالحارة ..
أي نضجت بكير ( نسبيا ً ) لكن ما بحس انو راح شي من طفولتي بسياق هالنضج .. عشتها متل ما بحب عيشها بس دائما ً كانو يقلولي اكبر من عمرك و واعيه و خمسه و خميسة .. الشي الوحيد اللي كنت لاقي صعوبة فيه ( و بعدني احيانا ً ) اني لاقي اهتمامات مشتركه بيني و بين رفقاتي او خلينا نقول الكلاس ميت تبعوني .. هالشي كان يخلي الكل يفكر اني شايفة حالي عليهم و تسالي .. انو كنت حسهم سخيفين بكتير اشياء بس احيانا ً جاريهم و بأغلب الأحيان يصير عندي رفقات اكبر من عمري من صفوف تانية هنن كمان يصير بدهم يعلمو عليّ فهمانين فتصير اغلب علاقاتي سطحية مع الفئتين العمريتين ( هالحكي من بداية دخولي عالمدرسه يعني منذ الخطوات الأولى باتجاه المستقبل ) ..أي و هيك ..

بالغربي الأميركية.. هل شعرتي يوما بتمييز من اي شكل نتيجة لانتمائك الوطني أو الديني؟؟

ذكرت حادثتين بتذكرهم بالمنبر بموضوع التميز العنصري .. غير هيك ما كتير واجهت مشاكل يمكن لأنو ما كتير ببيـّن على لاكسنت تبعي اني عربية و شكلي ( و حديثي ) بعيدين نسبيا ً عن الأديان ..

و هي ردي بالموضوع :

أوّل مرّه كانت بتعرض فيها لتميز عنصري بمطار شيكاغو .. كنت مسافره عسوريا أوّل زياره بعد حوالي سنه من اقامتي هون و نازله بجواز سوري .. و بناء على انو جوازي سوري انختمت بطاقتي بختم غير الختم اللي عم ينختمو فيه باقي البطاقات و رحت على نقطه تفتيش مختلفه متل ما قال ياس ايضا فكو اللاب توب تبعي و جزمتي حطوها بجهاز غريب عجيب و دخلت عغرفه فتشتني فيها وحده متل ما بفتشو المجرمين بانها تتحسس جسمي من فوق لتحت .. و نكتولي اغراضي فوقاني تحتاني .. و آخر شي لما قلي الشخص اللي رجعلي جزمتي انو صار فيكي تروحي .. حسيت انو ما عاد بدي روح .. أنـّو اغراضي منكوتين و كل هالبهدله هي لأنو الواحد رايح سياحه ..
و هالحادثه تتكرر كل مرّه بسافر فيها بجواز سوري من اميركا ..

المرّه التانيه اللي حسيت فيها بالتميز ضد الدين كانت من فتره شي كم شهر فقط .. و من وحده صديقتي .. عندي صديقه كانت عايشه بالباكستان بصغرها و هيّ مسيحيه لكن كانو بالمدرسه يضربوها عايديها مشان تقرا قرآن و تصلي !! طبعا ً هالشي حسب ما بتقول .. و بذلك هي عندها نوع من التعصب ضد الأسلام - اذا صح التعبير - و اللي صار انو من فتره بشغلي ( أنا بشتغل مع الأطفال ) خبرت هي الصديقه أحدى الاطفال بالشغل انو شوش مسلمة .. فالبنوته بعفويه و اللي بتعرفه و بتسمعه عن الأسلام جاوبت : يعني ما قرّب عليها؟؟ بتموتني ؟؟ في خطر من اني العب معها ؟؟

فعليا ً هالحكي ممنوع و بامكاني اعمللها مشكله لرفيقتي بالشغل لكن كونه في صداقه بيناتنا ما ريبورتيد ايت ..

غير هيك ما بتذكر .. أكيد بكون صاير مواقف متفرقه بس غير هالحادثتين ما بذكر شي علقان براسي حول التميز العنصري ضدي شخصيا ً ..

الشعب الاميركي شعب جاهل لما يحصل خارج حدود بلدو..هل لمستي هيك شي؟

اي و للأسـف .. هنن شعب صادق جدّا ً لذلك بفكروا كل الناس متلهم و كل شي بيسمعوه بالتلفزيون صح و اقليه جدّا ً قليله من الناس بأميركا متطلعه على ما يحصل خارج حدود اميركا .. حتى داخل حدود اميركا ما كتير الناس بهمها كتير غير انها تكون منيحه و تاكل و تشرب و ولادها حدها و مافي حدا خطفهم او ازاهم ..
الاعلام هو المحرك رقم 1 للشعب الاميركي و الحصار الاعلامي اللي فارضته أميركا على شعبها يعتبر السبب الأوّل اللي ما بخلي الاميركي يعرف شو عم يصير بالدني ..

كتير بسمع عن وضع المدارس الاميركية المتدهور.. مقارنة بمدارسنا..بيضل متدهور؟

متدهور كيف ؟ أنا شخصيا ً بفضل مدرستي بسوريا على مدرستي هون ( هاي سكول عم نحكي ) .. صحي هون تسالي و نشاطات و رياضه و مسرح و رسم و موسيقى و تنميه مواهب و قصص لكن بسوريا هيك خوش بوش اكتر .. هاد عن تفضيلي انا لوحده منهم ..
فيما يخص التعليم فهون أسهل و بتستفيد و بتجرّب و بتتعلّم بالنتيجه أكتر .. و احلى شي البكلوريا او ما يشبه البكلوريا عندهم ياه بصف الحادي عشر و بترجع بتداوم على الثالث عشر عادي و كول بعدين بتروح عالجامعه ..
عن الوضع المتدهور فما فهمت كيف متدهور يعني ؟؟
هلأ بدي استأذن منـّك مستر جيمي لأنو دقت الساعه 12:01 ظهرا ً و بتعرف سندريلا الدرس صار لازم تركض كرمال يلحقها الأمير و يجبلها علامات بماده الاثنين ..

ف يتبع وقت بلاقي الأمير كندرتي المرصعه بالألماظ