،قال تعالى : ((ولن يجعل الله للكافرين على المؤمنين سبيلا ))
باختصار شديد .. أنا ماني متدين أو عم طالب انو تكون سوريا دولة اسلامية لأنه هاد الشي بالوقت الحالي مستحيل بس بتمناه من قلبي .. و انا من الناس الي بتطالب بفصل الدين عن الدولة و بشدة و بخاصة لما بجتمع مع ناس من الاسلاميين الي بيحكو انو لازم يكون النظام بسوريا اسلامي ..
بس بنفس الوقت ما بقبل انو يفسر الدين على انه البعبع الي رح يحبسنا و يقيد حرياتنا لأن الله أعدل العادلين , و كل واحد بآمن بالله أكيد مقتنع بهاد الشي و بيعرف انو الاسلام هو الدين الحق و طبعا بأمن هيك بشكل منطقي حتى لو ماكان مو مسلم لأنه أخر دين سماوي نزل فالشي المنطقي و العقلاني انو يكون جاب حل لكل مشكلة اعترضت الناس بالديانات الي قبلو ..
* سوريا مابتقدر تقدم نفسها على انو دولة علمانية لأنه بالدستور بيقول انو دين رئيس الدولة هو الاسلام .
80% من سكان الدولة من المسلمين . سوريا عضو في مؤتمر العالم الاسلامي .. و غيرو وغيرو ,
بالنسبة لجانو \بترضى بقانون يسمح لأبو مرتك أنو يلغي زواجكن لمجرد أنو الأب قرر أنو يعتبرك عديم الكفائة؟ \
بقلك انو اكيد لما ابوها رح يروح عند القاضي و يقلو انا عديم كفاءة القاضي ما رح يستنا هالكلمة منو و يطلقنا لأنه الشغلة مو سلطة .. القاضي رح يطلب منو اثباتات على كلامو و رح يبحث و يتحرى مزبوط قبل ما يتخذ اي قرار سواء التفريق او الاستمرار بالزوج .
انسة ناي : انا لما قلت انو ما بعرف بالقانون او بلدين هذا ما بيعني انو انا جاهل او ما من حقي اني قول رأيي لأنه بالنهاية الموضوع بخص بلدي سوريا وبخصني انا شخصيا فمن حقي قول رايي فيه حتى لو كنت رح اظهر بمظهر الجاهل ...و معنا معنا منتعلم ومنكم نستفيد
* اغلب الانتقادات الموجهة للقانون كانت بسبب انو اللجنة سرية و انو بينتقص كتير من حقوق المرأة و الطفل و بيكرس الطائفية ,,,
بس اكتر شي استفزني و هو الي خلاني اكتب انو الناس معترضة لأنه اول شي الاحكام كانت مأخوذة من الشريعة
الاسلامية و وقتها اكتشفت انو النظام السوري الحالي قدر يأثر على الناس و يقنعهم انو الدين هو خصمهم و انو اي شي مستمد من الدين هو ضدهم وضد مصالح الدولة و الشعب .. و الصراحة معهم حق لأنه لما بيرجع الدين للبلد رح تقوم القيامة عليهم و مارح يضلو دقيقة بالحكم ..
و الي استفزني أكتر انو كل مواد الدستور السوري مافيها اي شي بيقيد حرية المواطن إلا قانون الاحوال الشخصية ؟؟!!
يعني ازا قلنا :
1- قانون الطوارئ ... اتعودنا عليه و ما بيمشي حالنا من دونه
2- حزب البعث هو القائد للدولة و المجتمع ... اكيد نحنا منتنفس حزب البعث
3- تعديل عمر رئيس الدوة من 40 سنة ل 34 سنة ... عادي كيف بدنا نعيش بدون أسد ؟!! ما منقدر لأنه الاسد ملك الغابة و نحنا تحولنا لغابة و الحمدلله ..
و قانون و قانون وقانون و ما بعرف شوبدي عد لعد ,, هاد الشي الوحيد الي قامت قيامتكن عليه ؟؟!!!
و اخيرا بدي قول .. أنا لما بكون عم دافع عن ديني ما بكون عم افرض رأيي على حدا او عم حاول انو الناس كلها على اختلاف طوائفا و معتقداتا, بالعكس أنا بكون عم دافع عن قضية أنا مؤمن فيها و شايفها بنظري انو صح لحتى يثبت العكس و حدا يقنعني انو الشي الي كنت عم دافع عنو غلط .. وقتها انا بعتذر قدام الناس كلها و بسحب كل كلامي و كل شي قلتو لأني كنت غلطان .. بس لحد الآن ماني مقتنع بكلام اي حدا ..
بتمنى انو يتاخد كلامي بصدر رحب و ما تاخدو عني فكرة سيئة انو انا متعصب و متخلف و عامل دقن 3 متر ..
انا مجرد شب عادي .. متلي متلكم تربيت بسوريا عندي اصدقاء من كل الطوائف و متربيين سوا ... يعني ما عندي شي ضد حدا أبدا حتى كلمة طائفية ما كنا نسمع فيها الا من جديد .. طبعا من بعد ما بدأت ايران تتدخل و تضم سوريا لولاية الفقيه
على فكرة كل عام و انتو بخير
