اقتباس:
كاتب النص الأصلي : Nay
بتعرف جانو انا بشوف انو النسخة التانية من المشروع أفضل من النسخة الاولى لأنو النسخة التانية بتشبه كتير القانون المعمول فيه حاليا...
وبالنسبة للعلمانية .. أحيانا الناس بيفكرو انو العلمانية هيي ند للدين .. في حين هيي دعوة لفصل الدين عن الدولة وبتتفجأ انو المتدينين رح يكونو قادرين على ممارسة شعائرهون بحرية أكتر مما لو كانو بدولة دينية.. في رجال دين كتير بيحملو فكر علماني.. متل جودت سعيد وخالص جلبي ومحمد أركون ومحمد شحرور..
تحياتي  |
مشكلة العلمانية بالعالم العربي أنّو بيربطوها بالغرب! بيربطوها بجورج بوش يلي دمّر العراق وبشارون وغيرو وغيراتو. العلمانية هيي أسلوب حياة هيي مجموعة قيّم وهي ناتج طبيعي لتطوّر أي مجموعة من الشعوب إذا حبت تتقدم، فمشايخنا بالتلفزيونات بيعرّفوها بكل بساطة على إنها إلحاد ولواطة وانحلال ومابعرف شو!
مشكلة العلمانية أنو أول من وصلوها هني الأوربيين، مع أنو بعالمنا الشرقي من زمان كان في محاولات للوصول لهالتطور
الطبيعي (طبعاً تمّ القضاء عليها). بس خلص بما انو الغرب علماني معناها شي مو منيح(اتذكرت رد حلبي بموضوع الحجاب)!
المشكلة التانية والي بعتبرها الاهم والافظع! أنّو حتى يلي بيعرف ومتيقن انو العلمانية مارح تضرّ دينو ومارح تمنعو من ممارسة شعائر هالدين، بس بيرفضا لأنو ضمن هالأسلوب الحياتي شعائرو ما رح تنفرض بالغصب على أبناء دينو! هادا هوي سبب تخلفنا وبمجرد وجود هالتفكير عنّا بيجعل الأمل للوصول لحياة أفضل مستحيل! ... أنانيّة لأبعد الحدود!
نحنا عايشين بعالم من النفاق وعدم الثقة بالنفس وبالمعتقدات يلي بنآمن فيها (حتّى لو أدّعينا بهالشي). كمثال بسيط: بنرتاح للنظام والقانون المتديّن لأنّو بيضمنلنا 100% أنّو بناتنا مارح يتزوّجو من غير دين، بدل ما يكونو هنّي من نفسون مقتنعين بأنّو يتزوجو من دينون! يعني ببساطة ما بنعرف شو هيي الحريّة.
الدين والعادات والتقاليد حريّة شخصيّة وما بيحق لحدا يمنعها، بس أنا بستغرب دائماً لما شوف ناس عايشة ومستفيدة من خدمات تطوّر الإنسان الحديث ونمط حياتو وبنفس الوقت بتحب تفرض أسلوب حياة كذا قرن لورا على غيرها.
هامش:
ياجماعة
في شغلة وعامل مهم كتير مالازم ننساه بالنسبة لقانون الأحوال الشخصيّة بسوريا، وهيي النظام الحالي ومصالحو الخاصّة وسياستو بتعاملو مع المجموعات الدينيّة ووضع القوانين بشكل عامّ (بتتذكروا الدمى المتحرّكة تبع أفلام الكرتون؟
). فيعني لا توجعو راسكون كتير. بس يعني حلو لما الواحد بيعرف أنو فيه يتفائل بالتفكير الشخصي الإيجابي لدى المواطنين
والخلود لرسالتنا
haa haaaa haatshuuu!!!!!!!..... Sorry, I'm allergic to bullshit!
Urhoy سابقاً