بتعرف يامعلم بهالموضوع وفرت عليي تعب اني نزل موضوع صرلي عم فكر فيه اكتر من شهر عن سيريا نيوز وشام برس يلي تخطت وقاحتون كل الحدود
المشكل الاساسي مانو باستطلاعات الرأي أو التحقيقات الخاصة وإنما المشكل بطريقة عرض الأخبار بشكل عام وكأنما بعدنا على أيام ماريا ديب والقناة الأولى والتانية وماعنا مصدر للمعلومة غير مواقعهون السخيفة
تصور لدى قراءتي لأحد اخبار شام برس مثلاً عن اتهامات لجنة مراقبة الانتخابات اللبنانية للمرشحين بدفع الرشاوي كنت حاضر المؤتمؤ الصحفي من نص ساعة ويلي أعلنو فيه عن التقرير.. المهم اللجنة أعلنت عن 22 خرق قبل الإنتخابات وانقسمت الخروقات بين فريق 14 آذار و8 آذار بالتساوي فبتفاجئ بالخبر بشام برس 22 خرق للانتخابات من قبل فريق الحريري... فاجيت بعتلون لينك التقرير الرسمي من موقع اللجنة انو يااخي بس حفاظاً على الحد الادنى من المصداقية طبعاً ما نشرو التعليق
منروح على سيريا نيوز جايبين من فترة خبر انو اوباما يعلن انه جاهز لزيارة سوريا وهيك بس حو حاطين تفاصيل كلام اوباما لقناة فوكس.. فاذا بترجع للنص الكامل لحكيو قال انا جاهز لزيارة سوريا بعد ما تعالج سوريا ملفات حزب الله وحماس وتهريب الارهابيين للعراق
طبعاً هاد غير تطنيشهون الكامل على اي خبر ما بيجيهون من المخابرات متل مواضيع الاعتقالات التعسفية او التنقلات بالجيش والامن وملفات الفساد يلي مو مرضي عن فتحها من الحكومة... ومن كم يوم فضحهون ايمن عبد النور بكلنا شركاء بانو نشر مادة كتب تحتها وردتنا من احد افرع الامن وننشرها كما هي عن اعتقال صلاح كفتارو فبتروح على شام برس بتلاقي نفس المادة منشورة ومذيلة بتوقيع شام برس وكأنها تحقيق خاص بالموقع..
يعني ياصاحبي بغض النظر عن رضايي او عدم رضايي عن تحريف الاخبار بهالشكل وحتى لو انا شخصياً ممكن انبسط ببعضها بس بحسو استغباء كبير للقارئ انك تعاملو وكأنو خاروف بدك تقريه الخبر متل ما انت بدك وكأنو هو مابيحقلو يقرا الخبر كما حصل ويحلل بعقلو
الحرية لكل أسرى الحرية في سوريا...
العربي الذي لايجرأ من الذل والخوف على رفع رأسه لرؤية القمر !!!
كيف سينتصر على غزاة القمر؟؟!!
|