[yass]

هلأ بخصوص المطارات بالنسبة لأميركا ما عندي علم.. بأوربا مزبوط تشددت الاجراءات الأمنية بشكل واضح لكن تجاه كل الناس من مواطنين و غير مواطنين.. مو بس الاجراءات للعرب أو للمسلمين و لا حتى فقط للاجانب انما لكل المسافرين.. و الأغلبية العظمى من القوانين الجديدة تطلبها شركات الطيران (و منها شركة الطيران السورية... في عنصر أمن تابع للشركة.. سوري يعني, يفتشك على باب الطيارة, بمدريد على الأقل و بتصور بكل المحطات هيك)

سبب امتعاضي من هالنوع من التعامل مع الاخبار هو الصورة الكاذبة اللي تعطي عن وضع الجاليات بأوربا.. يعني ما بيحكو غير عن الشغلات السلبية (اللي موجودة أي نعم, لكن ما تتعدى نطاق محدود) و ما بتلاقي هالنوع من المواقع بتحكي مثلا كيف في بلديات كثيرة خصصت قطع أراضي بالمجان تماما لبناء مساجد و مدارس اسلامية, كيف يعملو محاضرات عن الاسلام و الحضارة الاسلامية و شغلات ثقافة اسلامية و الناس تجي و تهتم و تحاول تتعلم و تعرف و تتعرف.. أو كيف في كومة شخصيات مسلمة و من أصول مهاجرة منتخبة بمناصب كثيرة و أهل البلد ينتخبوهون حتى لو مسلمين و حتى لو عرب... هيك شغلات ما بيحكو عنها.. ما بيحكو غير عن الجانب السلبي و يعطو صورة سلبية من أجل تصوير مؤامرة ضد الاسلام.. يعني شو برأيك موقف الانسان الغربي المنفتح و اللي ما عندو مشكلة مع المسلمين بالعكس ما عندو مانع ينبنى جامع بمصاري ضرايبو أو ما عندو مانع يتساعدو لما عم تصورو كعنصري و بسبب واحد مهستر مثل الايطالي هاد تبع تحالف الشمال تعطي عنو صورة سلبية و كل الشغلات المنيحة اللي يعملها ما تحكي فيها و لا تعطيها أهمية؟ شو بيفرق هالطريقة بالتعامل عن طريقة تعامل العنصري هاد اللي عامل كل المسلمين متعصبين و متزمتين؟ نفس المنطق ...لازم مثل ما الواحد يشوف الجانب السلبي و يحاربو و يوقف بوجهو يشوف الجانب الايجابي و يقدرو و يشكر عليه


يعني تخيل الجانب العكسي... انو يكون في جريدة أو قناة بس تحكي عن الجالية العربية لما يعملو شغلة عاطلة.. لما حدا يمسكوه عم يبيع حشيش أو لما يكون عامل شي عملة... و ما بيطالعو الأخبار الجيدة... انو عربي طلع دكتور ناجح أو شي عالم عربي عمل اكتشاف جديد... شو بيكون موقفك منها؟ ما تقول متحاملة و ظالمة العرب؟ طيب نفس الشي بس بالعكس...

انفهم علي شي و للا بنوب؟