[ابو ريتا]

الموضوع انذكر كتير قبل هي المرّة

المهم هلأ , أنا ما بدي دافع عن الاعلام السوري , بس في كذا نقطة لازم احكي عنها
النقطة الأولى بالإعلام عنا كذا وسيلة للإعلام هي التلفزيون والصحافة على سبيل المثال
النقطة الثانية منبلش بالتلفزيون , عنا ما شالله تلت قنوات هنن الفضائية السورية
والقناة الأولى والقناة الثانية , هدول بيضلو أفضل من أي قناة حكومية موجودة بالعالم العربي
بكل برامجها الترفيهية والسياسية والى أخره ( الدليل .. تابعو الفضائيات الحكومية التانية العربية
وبتشوفو الفرق) .
شغلة تانية حابب وضحها , أنو التلفزيون السوري , مانها قناة اخبارية يعني متخصصة بالأخبار
متل الجزيرة ولا العربية أو حتى CNN أو Fox News . ولا قناة غنائية متل مجموعة روتانا , يعني
التلفزيون السوري مانو متخصص بشغلة مشان هيك لا نظلمو بشغلة في حين انو عم يشتغلو
الجماعة على تطوير أرض الواقع , والدليل انو عم تشوف جيل شبابي عم يغزو هي النوعية من
الإعلام .... وكتير شغلات ما رح اذكرها هلأ .
بعدين عندكون شي اسمو الراديو وهو كمان مادة اعلامية , إذا ما عجبك التلفزيون السوري
فينك تتسمع على راديو شام اف ام مثلا , عندك كل ساعة شي اسمو معلومات جديدة
بهي الفقرة بيسمعوك أخبار لا بتطلع لا بالجزيرة ولا على العربية وبتحدى أي شخص تاني
يحكي عكس هاد الشي ( مع العلم انو هالقناتين أقوى شي بالعالم العربي من الناحية الاخبارية
والسياسية ).
في عندك الانترنت مبارح كنت عم اقرأ على شام برس خبر عن وزيرة الشؤوون الاجتماعية !
شام برس موقع حكومي عم ينتقد الوضع الداخلي بجرأة والخارجي بجرأة أكبر , و هاد الحكي
ما بيكتبوه لاعالجزيرة ولا العربية ( والله يمكن على العربية اي , لأنو هنن بدن نكشة على سوريا !!)
نقطة تالتة هي الصحافة , كمان ما بدي اشرح عنها لأنو إذا بتحب سوريا بتشوف و بتقرأ الي بتحسو
خير عالبلد .
في نقطة بالصحافة بدي قولها : انو مرّة بالزمانات مو كتير يعني , من شي خمس سنين , كانت
تطلع عنا جريدة بيسموها جريدة الدومري , وكانت هي الجريدة معروفة تمام كيف كانت عم تشتغل
هلأ صارت شغلة شخصية بين شخص بالجريدة وشخص بالحكومة أدت لتسكير الجريدة , بس لو منجي نفكر
انو بالأساس ليش طلعت الجريدة , ويا ترى ممكن تطلع جريدة تانية بالمستوى الي كانت تقدمو الدومري!!



بالنهاية , نحنا كشعب سوري لا بيعجبنا العجب ولا الصيام برجب , منضل نقّ و نقّ وهيك عالفاضي
وأنا دايما بقول أنو خلصنا بقى ,, خلصنا تخلف , نحنا مو الله لنقول كن فيكون !!!