اقتباس:
كاتب النص الأصلي : Nay
دايما ما نميل لرمي مشاكلنا وانكساراتنا وفشلنا على الاخرين..
لن انكر ان الاراسمالية العالمية لها تأثير في افقار شعوب الارض لكن تخلف هذه الشعوب وتمسكها بموروثاتها القديمة وعدم قدرتها على الخروج من بوتقة التخلف شيء لا يمكن التنكر له كسبب اساسي في فقر هذه الشعوب..
من جهة ثانية هذه الشعوب كانت فقيرة ايضا عندما كان الاتحاد السوفييتي مشكلا نصف العالم وعندما كان "" يمد يد العون للدول الفقيرة""
علينا أن نعترف بأخطائنا ونكف عن التفرج والشكوى والعويل ورمي اخطائنا على الاخرين هذا أولا وبعد ذلك يمكن لنا البدء بأي عمل نريد
|
أهلاً ناي, شكراً لتعليقك...
في عندي ملاحظات رح حاول حطهون على شكل نقاط:
- الاتحاد السوفييتي لم يكن الأم تيريزا... بل كان قوة عظمى تبحث عن مصالحها, فقط لا غير ( و دليل على ذلك انو ما عملو شي لينقذو باتريس لومومبا, روح حركة التحرر بأفريقيا و تركوه يندبح متل الخروف, و راحو عملو جامعة باسمو بس هيك أمبلاج).
- ليس للرأسمالية دور في إفقار شعوب العالم الثالث فحسب و إنما هي بالتعريف إفقار ناس لأجل غنى الآخرين.
- لا أدري لماذا اعتبرت هذا الكلام و كأنني ألغي مسؤولية المتخلف عن تخلّفه, لكن لنكن واقعيين.. التخلّف واقع اجتماعي اقتصادي سياسي في دول العالم الثالث غالباً لأسباب داخلية, و لكن هناك من يدعم و بشدة هذه الأسباب الداخلية للتخلّف لمصلحة داخلية (أي أن التخلّف ليس نتيجة لتدخّل خارجي من البداية انما من عوامل استمرارو انو يوجد من يهمه أن يكون موجوداً), أو بمعنى آخر... الرأسمالية مستوطية حيط العالم الثالث, يمكن لأنو العالم الثالث ما كان باني حيطو مزبوط و لكن هلأ ما ممكن تسمحلو يبنيه...
مثال صارخ على ازدواجية المعايير الرأسمالية: فنزويلا و السعودية...
شافيز انسان شعبوي و شوي علاّك و صوتو عالي, و لكن يجب الاعتراف و الإقرار برغم عدم محبتي الكبيرة لألو كشخص انو تحويلاتو نهضت ببلدو كقوة اقتصادية و سخّر جزء كبير جداً من العائد النفطي للاصلاح الداخلي من مجانية التعليم و الصحة و افتتاح الجامعات و و و .. الخ (شي رهيب يعني, عن جد)
شافيز حاكم ديمقراطي مية بالمية, و مافي حدا فينو يشكك انو شعبو يحبو بجنون و يصوّتلو, و فنزويلا ليست دولة شمولية أبداً و انما يحكمها نظام ديمقراطي حقيقي و متجذّر
شافيز ايمتى ما فينو يخوزق أميركا ما يقصّر, إن كان من وقت ما اجا و قوّى قبضة الدولة على القطاع النفطي لأنو ما فايتة مخو بطبيعة الحال انو الشركات الأميركية تطالع أرباح من فنزويلا أكتر من البلد (و هاد أمر طبيعي).
سجل شافيز في مجال الحريات العامة مانو ناصع البياض بس بأكدلك انو أنظف من كل حكام أميركا اللاتينية (يمكن عدا البرازيل) و أنظف من سياسة آخر عهد أميركي حتى داخل أرضو..
طيب... قارني فنزويلا بالسعودية... و شوفي كيف الدعم اللامحدود للنظام السعودي اللي هو الأكثر تخلّفاً برأيي بالعالم كاملاً من جميع النواحي بينما هناك هجوم منهجي و محاولة عزل متواصلة لشافيز (اللي هو حاكم ديمقراطي بكل حروف الديمقراطية), شو السبب؟ نفط المملكة مستباح و هداك بدو نفطو يمشي ع كيف البلد.. ازا بدو يعطي كوبا نفط ببلاش يعني, ازا بدو يتعامل مع البرازيل باتفاق ثنائي يتعامل... بينما نفط السعودية تتاجر فيه أميركا...
أميركا لو فيها تسقط شافيز اليوم كان ما قصّرت ( و حاولت بالألفين و تنين تعمل انقلاب ضدو عينك عينك يعني.. و لحسن الحظ ما مشي الحال), بينما هلأ تصير أي حركة ضد النظام السعودي حتى لو داخلية و الغرب رح يسخّر المليارات لإنقاذو مهما كلّف الثمن.. ما بيعرفو شو عم يعملو آل سعود؟ بيعرفو و نص... بس في زبائنية بالموضوع...
ليش مو كل شعوب العالم الثالث متل فنزويلا؟ لأنو فنزويلا طفرة.... رأس المال متحالف مع جهل شعوب العالم الثالث.. و الحلفاء بيحمو بعض متل ما بتعرفي
مع الشكر و التحية
