[Sun Shine Art]

ونعم الاختيار والله

مبسوطه ما

اي رح نبلش صوفي ..

ايه بلشي خيتو ..احلى بدايه من اغلى سونا

بداية شو علاقتك مع الكاس ( هي اقتباس من عندك هع هع هع )

اما شو بدايه الكاس هي غير شكل ...الصراحه هي تعبير مجازي مو اكتر ...بس ببحكيها لان بعرف انه اغلب شبابنا
كتير مرتبطين بعلاقه معينه مع الكاس ..ان كان هروب من شي معين ...او حبا بالكاس ...او نسيان .للكاس اله نكهه وقصه خاصه مع كل شخص ...مشان هيك معلق ع لساني ..اما انا علاقتي مع الكاس ..عادي كتير يعني ما بيعنلي كتير

رايك بالدين ... مو كتقسيم بين الطوائف وانما الدين كجالة وجدانية .. بتلاقيها ضرورية ؟؟ اذا لا شو برايك ممكن يملي الفراغ الديني؟؟؟

هون حطنا الجمال ...

الدين ...كلمه كبيره ومفعول كتير قوي ع مجتمعنا ....والمشكله انه نحنا منستخدم الدين بطريقه خاطئه وللتحكم بالبشر ...وفي فرق كتير بين العادات والتقاليد والدين بس للاسف صار ربط بينهما

اما الدين بالنسبه الي انا شخصيا ..انا ما بتقيد فيه ابدا ...لان بأمن بشغله وحده انه علاقتي مع الرب او الاله ...او القويه الالهيه الي بدك تسميها هي علاقه بيني وبينو ...وما بسمح لأ حد يجي يعطيني قواعد واسس مشان ابني عليها علاقتي فيه ....او يحكم علي من هل المنطلق

العلاقه بين الانسان والدين او الشي السماوي مع احترامي لكل الاديان خليني قول اكيد ضروريه ...ما تصدقي في بني ادم ما بأمن بس بطريق مختلفه واسماء مختلفه ..ضروريه لان الانسان بطبيعته متربط بشي معين مع القويه السمائيه ومستحيل يكون في فراغ ..بس كل واحد فينا بعبر بطريقه وبتعامل بطريقه مختلفه ...واختلاف الطريقه هو الشي الي بملي الفراغ الديني ....

نظرتك للمراة عنا بسوريية كيف؟؟ بتلاقيها فعلا انسان فعال بحياتها ولا بطبيعتها ميالة للاتكالية ؟

يا ستي المرأه السوريه بعبدها عباده انا ..يمكن بعد ما شفت كتير نساء ومع احترامي لكل نساء العالم

بس المرأه السوريه بعتبرها جباره بكل معنى الكلمه رغم حزني عليها بنفس الوقت لانها بتستحق الافضل والاحسن ....ومع احترامي للنصف الاخر بالمجتمع بس بعتبرها عم تعطي بالحياه 75 % ..يمكن طبيعتنا ومجتمعنا السوري مختلف بعده امور ..بس المرأه السوريه مختلفه كليا عن النساء بقوتها وحنانها وخوفها .وثقافتها وفنها وامومتها ...بكل شي ..واتكاليتها ...الي اجيت من الظروف والحياه الصعبه ...وع كلمتك مياله للاتكاليه لانها انحطتت بموقع لا يمكن الا ان تكون قويه واتكاليه ع نفسها والا ما كانت مميزه

وبحب قول شغلي اني كتير بفتخر بأنني أمراه سوريه وبكفيني انه عبر عن بلدي بهل الطريقه

كونك مسافرة برا سورية .. كيف بتنظري لتجربة الغربة ؟
حسيت انو اتغيرت فيك اشيا اساسية بتخليك تاخدي قرار بعدم العودة تماما او بيخطر ببالك هالشي بس مو قريبا وانمت مثلا.. لنقول مثلا بعد عشر سنين ؟؟

الغربه ...أخخخخخخ كبيره مع تنهيده كمان

الغربه مو بس انك تكوني بعيده عن الوطن احيانا الغربه بتكون جوا الوطن وهي اصعب

تجربتي مع الغربه مختلفه تمام عن الاخرين ...ويمكن كتير ناس تكون ضدي بهل الموضوع ..
تجربتي مع الغربه ..فتحتلي بواب كتير ..فرجتني عالم تاني ومختلف كليا عن المجتمع الي عايشتو ..صقلتني بطرق كتير مختلفه ...علمتني كيف واجه الحياه بكل قوه بس ما غيرت اساسيات الحياه الي اتربيت عليها ..

للاسف الغربه عطتني الي ما عطاني بلدي ..تطوير امكانياتي... عرفتني ع حالي اكتر ولوين ممكن وصل وهون انا عم احكي عن العمل ..فتحتلي مجال لللنجاح وللثقه بالنفس انه انا قادره اوصل اعلى مراتب وهيدا الشي ماعطاني بلدي ابدا ...عرفتني ع مختلف الجنسيات ..والاهم علمتني كيف حاول اتقبل اختلاف الاخر ....بس مو معناته ما بشتاق للبلد ..يمكن بشتاق للايام الماضيه مو اكتر ....

بالنسبه لقرار العوده ..مو موجود عندي بل الوقت الحالي وللاسباب كتير ..والصراحه انا ما بفكر ارجع لان كل سنه بنزل بقول انشاء الله الوضع احسن تحت بس انزل وضل فتره بلاقي ع اسوء ..بس ما بتعرفي شو بصير بالايام ..بالاخير لح نرجع بكفن او غيرو

شو تقييمك لمؤسسة الزواج؟ نوع من تقييد المراة عنا ولا نوع من اعطاء حرية اكبر لتصرف ؟؟

الزواج ..كنت نادي فيه بس بالحب والعشق ...بس هدا شي غلط هو مؤسسه مبينه ع اساسات وقواعد واهمها الثقه والاحترام والمشاركه المتبادل بين الطرفين قبل الحب وقبل اي شي ...

وللاسف بمجتمعنا هدا الشي مو موجد واذا موجود بسنبه قليله كتير وضيئله حتى ....لان نحن منضل شرقيين مهما صار ... انا مابعتبرو عم يعطي الحريه للمراه ..لان المرأه عم تجي تعيش ع قواعد واساسات عم يحطها الرجل ان كان بالتصرفات او امور الحياه ....بس منتأمل هل الشي يتغير ......

الك حماسة رائعة خلال النقاش بالمنتدى يا ترى بالواقع العملي صوفي بتعبر عن حالها بهالقوة ؟ شو العوائق في حال لا؟

يمكن انا هون حماستي قليله لان بكتير احيانا ما بحب انبحت مو مشان شي مشان ما تصير مظاهرات يعني ..بس الصراحه الي بيعرفني ع الطبيعه بشوف هل الحماس وهل القوه وبشوف الرفض للعادات والتقيد بامور كتيره ..وهدا الشي الي كتير بخلني انصدم بامور بالحياه ...وبخلني واجه كتير مصاعب ..عمليا واجتماعيا ...بس ما باثر فيني وبضل مثابره لضل هيك ....

اخيرا .......شو نمط الموسيقا يلي بتفضليه ؟

بعتبرها غذاء الروح الي انا ما عم لاقي وقت الو
الموسيقا بتعنلي كتير ...الوحيده الي بتعيشني بحاله الفرح وعالم تاني ..مع الاسف ماعم اسمع كتير بس بضل حن الها ...اما النوع فا حسب المزاج .والوضع يعني ...اذا حفله اكيد ع الدبكه ... مزح ....

بحب الموسيقا الهاديه والرومانسيه ..ان كان عربي او انكليزي ...وبحب نمط الموسيقا الي بتحكي شي معين

بس الاصل ..مرسيل ..فيروز ..جوليا ...وديع الصافي ..زياد ..هدول بيدبحوني دبح ...

وبكره رب الطقاطيق الجديده

هيدا اول شي خطر ع بالي لما شفتك بالمقلاية .. بدي لسا شوف شو ممكن يطلع بمخي اسئلة بعدين

كل هدا لما شفتني بالمقلايه كيف ما ضل يومين ..بس انت الك وضع خاص فا سألي كل شي بمخك ....عاطيتك الضو الاخضر