وسرقونا من جديد!!!
حالة أ :
باعونا خط الموبايل بـ 60 ألف ليرة "سرقونا" عملو شبكة الموبايل على حسابنا رخصوا الخط للعشرين ألف "ما رجعولنا شي سرقونا كمان مره" كملو شبكة الموبايل من حق الخطوط بس والفواتير والبطاقات كانت وفر صافي رجعو رخصو الخط لوصل للألف ليرة "كمان مرة نسرقنا" وصلت مبيعات الخطوط للـ 30 مليار ليرة سوري !!!
قرروا يبيعونا أسهم الشركة "يلي تساوت من مصارينا بالأصل" صدقنا واشترينا أسهم "انسرقنا" اتفاجئنا انو باعونا بس 49 % من الأسهم وضلت الادارة لإلهن وهنن أصحاب القرار وهنن يلي بيطلعوا الميزانيات على كيفهن"انسرقنا مره تانيه".. قالولنا السهم بـ50 ليرة بس باعونا ياه بـ500 ليرة "كمان مرة انسرقنا"..
هلأ قرروا يبيعو الشركة "يلي هي إلنا واشتريناها ودفعنا حقا كذا مرة" لشركة أجنبية .. قلنا ماشي ونحنا شو بيطلعلنا؟؟ قالو انتو مابيطلعلكن شي انتو بتاخدو بس ارباح على اسهمكن ومادخلكن بتصرفات الادارة (أصلاً انتو مو شركاء بشبكة الموبايل نحنا منبيعا وبعدين منفكر نعمل مشروع تاني بمصاريكن ومنرجعلكون الأسهم) باختصار "سرقونا من جديد"...
حالة ب :
اشترينا السيارة جمارك 150% "سرقونا" رفاهية وفراغ ونمر شي 50% "كمان مرة انسرقنا" دغعونا تأمين الزامي 40 الف قام طلع هاد التأمين مو تأمين يعني اذا عملت حادث مابيصلحولك بس اذا حدا مات بيعوضوه (كمان ماني واثق انو بيعوضوه) "فيكن تقولو انو تالت مره مننسرق بهالحالة" فرجعنا أمنا تأمين شامل بـ 80 ألف (باعتبار ماني ناوي موت بالحادث).. رجعوا قالو انو لازم تدفع كل سنة خمسين ألف ترسيم "نسرق من جديد" المهم رحنا بدنا نبدل السيارة قامت خسرت السيارة من حقها مليون ليرة الفراغ والرفاهية(البلد الوحيد يلي بيعتبر السيارة رفاهية) والتأمينات وهالقصص واشترينا سيارة جديدة فرجعنا دفعناهن من أول وجديد واذا بدنا نبيعها بدنا نرجع نخسرهن باختصار "سرقونا من جديد"...
حالة ج :
طول عمرنا ما منعرف وين النفط ولا بينزل بالميزانية ولا حدا بيعرف عنو شي "سرقونا" فجأه بيقولو نزل انتاج النفط من 600 ألف برميل للـ 350 ألف برميل (معناها نحنا كان انتاجنا "المعلن "600 ألف برميل" قبل ماينقص) متل العادة إجا "المستثمر العظيم والوحيد نفسو تبع الحالة أ " جاب شركات عطاهون استثمارات النفط بسوريا مقابل 20% لإلو شخصياً و30% للشركة الأجنبية و 50% للدولة "كمان مرة انسرقنا"... المهم انخفض الانتاج غلولنا المحروقات 100% "مرقولنا الخازوق على 3 مراحل" وكملوها رفعو بعض أنواع مشتقات النفط 400% "متل المازوت"...قال ليش مشان منع التهريب غريبة هالبلد يعني مو معقول بدال مايحاسبو المهربين بيغلوا الأسعار ...طيب والشعب؟ والأحلى قال لأنو هي المواد مدعومة لك وما أحلاها وماتكون مدعومه ونحنا عنا واحد من أقل متوسطات دخل الفرد بالعالم.... باختصار "سرقونا من جديد"
من وحي الموضوع:
وبتسألني ليش مغرب... وعايش وحيد
بأرض بلادي عشت معذب ...وشوطالع بالإيد
سرقونا ماحكينا ... شردونا بكينا
قالو رجعوا جينا... سرقونا من جديد
الحرية لكل أسرى الحرية في سوريا...
العربي الذي لايجرأ من الذل والخوف على رفع رأسه لرؤية القمر !!!
كيف سينتصر على غزاة القمر؟؟!!
|