اقتباس:
كاتب النص الأصلي : Abu ToNi
واضح أنه صورة المسلم الإرهابي مطبقة بقوة بعقلية الغربي وعم تخلق بدورا تطورف معادي الها
وين المشكلة بالضبط ما بقدر حدد .. الاسلام لحد اللحظة ما عم حسه عرفان يلعبا صح وعم يعرف يعبر عن حاله بطريقة حضارية ليقدر يلغي هلصورة هي .
الله يرحما ويصبر اهل الضحية ... ويفتح عيون المتطرفين من كل الألوان والأديان .
|
و الله يا ضديقي ما عد عرفتلك مين المسؤول عن صورة المسلم الارهابي
هل الاعلام الغربي , مثلا بالمانيا في انتخابات ب ايلول ما الن حديث حاليا الا انو سيناريو اسبانيا 2004 رح يتكرر , يعني اسلاميين بدن يفجروا شي لياثروا على نتيجة الانتخابات , صرت تحس حالك بس تطلع بقطار الانفاق ومعك شنتاية الكل عم يزورك من فوق لتحت
ياترى هل الجالية المسلمة و تصرفاتها هي السبب
هل هالكم حمار اللي متخبيين بكهوف باكستان وافغانستان و اللي كل يوم بيطالعولك فيديو كليب شكل هني السبب
وبجوز كل هدول مع بعض
القضية هي عن جد مرعبة بتفاصيلها وخاصة انو الولد ابو ال 3 سنين شاف امو بعينو عم تندبح امامو .
المجتمع الالماني الشرقي لساتو برايي مطول ليتعافى من اثار الحكم الشيوعي , يعني دريسدن اللي صارت فيها الجريمة من اجمل مدن المانيا التاريخية, بس مستنقع للتطرف ومعادة الاجانب و انا شخصيا ما بحسد اي اجنبي عايش فيها
من الملاحظ انو بالكم سنة الاخيرة انو الجماعات اليمينية المتطرفة باوربا بشكل عام عم توجه نشاطها كلو تقريبا ضد المسلمين نتيجة الخوف قال من اسلمة اوربا , وفكرة اسلمة اوربا للاسف عم يحاولوا حتى سياسيين من احزاب كبيرة يكبروها بعقول الشعب, مثلا بالمانيا في 6 الاف الماني اعتنقوا الاسلام من اصل 82 مليون , يعني هدول شلون بدن ياسلمو المانيا ما بعرف ورغم هيك بيطلع وزير الداخلية الالماني ليحذر من انو هالشي ممكن ياثر على المجتمع الالماني
بس من جهة تانية اذا بتشوف التعليقات مثلا بموقع الجزيرة على الخبر( على فكرة موقع الجزيرة هو مرتع لانصار بن لادن) بتلاقي شي دعوات للجهاد و شي ناس بدها تقاطع المانيا وشي ناس بدها يسلمو القاتل لمصر ليعدموا
يعني كتير صعب عنا يتقبلو انو يا اخي بكل مجتمع في تطرف, في ناس مجانين
على الاقل المتطرفين هدول بالمانيا 90 بالمية منن ما معو شهادة اعدادية ولا عندو تدريب مهني ولا مهنة ولا اي شي وفاشل بكل شي بحياتو , عايش بس على المعونة الاجتماعية و بس شاطر يحمل الاجانب مشاكلو
بينما عنا ماشاء الله المتطرفين حملة شهادات جامعية, وكلو بيقعد يحكيلك عن غزوتي نيويورك وواشنطن وبدو يقنعك انو اللي صار ب 11 ايلول صح.
لسا من اسبوعين قتلوا باليمن 3 المان منن بنتين بالعشرينات من اعمارن, طيب صارت تغطية اعلامية كبيرة بالمانيا للحدث بس اغلب الشعب هون بيفهم انو في متطرفين و ما حدا حمل الشعب كلو المسؤولية متل ما عم يعمل الاعلام العربي هلق.
بظن هدا الفرق بينا وبينن هو اللي بخلينا دايما نخسر المعركة الاعلامية لصالح ناس من مصلحتن اللي عم يصير.